Read Kahua JEREMIA 49 Bible Online

JEREMIA 49 - Kahua bible

JEREMIA 49

¹Na Araha ki tamasi renia i Amone, ki vi: “I he ngaira nga na mane ni Isiraele? Mareha vari na hitangita, vige henahu pusia na marê iata? Tanu hega na enoni, ga hagarapea o Moleki, ka girara viga parênia na mako i Gata ma ka ogasigi na hinua igê?

²Ma i ta na matena na henahuita ki page tarahua igê na hinua i Raba i Amone. Na hinua raha ngekana ki page aruhuruhu. Na hinua suria na marê ka page makaka. Ma i ngekana na Isiraelita ka page taua aporo na mako, na ai ni Amone ka bani parênia tenira. Ngaia kani gê visia, inê na Araha.

³“Ai ni Hesebone, mu angiangi. Na hinua i Ai ki aruhuruhu. Gete ni Raba, mu angi maramara. Mu hagesuru renigi na kakagani na gahu ma kamu angiangi maramara. Mu tugupu rârâ, suria ga henahuraua na harasimi o Moleki henira na mane ni vogasiha iana ma henira na enoni, ga hagarapea.

⁴Renia ta igamu kamu tamasi paroparo, igamu na enoni ni hagaparunga? Na raramohami ki so nga. Tanu hega kamu hagêguri togo renigamu maremi ma kamu kasigamu akê maremi, vi igamu kamu ramoramo?

⁵Inê nga, na Araha God raramohaga huniê, be katora na agua rihigamu, ke taharigamu ma ke hagamagusigamu. Igamu hato kamu page gavagava. Na ara ni hitangimi ki page gavagava tanga na manavana marena. Ma ki asa ta na enoni, vige page hagahakugamu aporo me nikâ.

⁶“Henaka i manga ngekana, ma i ta na matena i muri me inê be katoa i Amone, ki oga aporo igê na ramana. Ngaia kani gê visia, inê na Araha.”

⁷Na Araha raramohaga hunia ki tamasi renia i Etome, ki vi: “I hega, na ai ni Etome ka bekabekaga vari? I mareha vari ta na enoni, hanana vige hagaotora? I mareha vari tani, vige takotako mataha?

⁸Ai ni Tetana, mu kari aharo. Gava, kamu ahi! Inê be hagaerasigamu ngavê, igamu na raraha iana o Esau, suria i ngekê ki na matena iaku, gê hagaitangigamu igê.

⁹Na enoni, ga huhuhu na guani na vaini, ki asa vige huhu kasigi. Na enoni, ga hanago igê na bungiana, ki asa vige tora kasigi.

¹⁰I tagenana ma inê be katora na raraha iana o Esau ke tê tara ngavê. Inê be okera hura tenigi na ahiahi iata, hanana siana ka ahiahi nikâ. Ngaira hato i Etome ka mutemute. Mareha tani vige page hita so.

¹¹Naka ma i manga ngekana, ma inê be marupera na kare banogo iami. Ma na gete na nâ ka girara ga hagêguriê.”

¹²Na Araha ki vi: “Naka ma na ani, ga pe arari, vige hagaitangira, ngaira nga nikâ ka totono tenia na kâkâ ni hagaitangiha. Mu takusia vari, viga pe hagaitangigamu? Mareha vê! Mu totono nga tenia na kâkâ ni hagaitangiha.

¹³Inê mareku kê bani tohe, vi i page aruhuruhu na hinua i Bosera. Na enoni ka page makimaki tenia, ma ka page mamanatenia, ma ka page hêtana vi hagatavaniha. Ngaia kani gê visia, inê na Araha.”

¹⁴Etome, na Araha ki hagarongoê, vi ngaia ki bani kasia na mane tora tamasinga tangara na agua hato i maveta. Ngaia ki vi vikê: “Hagahakura na mane ni me iami. Nanêa na hearihatana. Taharia i Etome.”

¹⁵“Ngaira ka page teharigamu, ma ka page ruhigamu.

¹⁶Na paroha iami ki hagabekasigamu. Mu takusia vari, vi na enoni ka magutenigamu ngavê? Mareha vê! Igamu kamu oga igê na vaba igê na hungani igê na boteni na barani. Naka ma mu oga i kerekê noga manga na ahetaronga, inê kê girara, gê tavogamu vato.” Ngaia kani visia na Araha.

¹⁷Na Araha ki vi: “I page era ngavê tanga i Etome. Na enoni, ga riri i ngekana, ka page gatage ma ka page bubununuga.

