Read Kahua JEREMIA 40 Bible Online

JEREMIA 40 - Kahua bible

JEREMIA 40

¹Na Araha ki tamasi tangê nikâ, i murina o Nebusaratana na araha ni me ki toreê râ i Rama ma ki rupasiê igê. Ga bani rakuê renigi na seni ma ka bani toreê tanga i ngekana henira na enoni hato getera ni Jerusaleme me Juta, ga bani henahuraura, hanana viga merarâ tanga i Babilonia.

²Na araha ni me ki uniê geteê, ma ki vi: “Na Araha God iamu ki bani vi, vi na eraha ki page tarahua na agua ikê.

³Ma i ngekê nga ka vaga me mave na hinarunga iana. Na tarani hato ngegê ka vora me, suria na kariamu ka haritohea na Araha ma ka pe tê viteana.

⁴Hoi, i ngekê nga inê be ruhasigi na seni tenigi na bangobango ni rimamu, ma be rupasigo, ku asitatara. Manga vi igo ma ko obania, vi igo ko takuê tanga i Babilonia, i koro ma. Inê kê girara gê bâbâsurigo. Manga vi igo ma ko pe obania, i koro ma nikâ. I mareha rârâ ta na marâ, vige hagabarasigo tenigi na ara ni agua mavê, go obania, vigo arâ igê.”

⁵Suria inê kê pe arami rêrê, o Nebusaratana ki vi: “Gu aporo i pasina o Getalia karena o Agikama. Virana ka no Sapana. Na maneraha ni Babilonia ki kasia, ki marungigi na hinua i Juta. Igo ko girara go gâga i pasina henira na enoni. Se go arâ igê na ani ma na agua, go takusia, vi oto tangago, vigo arâ igê.” Ma ngaia ki vateê na mahatanga ma na ngêra, na suari ni tara, ma ki nakê, kê râ.

⁶Inê kê râ ma kê oga i pasina o Getalia i hinua i Misipa, ma kê oga henira na enoni, ga hita so i na agua.

⁷Na maneraha ni Babilonia ki kasia o Getalia, ki bâsurira na enoni, ga hita so igê na agua, suria ga pe henahuraura tanga i Babilonia. Ngaira ka matareha ngavê. Tani na araha ni me ni Juta henira na mane ni me iata ka pe nakara mareta i ruguhana na maneraha ni Babilonia. Ngaira ka rongo, vi na maneraha ni Babilonia ki bani kasia o Getalia ki marungia na agua.

⁸Ngaira ka no Isimaele karena o Natania, mo Johanane karena o Karea, mo Seraia karena o Tangumeti, ma ngaira o karena o Epai ni Netopa, mo Jesania ni Maka. Ngaira henira na mane ni me iata ka arâ i pasina o Getalia i hinua i Misipa.

⁹O Getalia ki vi tangara, ki vi: “Hoi, inê be vi tangagamu, siana kamu magu, vi igamu kamu oga i ruguhata na me ni Babilonia. Mu gâga ma ikê, ma na maneraha i Babilonia ki marungigamu me, ma na ara ni marâ ka page arâ bâkoro tangagamu.

¹⁰Tangê inê, inê be goga ikê i Misipa, ma be tamasi urusigamu igê na matena ga arâ me ikê na me ni Babilonia. Tangagamu igamu, igamu kamu huhuhu na guani na vaini, na olive ma na gênige ma na suringa. Ngaigi ka aharêsigamu, hanana mu nakanaka ki tâtâ. Mu ogasigi na hinua, mu bani têgi.”

¹¹I na matena ngekana ngaira hato na Isiraelita, ga gava vê ka oga i Moaba me Etome me na agua getigi, ngaira ka rongoa, vi na maneraha i Babilonia ki nakara tani na Isiraelita, ka oga so i Juta, ma ki kasia o Getalia ki marungira.

¹²Tahema ngaira ka panigi na hinua, ga totoko surigi, ma ka aporo i Juta. Ngaira ka râ i pasina o Getalia i Misipa. Ngaira ka huhuhu igê na guani na vaini ma na gênige ma na suringa. Ngaigi ki aharêsira ngavê.

¹³Ma hemuri o Johanane karena o Karea ma na araha ni me getera, ga pe nakara mareta i ruguhana na maneraha ni Babilonia, ngaira ka râ i pasina o Getalia i Misipa.

¹⁴Ngaira ka vi tanga, ka vi: “O pe rongoa vari, vi na maneraha o Balisi ni Amone ki hagatora o Isimaele karena o Natania, hanana vi nahuigo ko meme?” Mo Getalia ki pe tongesuria.

¹⁵Mo Johanane ki tamasi pinihi tanga, ki vi: “Nakê be râ ma be hagamesia o Isimaele. I asa ta na enoni, vige page girara. I pe oto tanga, vige nahuigo ku meme. I era ma ka tokorenira ngaira hato na ai ni Juta, ga bani pane henigo, ma ki era ma nikâ ka mutemute na enoni hato, ga hita so i Juta.”

¹⁶Mo Getalia ki arami, ki vi: “Siana! Suria na tarana, go visia renia o Isimaele, ki pe monari!”