Read Kahua JEREMIA 44 Bible Online

JEREMIA 44 - Kahua bible

JEREMIA 44

¹Na Araha ki tamasi tangê renira na Isiraelita hato, ga oga surigi na hinua i Esipito: i Migitore, i Tapanesi, i Memepisi, ma i na apanena i Patarosi.

²Na Araha raramohaga hunia iata na Isiraelita ki tamasi i haraku tangara, ki vi: “Igamu maremi kamu bani bâsigi na bagabevoani, gê bani katogi ka tarahugi i Jerusaleme ma na hinua hato getigi i Juta. Naka ma i tariha me i ngekê, ngaigi ki aruhuruhu ma ki hihiruga mêngagi,

³suria na enoni igê ka hagamangariê renigi na bagatarihata. Ngaira ka vogasira na harasita na enoni getera ma ka susu tangara. Na ataro ngegana ngaira ma igamu ma na êvarimi kamu pe bani mavosira rârâ.

⁴Inê kê ama ni hagatorangenira nga tangagamu na kariaku na poropete, hanana ga hagapêpugamu, vi siana kamu katoa na tarana ngekana, gê kitenia.

⁵Ma igamu kamu pe rongora ma kamu pe karingara. Igamu kamu pe kasigi râ na bagatarihami, ma kamu ama ni susu nga tangara na harasita na enoni getera.

⁶Tahema inê kê mangariaga ngavê tangagi na hinua i Juta me Jerusaleme. Inê kê hagaitangigi bâraha ma kê sungigi, ka makaka. Ngaigi ka aruhuruhu ma ka hihiruga tariha me i ngekê.

⁷“Hoita, inê na Araha God raramohaga huniê iata na Isiraelita, be hagategamu i ngekê: Tanu hega kani mu hagaratemi maremi ka tarahugamu na bagabevoani ngegana? Mu obania vari, vigamu rapasia na agua era tangara na mane, na gete, na kare ma na kare gari, hanana viga mutemute ngavê?

⁸Renia ta mu hagamangariê? Tanu hega igamu kamu vogasira na ataro ma kamu susu tangara na harasita na enoni getera ikê i Esipito, na agua mu râ me kamu oga igê? Tanu hega mu kato vikana? Mu obania vari, vigamu hagamutegamu maremi, hanana na enoni hato i maveta ka page hagamamana renigamu, ma ka page hêtami vi hagatavaniha?

⁹Igamu kamu bonotenigi vari na bagatarihata na enoni surigi na hinua i Juta me Jerusaleme, na bagatarihata na êvarimi, na bagatarihata na maneraha ma na hehene iata, ma na bagatarihami, igamu ma na hehene iami?

¹⁰Ma ki tariha me i ngekê, igamu kamu pe tangahurigamu rârâ, ma kamu pe urisi parongami. Igamu kamu pe hagarahasiê, ma kamu pe râ surigi na ramata hato, gê vategamu renigi, igamu ma na êvarimi.

¹¹“Tahema, inê na Araha God raramohaga huniê iata na Isiraelita, inê be merongasigamu. Inê be hagahirungia ngavê i Juta hagenani.

¹²Tangara na ai ni Juta, ga hita so ma ka togeaga ka râ ka oga i Esipito, inê be hagamesira hato. Ngaira hato, na enoni raha ma na enoni purua ma na kare, ngaira ka page meme ikê i Esipito renia na henahuita, se renia na magêha. Na enoni getera ka page makimaki tenira, ma ka page hêtata vi hagatavaniha.

¹³Inê be hagaitangira na ani ga oga i Esipito, tagenana manga gê bani hagaitangia i Jerusaleme renigi na hearihatana, na magêha ma na ringa.

¹⁴I asa ngavê ta na hitangita na ai ni Juta, ga hita so ma ka râ me i Esipito ka oga igê, vige page gavagava, se vige page tahitahi. Mareha rârâ na hitangita, vige page aporo, nga noga ma tani, ga bani gavatenia i pasita.”

¹⁵Rako teha ngavê na enoni i ngekana. Ngaira hato na mane, ga girarara na hehene iata, viga susu tangara na harasita na enoni getera, ma ngaira hato na gete, ga ura i ngekana, ma ngaira hato na Isiraelita, ga oga i na apanena i Patarosi, ngaira hato ka aramiê, ka vi:

¹⁶“Igami kami usitenigi na tamasinga, go visigi igê na raramohana na Araha.

