Read Kahua JEREMIA 48 Bible Online

JEREMIA 48 - Kahua bible

JEREMIA 48

¹Na Araha raramohaga hunia ki tamasi vikê renia i Moaba, ki vi: “I era ngavê tangara na ai ni Nebo. Na hinua iata ki aruhuruhu. I Kiriataimi ka bani henahuraua. Ga ruhuruhua, naka ma i nganganihaga. Na enoni igê ka maki ngavê.

²I Moaba ki hato, vige rongo raha na atana. Na merongana ka henahuraua i Hesibone, ma ka kato, viga ruhuruhua i Moaba, ma ka mutera na enoni hato igê. Ga page hagahirungia na hinua i Matemane. Na hearihatana ki page tarahua.

³Na ai ni Horonaimi ka ngere, ka vi: ‘E, henahuita! Makakaniha!’

⁴“I Moaba ki aruhuruhu. Na kere kare igê ka angiangi.

⁵Ngaira ka angi matoanira igê na tara tagere tanga i Luguti, igê na tara so tanga i Horonaimi.

⁶Ngaira ka vi: ‘Garigari! Mu tango tange na manavami. Tangotango, manga na tonki vasiga igê na masusu.’

⁷“Moaba, igo ko kato togo renigi na raramohamu ma na ruruguha iamu. Henaka, ma igo ka page raugo. Ka page henahuraua Kemose na harasimu henira na maneraha ma na mane ni vogasiha, ga hagarapea.

⁸Na ara ni hinua hato ka page aruhuruhu, ma na maruguna ma na bena nikâ. Ngaia kani gê visia, inê na Araha.

⁹Tagarahia na matiku tanga i Moaba, suria i sugi me. Na hinua igê ka page aruhuruhu ma ka page hihiruga tare.”

¹⁰I page era ngavê tanga na ani, i pe tê viteana na Araha i mêrihana hagenani. I page era ngavê tanga na ani, i usi, vige tahurungenia na tatapa borahu ni nahu enoni.

¹¹Na Araha ki vi: “I Moaba ki bani oga suri parongana ma, ma ka pe bani henahuraua me. I Moaba ki manga na vaini, i oga suri parongana ma ka pe kara tarêa. Ngaia ki sigini koro era ma ki tono koro ngavê.

¹²“Hoi, i sugia, ma be hagatorara na enoni, ke meria i Moaba manga na vaini. Ngaira ka page barugigi na pi ni vaini ma ka page kamarigi.

¹³I na matena ngekana na ai ni Moaba ka page raruni era igê renia Kemosi na harasita, mangara na Isiraelita i nago, ga raruni era renia Betele na harasita, ga hagêguri togo renia.

¹⁴Mane ni Moaba, tanu hega mu tamasi paroparo tare, vi igamu ka na mane ni me raramohaga ma kamu tehateha tare igê na hearihatana?

¹⁵Moaba ma na hinua igê ka aruhuruhu ma na mane na gapu haoru igê ka bani mute. Inê nga ki na maneraha. Na ataku na Araha raramohaga huniê. Ngaia kani gê visia.

¹⁶I Moaba ki sugi hato iana. I sugia ma vige vota.

¹⁷“Mu angi maramara, igamu hato, na ani mu oga hagarangia i Moaba, ma kamu girara vi raramohaga. Mu vi, ‘Na raramohana ki hato. I hato, vige page rongo raha nikâ na atana.’

¹⁸Ai ni Tibone, mu vato tenigi na âgâga bâkoro iami kamu oga hatara i ano, ma kamu gegege. Na ani, i hagaerasia ngavê i Moaba, ngaia ikê, ma ki page hagaerasia na hinua iami nikâ, naka ma i nganganihaga na hinua iami.

¹⁹Ai ni Arere, mu ura kamu bâbâ i tara. Mu hagatera na ani, ga gavatenia i Moaba, renigi na tarani ga vora i ngekana.

²⁰Ngaira ka page arami, ka vivi: ‘I Moaba ki vota ma ki maki ngavê. Mu angiangi ma kamu gegege. Hagarongora na enoni, ga oga i ve i Anone, vi i Moaba ki aruhuruhu.’

²¹“Ga bani surigi na hinua igê na bena igê na hungani: i Goloni, i Jasa, i Mafata,

²²i Tibone, i Nebe, i Bete Tibalataimi,

²³i Kiritaimi, i Bete Gamulu, i Bete Meone,

²⁴i Kiriote me Bosera. Ga bani surigi na hinua hato i Moaba, na ani hagatê ma na ani hagarangi.

²⁵Ga hatungia ngavê na raramohana i Moaba. Ka hagamareha ngavê. Ngaia kani gê visia, inê na Araha.”

