Read Kahua JEREMIA 42 Bible Online

JEREMIA 42 - Kahua bible

JEREMIA 42

¹Ngaira hato na araha ni me henirerua o Johanane karena o Karea mo Asaria karena o Hosaia, henira na enoni hato, na enoni raha ma na enoni purua ma na kare nikâ, ngaira hato ka haku me i pasiku.

²Ngaira ka tamasi tangê, ka vi: “Gu aganaria na nungiha iamami. Gu nungia na Araha God iaka tangagami hato. Igo ko bâsigami. Igami kami pe rako na ani mi hita so.

³Gu nungia na Araha God iaka, hanana ge hagabâsigami renia na tara, i tuguhigami, vigami arâ igê ma na tarani ta kami tanugi.”

⁴Inê kê arami, kê vi: “Koro ma. Inê be nungia na Araha God iaka, suria mu obania. Inê be hagarongogamu renigi na ara ni marâ hato, i page visigi. I asa iaku, ve pinihia rârâ ta na marâ tenigamu.”

⁵Ma ngaira ka vi tangê, ka vi: “I araria na Araha, i tamasi monari tare, ke ranganigami, manga vi igami ma kami pe arâ surigi na ramata hato, na Araha God iaka ki vatego, hanana go hagatarêngenigi tangagami.

⁶Naka ma mi obanigi se i mareha, igami kami page arâ surigi na tamasinga iana na Araha God iaka, mi nungigo, ko nungia tangagami. Manga igami ma kami têtê viteana, na ara ni marâ ka page korokoro tangagami.”

⁷I murini na tangahuri tangiani na Araha ki aramia na nunginungiha iaku.

⁸Tahema inê kê unira haku me o Johanane, na araha ni me hato iana, ma na enoni hato.

⁹Inê kê hagarongora, kê vi: “Igamu kamu nungiê, kê nungia na Araha God iata na Isiraelita tangagamu. Hoi, na aramiha iana ki manga ikê:

¹⁰‘Manga vi igamu ma kamu agana, hanana vigamu gâga so nga i na agua ikê, inê be hagêrasigamu ma ki mareha be hagaerasigamu; inê be hasigamu ma ki mareha be pirigamu akê. Inê be hetaki, suria gê katogi na bagabevoani, ka tarahugamu.

¹¹Siana kamu magutenia nikâ na maneraha ni Babilonia. Inê be ngahisigamu, ma be hagatahigamu tenia na raramohana.

¹²Inê kê takuigamu. Tahema inê be katoa, ke takuigamu nogana, ma ke nakagamu, kamu aporo i pasimi. Ngaia kani gê visia, inê na Araha.’

¹³“Igamu na ani mu hita so i Juta, siana kamu haritohea na Araha God iami. Siana kamu usi, vigamu oga so nga i na agua ikê. Siana kamu vi: ‘Mareha, igami kami page arâ ma kami page gâga i Esipito, suria i ngekana ki asa, vigami bâsia na hearihatana, se vigami rongoa igê na ahuri ni me, se vigami magê igê.’ Manga mu vi vikana, na Araha God raramohaga hunia iata na Isiraelita ki page aramigamu vikê: ‘Manga vi igamu ma kamu togeaga, vigamu arâ kamu gâga i Esipito,

¹⁶hoi, na henahuita ma na magêha, mu magutenirerua, karu page tarahugamu i ngekana, ma igamu kamu page mutemute i ngekana i Esipito.

¹⁷Ngaira hato na enoni, ga togeaga ka râ ka oga i Esipito, ka page meme renigi na henahuita, se na magêha, se na ringa. I asa ngavê ta na hitangita, vige page tahi. I asa ngavê na tarani era ngegana, vige page tihia na hitangita. Inê be katogi nga, ke tarahura.’

¹⁸Na Araha God iata na Isiraelita ki vi: ‘Inê kê mangariaga ngavê tangara na ai ni Jerusaleme ma kê hagaitangira ngavê. Tagenana ma inê be mangariaga ngavê tangagamu ma be hagaitangigamu, manga vi igamu ma kamu arâ i Esipito. Na enoni ka page makimaki tenigamu, ka page mamanatenigamu, ma ka page hêtami, vi hagatavaniha. I hato, vigamu page bâsia nikâ ikê.’

¹⁹“Na Araha ki hagapêpugamu, na enoni mu hita so i Juta, siana kamu arâ i Esipito. Tahema inê kê kanukanugamu i ngekê.

²⁰Manga vi igamu ma kamu arâ, igamu kamu page meme. Igamu kamu nungiê, kê nungia na Araha God iaka tangagamu, ma kamu suru, vi igamu kamu katogi na ara ni marâ hato, i bonasigamu renigi.

²¹Ma i ngekê inê kê bani visigi tangagamu, ma igamu kamu haritohegi na ara ni marâ, na Araha God iaka ki hagatorê renigi, kê tamasigi tangagamu.

²²Hoi, mu bani girara: igamu kamu page meme renia na henahuita, se renia na magêha, se renia na ringa igê na agua, mu obania, vigamu arâ ma kamu gâga igê.”