¹⁷Igami kami ama ni katogi nga na ara ni marâ, mi bani visigi. Igami kami ama ni susu nga tanga na ataro hehene iamami ‘Araha ni Vavearo’, ma kami ama ni vogasia nga renigi na vaini, tagena manga igami i nago, igami, na êvarimami, na maneraha iamami, ma na enoni raha i pasimami surigi na hinua hato i Juta me Jerusaleme. I na matena ngekana ki aharêsigami igê na ngauha. Igami kami oga igê na ramana, ma ki mareha ngavê vige tarahugami rârâ na bagabevoani.

¹⁸Ma na matena mi naka vê, hanana vigami vogasia ka ‘Araha ni Vavearo’ renia na vaini ma kami susu tanga, igami kami oga tara, ma na goamami ka me renigi na hearihatana ma na magêha.”

¹⁹Ma na gete ka vi nikâ: “Igami kami hahigi na bereti, i bâ manga ka ‘Araha ni Vavearo’, ma kami vogasia renigi na vaini ma kami susu tanga. Ma na mane iamami ngaira ka vi, vi i koro ma.”

²⁰Ma hemuri inê kê vi tangara ngaira hato, na mane ma na gete, ga aramiê, kê vi:

²¹“Igê na tarana na vogasiha, igamu ma na êvarimi ma na maneraha iami ma na enoni raha iami, ma na enoni purua, mu katogi surigi na hinua i Juta me Jerusaleme, kamu takusigi vari, vi na Araha ki hitenigi se vi bonotenigi?

²²Tariha me i ngekê, na marê iami ki aruhuruhu ma ki hihiruga. Na enoni ka makimakitenia ma ka hêtana vi hagatavaniha. Na bagatarihami ka hagamangaria na Araha. Tahema ngaia ki hagaitangigamu renigi.

²³Na bagabevoani ngegê ka tarahugamu, suria igamu kamu susu tangara na harasita na enoni getera, ma kamu haritohea na Araha, suria mu pe râ surigi ma tamasinga ma na ramata iana.”

²⁴Me hemuri inê kê tamasi tangara na enoni hato, ma tangara ngaira nga na hehene, kê vi: “Mu rongo! Na Araha God raramohaga hunia iata na Isiraelita ki tamasi tangagamu, na ani mu oga ikê i Esipito.

²⁵Ngaia ki vi: Igamu hato, igamu ma na hehene iami, kamu bani tohe tanga ka ‘Araha ni Vavearo’, hanana vigamu susu tanga ma kamu vogasia renigi na vaini. Igamu kamu bani hagamonarigi na tohenga iami. Koro era! Koro era! Mu hagamonarigi na tohenga iami. Mu ama ni hagamonarigi nga na suruha iami!

²⁶Hoi, mu rongo! Inê nogaku kê bani tohe! Inê na Araha raramohaga huniê, kê tohe tangagamu, igamu na Isiraelita mu oga ikê i Esipito, kê vi: Haganega tenia i ngekê, ki apu hagetage na hitangimi, vige page tohe reniê, ke vivi, ‘Inê kê tohe renia na Araha raramohaga hunia i mauri.’

²⁷Inê kê pe botage renigamu, vigamu oga igê na ramana, ma kê botage hete renigamu, vigamu mutemute. Igamu hato kamu page meme igê na hearihatana, se na ringa, mataro me kamu mutemute hato ngavê.

²⁸Tani ma na kere hitangimi ka page tahitahi, ma ka page aporo tenia i Esipito tanga i Juta. Ma i ngekana na ani, ga bani tahi, ka page girara, manga vi o ti ki tamasi monari, inê se ngaira.

²⁹Inê na Araha be hagatanga monari tangagamu, vi inê kê page hagaitangigamu ikê, ma kê page hagamonaria na suruha iaku, vigamu page mutemute.

³⁰Inê be mahatangenia o Goparo na maneraha i Esipito tangara na merongana, ga rapasia, viga nahuia ki meme, manga i nago gê mahatangenia o Setekia na maneraha i Juta tanga o Nebukanesa na maneraha i Babilonia, i merongasia ma ki rapasia vi nahuia ki meme.”