²⁶Na Araha ki vi: “I Moaba ki hagarahasia marena ma ki haritoheê. Hagatonomia, ke aripo na maana, ke vota, ke apuripuri igê na momâna. Na enoni ka page mamanatenia.

²⁷Moaba, go takusia mênga vari, matena go mamanatenira igê na ai ni Isiraele? Igo ko katora mangara na mane hanago, ga têra. Ma i ngekê, ngaira ka mamanatenigo igo.

²⁸“Ai ni Moaba, mu panigi na hinua iami. Mu gava tangagi na hungani, kamu ahiahi igê na vaba. Mu mangara na manu, ga roborobo igê na rabini na tarihani na raoni.

²⁹Moaba ki paroparo ngavê. Inê kê bani girara, viga paroparo, ka heruhuruhi, ma ka hagarahasira mareta, ma ka vi ma, vi ngaira ka teha.

³⁰Ngaira ka tamasi paroparo purua ma. Ngaira ka pe hagavoregi rârâ ta na marâ.

³¹Tahema inê be hetaki tanga i Moaba. Inê be angisira na ai ni Moaba ma be angi maramara renira na ai ni Kire Heresi.

³²Inê be angisira na ai ni Sibima teharira na ai ni Jasere. Sibima, i nago igo ko manga na apinige ni vaini. Na arani ka taba aharêngia na Asime rârâ ma ka tariha râ i Jasere. Ma i ngekê ka bani erasigi na suringa ma na vaini iamu.

³³Na vagevageha ma na ageageha ka bani magahuru vê tenigi na pariki igê na mako koro i Moaba. I hatohato na guani na vaini, hanana vige rusirusi igê na rusi. I hato vige page rusirusi nikâ, se vige page ngeregere vagevage renigi nikâ. Ngaira ka ngerengere, ma ka pe ngere vagevage.

³⁴“Na ai ni Hesebone me Eleale ka angiangi. Na enangiha iata ka rongo me i Jahase. I Soare ngaira nikâ ka rongoa. Ma ngaira nogata i Goronaimi me Egelata Selisia. Na ve i Nimirimi ki mamata nikâ.

³⁵Na ai ni Moaba ki page hato, vige vogasira nikâ igê na harasita, se vige susu tangara nikâ igê na agua ni vogasiha iata. Ngaia kani gê visia, inê na Araha.

³⁶“Inê kê mesira na ai ni Moaba me Kire Heresi. Na aitangihaku ki angiangi manga êhihi, matena igê na bagiha ni nuni, suria ga tê tara renigi na ara ni nahuninga iata.

³⁷Ngaira hato ka goro bê hurira, ma ka tapurugi na taboturita. Ngaira hato ka hagamamarigi na rimata, ma ka hagesuru renigi na tarisigani na gahu.

³⁸Na ai ni Moaba ka angiangi maramara surigi na ruma ma na mahera hato igê, suria inê kê kamakamaria i Moaba, manga na apira, i tanu era.

³⁹Moaba ki hato iana ma ki angi. Na makiha ki nahuia ngavê. Ngaia ki aruhuruhu. Na enoni igê na agua hato getigi ka rurusia ma ka makimaki tenia. Ngaia kani gê visia, inê na Araha.”

⁴⁰Na Araha ki vi: “Ta na agua ki page taharia i Moaba, manga na ahetaronga i hagavato.

⁴¹Na merongana ka page sugarigi ma ka page henahuraugi na hinua ma na ruma nganganihaga. Igê na matena ngekana na mane ni me ni Moaba ka page magu, manga na gete i harate kare.

⁴²Moaba ki page aruhuruhu, ma na enoni igê ka page mutemute ngavê, suria ga hagarahasira mareta ma ka haritoheê.

⁴³Na maguha, na kiru na suta ma na etu ka nanêgamu, na ai ni Moaba. Ngaia kani gê visia, inê na Araha.

⁴⁴Na ani, i gavagava, suria i magu, ngaia ki page votavota igê na kiru na suta. Na ani, i huhura tenia na kiru na suta, ngaia ki page tutu igê na etu, suria inê nga na Araha, kê bani naka na matena, gê page hagaitangia igê i Moaba.

⁴⁵Na enoni ka gava tanga i Hesebone, hanana viga rukuruku igê. Ngaira ka memeaga na apeta. Ma i Heseboni ki noro. Na hinua iana na maneraha o Sigone ki makaka. Na bena ma na hungani i Moaba ka makaka, naka ma ga paraparangasi tare na enoni igê.

⁴⁶I era ngavê tangago, Moaba! Ga makama na enoni, ga hagarapea o Gemose na ataro. Na kareta, mane ma na gete, ka bani henahuaura.

⁴⁷Ma henaka i manga ngekana, i ta na matena i muri me inê na Araha kê page katoa i Moaba, ki page gâga aporo igê na ramana. Ngaia kani gê visigi vikana renia i Moaba.”