Read Kahua JEREMIA 47 Bible Online

JEREMIA 47 - Kahua bible

JEREMIA 47

¹I nago tarana na maneraha i Esipito i taharia igê i Gasa, na Araha ki tamasi tangê renia i Pilisitia.

²Ngaia ki vi: “Bâ, na me ni Babilonia ka manga na ve, i nonga ki akê. Ngaira ka page manga na ve, i anusigi na akerena, i anuia na agua hagenani ma na ara ni marâ igê, na hinua ma na enoni, ga oga igê. Na enoni ka page avaravara. Na maveta hagenani ki page angiangi bâraha.

³Ngaira ka page rongora na hosi ni me, ga nagiakuruhi. Na kati ni me ka page hengaki ma ao agani. Na vaema ni kare ki asa, vige page gagêmaga renira na kareta. Ngaira ka page tako hurira ma.

⁴Suria i râ me noga na matena, viga page mutera igê na ai ni Pilisitia. Ma i Taire me Sitone ki asa hagetage, vigaru page tamanira. Inê na Araha be mutera ngavê na ai ni Pilisitia, na ani ga bani râ me tenia na marê i Kerete.

⁵Na ai ni Gasa ka gorogoro bê hurira, suria ga angiangi maramara. Na ai ni Asekeloni ka gâga munimuni, suria ga hetaki. Tani ma na ai ni Pilisitia ka page hitahita so. Ngaira ka angi maramara taraha?

⁶Ngaira ka ngere, ka vi: ‘Araha, ko tahurungenia taraha na tatapa boraha iamu? Gu naka aporo, ke oga igê na agana!’

⁷Manga i he ke girara, vi gâga purua ma, matena gê hagatagarahia? Inê kê bonasia, hanana i taharira na ai ni Asekeloni ma na ara ni enoni hato igê na tarasini.”