Read Kahua JEREMIA 46 Bible Online

JEREMIA 46 - Kahua bible

JEREMIA 46

¹Na Araha ki tamasi tatage tangê renira na enoni surigi na agua i maveta, haganega i Esipito.

²O Nebukanesa na maneraha i Babilonia ki teharia o Neko na maneraha i Esipito henira na mane ni me iana, matena ga heariha i Karegemisi, hagarangia na ve i Uparatesi. Na matena ngekana ki na heta na harisi o Jehoiakimo karena o Josia ki maneraha surigi i Juta. Na Araha ki tamasi renia i Esipito, ki vi:

³“Na araha ni me ni Esipito ka ngere, ka vi: ‘Nanê renigi na tangaruha! Tavu uga tanga na hearihatana!

⁴Hagarêra na hosi! Hagareke akê igê na gerita! Mu ura harahara! Buhigi na bêmi! Rategi na ora! Ririhigi na tuguni ni hearihatana!’

⁵“Ma na ta? Inê kê bâsira na mane ni me. Ngaira ka bubununuga. Ngaira ka suga murisiga. Ga sugarira bê aporo. Ngaira ka magu ma ka gava, ma ka pe sira bê aporo i murita.

⁶Naka ma ga tango teha ngavê, i asa iata, vige tahi. I asa vige tahi ta na mane ni me. Ngaira ka tapasu ma ka vota hagarangia na ve i Uparatesi.

⁷Ti ikana i manga na ve i Nile, i nonga ki akê, ma ki berasigi na akerena?

⁸I Esipito ngekana, ki manga na ve i Nile, i nonga ki akê, ma ki berasigi na akerena. Ngaia ki vi: ‘Inê be anuia na maveta. Inê be hagaerasira ngavê na hinua ma na enoni igê.

⁹Igamu na hosi ni me, mu tavu uga. Kati ni me, râ! Mane ni me, mu tavu uga! Mane ni Etiopia me Libia mu tangaru! Mane ni hananiha ni Litia, mu tavu uga!’”

¹⁰I ngekê nga ki na matena iana na Araha God raramohaga hunia. Ngaia ki hagaitangira igê na merongana, ma ki barua aporo na siva tangara. Na tatapa borahu iana ki ngaura, ma ki tunumigi na gaputa, mataro me ki masumasu ngavê. Na Araha God raramohaga hunia ki vogasi renira na merongana, hagarangia na ve i Uparatesi.

¹¹Ai ni Esipito, râ i Gileata, tabegi na makoni na meresini. Na meresini hato iami ka pe ramo. I asa hagetage vigamu komaga aporo.

¹²Na agua getigi ka rongoa na makiha iami. Na maveta ki rongoa na enangiha iami. Na mane ni me ka hetogotogo, ma ngaira hato ka vota i ano.

¹³Matena o Nebukanesa na maneraha i Babilonia ki tavoraha me, hanana vi taharia i Esipito, na Araha ki tamasi tangê, ki vi:

¹⁴“Râ surigi na hinua i Esipito, i Mikitole me Memepisi me Tapanesi, ko vivi: ‘Nanê! Ngahi maremi! Na hearihatana ki bani ruhuruhugi na ara ni agua rihigamu.

¹⁵I he nga na harasimi? I pe anumasigamu vari? Tanu hega kani gava? Na Araha ki teharia, ma ki nahuira na mane ni me iami.’

¹⁶Ngaira ka tapasu ma ka vota. Ngaira ka heararami ka vi, ‘Rêrê! Ge râ i pasika! Ke tahi tenira na merongaka. I era ma ka nahuigia!’

¹⁷“Mu hagavoravora atana na maneraha i Esipito, vi ‘Rabaraba Purua Ma’, ‘Rogaroga Purua Ma’.

¹⁸Na morana na maneraha inê nga, na Araha raramohaga huniê, na God mamauri. Na ani i page taharigamu, ngaia ki hahanetaga ma ki raramohaga, manga na barana i Tabore, i akê teharigi na hungani, se manga na barana i Karamele, i oga bê vato renia na asi.

¹⁹Ai ni Esipito, hagarurugu. Ga page henahuraugamu. Memepisi ki page aruhuruhu, ma ki page hihiruga.

²⁰Esipito ki manga na puruka bâkoro, ma na rango ru ni Babilonia ka aruruhia.

²¹Na mane ni me, Esipito ki vurira, ka mangara na kareta na puruka, ga manoenoe. Ngaira ka pe ramo ni hearihatana. Ngaira ka arigu aporo ma ka gavagava. I ata me noga na matena, ga hagaitangira ma ka mutera igê.

²²Matena na merongata ka pu hesuri me, na ai ni Esipito ka gavatenira, manga na ma i hesui. Na merongata ka tahurura renigi na tahuru, mangara na mane ga tapigi so na apinige,

²³se ga tapitapia na vapuna hagenani. Ngaira ka rako teha ngavê manga na ruruha ni pê. I bara hagetage vige tomanira.

²⁴Ngaira ka hagamakira na ai ni Esipito, suria ga têra. Ngaia kani gê visia, inê na Araha.”

²⁵Na Araha God raramohaga hunia iata na Isiraelita, ki vi: “Inê be hagaitangia Amone na ataro ni Tebesi, henira na ai ni Esipito ma na harasita ma na maneraha iata. Inê be têra na maneraha i Esipito ma ngaira hato na ani ga hagêguri togo renia.

²⁶Inê be tagarenira tanga o Nebukanesa na maneraha i Babilonia henira na mane ni me, ga bani rapasira, viga nahuira ka meme. Ma i ta na matena na enoni ka page oga aporo i Esipito manga i nago. Ngaia kani gê visia, inê na Araha.”

²⁷Na Araha ki vi: “Kariaku, siana kamu magu. Ai ni Isiraele, siana kamu bubununuga. Inê be hagatahigamu tenia na agua hagatê ngekana, ga bani henahuraugamu tanga. Igamu kamu page aporo me i pasimi, ma kamu page gâga igê na marapeha. Igamu kamu page asitatara, ma ki asa ta na enoni, vige hagamagusigamu igê.

²⁸Kariaku, siana kamu magu, suria inê kê ngahisigamu. Inê be mutera ngavê na agua, gê bani tokorenigamu surigi, ma ki mareha vi ve mutegamu igamu. Inê be hagaitangigamu, ma na hagaitangiha iaku ki page hagaotogamu. Ngaia kani gê visia, inê na Araha.”