¹⁸I Etome ki page aruhuruhu mangarerua i Sotome me Gomora ma na hinua getegi hagarangirerua. Ngaia ki page hihiruga tare. Mareha rârâ ta na enoni, vige page arâ i ngekana. Ngaia kani gê visia, inê na Araha.

¹⁹Tagenana manga na laione, i taha me tenia na vapu i na akerena na ve i Jotano ma ki taharia na togoha igê na pariki ni go, inê nogaku be hagavasira na ai ni Etome, ke hata ni gava tenia na marê iata. Inê be atea na ani ma na enoni, gê obania ke marungia i Etome. Ti ki maratoraku? Ti ki girara i meêhesuasua? Ti ki ramo tehariê?

²⁰Hoi, mu karingagi na katoha iaku renira na ai ni Etome ma renira na ai na hinua i Temane. Na kareta nikâ ka page okeoke rataratagenira. Na enoni hato ka page gatage renira.

²¹Matena i Etome ki votavota, na maveta hagenani ki page gisigisi igê. Na enangiha ki page rongo raha, ki tariha igê na Asi Memera.

²²Na meronga ka page taharia i Bosera, manga na ahetaronga i hagavato. I ngekana na mane ni me ni Etome ka page magu manga na gete, i harate kare.”

²³Na Araha ki tamasi renia i Tamasiko, ki vi: “Na ai ni Hamata me Arapata ka magu ma ka anumanuma, suria ga rongoa na rongoha era. Ngaira ka pe hahutogo manga na asi. I asa iata vige ape haritagi.

²⁴Na ai ni Tamasiko ka mameaga. Ngaira ka bubununuga ma ka gava. Ngaira ka mangariaga ma ka magu, manga na gete i harate kare.

²⁵I nago na hinua ki rongo raha na atana ma na enoni igê ka vagevage tare. Ma i ngekê ki hihiruga ngavê.

²⁶Igê na tangiana ngekana ka page nahuira igê na mane na gapu haoru, na mane ni me, ma na gahuata ka page tâ totoko surigi na tara ma na mahera i hinua.

²⁷Inê be sungigi na para ni hinua i Tamasiko. Na ruma iana na maneraha o Benihatata ka page makaka. Ngaia kani gê visia, inê na Araha raramohaga huniê.”

²⁸O Nebukanesa na maneraha i Babilonia ki teharira na ai ni Ketare ma na apanena i Hasore. Na Araha ki tamasi renira na enoni ngegana, ki vi: “Mu râ kamu taharira na ai ni Ketare, ma kamu mutera ngaira i kerekê ngegana.

²⁹Raugi na ruma ni gahu iata, na gahu ma na ara ni marâ hato igê. Raura na togoha ma na kamelo iata. Ngirira na enoni, kamu vivi: ‘Na bubununuganiha ki nahuigamu!’

³⁰Ai ni Hasore, inê na Araha kê vi tangagamu, mu gavagava kamu ahiahi hagatê. O Nebukanesa na maneraha i Babilonia ki bani kato renigamu, suria i vi:

³¹‘Nika, ge taharira na enoni ngegana, ga vi ngaira, viga asitatara ma ka ape haritagi, suria vi ngaira ka oga hagatê era. Na hinua iata ki mareha vige na para rihia. Ngaia ki oga tatara so me.’

³²“Raura na kamelo ma na togoha hato iata. Inê be tokorenira surigi na ara ni agua na enoni ga tapuru bê ngegana. Na bagabevoani ka page rihira ma ka page nahuira.

³³I Hasore ki page hihiruga ngavê tare, nga noga ma na o vasiga ka page ogasia. Ngaia kani gê visia, inê na Araha.”

³⁴Matena o Setekia ki maneraha moramora i Juta, na Araha raramohaga ki tamasi tangê renia i Elama, ki vi:

³⁵“Inê be mutera na mane hato ni hananiha, suria ngaira ka na hagêguringa iana i Elama.

³⁶Na roga raha tenigi na ara ni agua ka page nahuira na ai ni Elama. Inê be tokorenira surigi na agua hato. Ngaira ka page gavagava tange, ma ki asa vige tihia ta na agua.

³⁷Inê be hagamagusira na ai ni Elama renira na merongata, ga bani rapasira, viga nahuira. Inê be mutera na ai ni Elama, suria inê kê mangariaga bâraha tangara. Inê be hagatorangenira na merongata tangara, mataro me ka mutemute ngavê.

³⁸Inê be mutera na maneraha iata henira na kariata ma be urusira inê.

³⁹Henaka, ma i ta na matena i muri me inê be katora na ai ni Elama, ke oga aporo igê na ramana. Ngaia kani gê visia, inê na Araha.”