Read Kahua JEREMIA 43 Bible Online

JEREMIA 43 - Kahua bible

JEREMIA 43

¹I hato na tamasinga iaku tangara na enoni renigi na ara ni marâ hato, na Araha God iaka ki bani hagatorê, kê tamasigi tangara.

²Ma hemuri o Asaria karena o Hosaia mo Johanane karena o Karea ma na mane hato getera, ga heruruhi, ngaira ka vi tangê, ka vi: “Igo ko hagaparu! Na Araha God iaka ki pe hagatorago, hanana vigu hagapêpugami, vi siana kami arâ ma kami gâga i Esipito.

³O Baruku karena o Neria ki katogo, ko ura pusigami. Ngaia ki obania, vi tagarenigami tangara na ai ni Babilonia, hanana vi ngaira ka nahuigami kami meme, se viga henahuraugami tanga i Babilonia.”

⁴Vikê mareha ngavê vi o Johanane, se vi na hitangita na araha ni me, se vi na hitangita na enoni, vige râ suria na ramata iana na Araha ma ke oga so i na marê i Juta.

⁵Ma hemuri o Johanane ma na araha ni me hato ka torera tanga i Esipito na ara ni enoni hato, ga hita so i Juta henira na ani, ga bani aporo me tenigi na agua, ga bani totoko surigi.

⁶Ngaira ka torera na mane, na gete, na kare ma ka karena na maneraha, ma ngaira hato na enoni, o Nebusaratana na araha ni me ki bani kasira tanga o Getalia, ki bâsurira. Ngaira ka toregamirua nikâ, o Baruku menê.

⁷Ngaira ka haritohea na ramata iana na Araha, ma ka râ i Esipito, ka râ ka tariha i Tapanesi.

⁸I ngekana i Tapanesi na Araha ki tamasi tangê igê, i vi:

⁹“Gu toregi tani na hê raha, ma ku pinihigi igê na ririhêna na tara i maana na maani ruma na ruma iana na gavumane igê na hinua ikê. Go katokato vikana i maata na Isiraelita,

¹⁰ma ko vi tangara, vi inê nga, na Araha God raramohaga huniê iata na Isiraelita, kani gê hagatorangenia me ikê nga na kariaku o Nebukanesa na maneraha i Babilonia, ma ngaia ki page naka na âgâga iana, ki aharêngigi na hê, go pinihigi, ma ki page gasia na ruma na gahu iana i avorani.

¹¹O Nebukanesa ki page arâ me, ki taharia ma ki page taharia i Esipito. “Na ani tanga viga meme renia na ringa, ngaira ka page meme renia na ringa. Na ani tanga viga henahuraura, ngaira ka page henahuraura. Na ani tanga viga meme igê na henahuita, ngaira ka page meme igê na henahuita.

¹²Inê be sungigi na ngêsu iata na harasita na ai ni Esipito, ma na maneraha ni Babilonia ki page sungigi na nunuta na harasita, se i migirâ vê. Ngaia ki page sinoa matarotaro i Esipito, manga na avanu ni sipi i rugunira na gu igê na gahu iana. Ngaia ki page teha, matena ki aporo.

¹³Ngaia ki page uhuigi kumukumugigi ngavê na hê na vakivaki ni ataro, ma ki page sungigi na ngêsu iata na harasita na ai ni Esipito.”