Read Kahua JEREMIA 5 Bible Online

JEREMIA 5 - Kahua bible

JEREMIA 5

¹Ai ni Jerusaleme, mu râhia na hinua. Mu bâbâ maninga. Mu bâbâ maremi. Mu garigari igê na mahera ma igê na tavani ni hakuta. Mu girara mu tarahua igê vari na enoni, i koro ma ki oto na parongana ma ki toto suria na Araha? Manga mu tarahua, hoi, na Araha ki page bonotenigi na bagaparongami.

²Igamu kamu vi, vigamu kamu rahesia na Araha, ma kamu hagaparu ma.

³Na Araha ki obanigamu nga, vigamu kamu tototo suria. Ngaia ki hagaitangigamu, ma igamu kamu pe tako. Ngaia ki hagamamasiagagamu, ma igamu kamu usi, vigamu tê viteana. Igamu kamu togeaga ngavê ma kamu usi, vigamu urisi parongami.

⁴Ma inê kê vi ma, vi ngaira ka na enoni ga matareha ma, ga hite. Ngaira ka tupugu renigi na obaniha ma na ramata iana na Araha God iata tangara.

⁵Tahema inê kê râ i pasita na enoni raha, ma kê tamasi tangara. I bâ manga vi ngaira ka giraragi na obaniha ma na ramata iana na Araha God iata tangara. Ma hete i mareha ngavê! Ngaira hato ka bani usitena na Araha, vige hagaotora, ma ka usi, vige tê viteana.

⁶Tahema na laione igê na vapuni ka page ngaura hunira. Na o vasiga igê na masusu ka page ngasira. Ngaira ma na marâ vigana ka page arârâ hekarigi i metara i hinua. Manga na enoni ma ka huhura i metara, ngaira ka page ngasingasi heokeoke renira, suria ga rako na bagatarihata, ma ka ama ni aharê nga.

⁷Na Araha ki hagate, ki vi: “Tanu hega, ki tuguhiê, vigê bonotenigi na tasi iata na kariaku? Ngaira ka bani kasi reniê, ma ka vogasira na ataro, ga mareha vige God. Inê kê hagangêra masu na kariaku, ma ngaira ka gamogamo ma, ma ka tari surira ma na êrâ.

⁸Ngaira ka mangara na hosi mane binibinikaga, ma manemanega ngavê. Na ara ni hitangita ki tenia na gete iana na tamana.

⁹I pe arari vari, vi ve hagaitangira re, se vi ve naka na siva tangara?

¹⁰“Inê be hagatorangenira na meronga tangara na kariaku, hanana ga tapigi erasigi na pariki ni vaini iata, ma siana ka têtê erasigi ngavê. Inê be vi tangara, ke uvegi râ na arani, suria ngaigi ki mareha vi na aniku.

¹¹Na ai ni Isiraele me Juta ka pe toto suriê ngavê. Ngaia kani gê visia, inê na Araha.”

¹²Na enoni ka tamasi kasikasi renia na Araha. Ngaira ka hagaiga, ka vi: “Siana ka magutenia. I asa iana, vige katoa ta na marâ. I asa iana, vige hagamamasiaga apeka. I asa vige tarahugia na hearihatana ma na magêha.

¹³Na poropete ka visigi tangagia na ta? Ngaira ka tamasi ma i harata na guruni na tamasinga. Ge tarahura mareta na marâ, ga visigi!”

¹⁴Tahema na Araha God raramohaga hunia ki tamasi tangê, ki vi: “Jeremia, suria ngaira ka tamasi vikana, hoi, inê be katogi na tamasinga iaku i haramu, ke manga na gi, i page ngaura na enoni ngegana, suria ngaira ka page mangagi na ario.”

¹⁵Na Araha ki vi: “Ai ni Isiraele, inê be hagatorangenira na merongami tangagamu. Ngaira ka page arâ me tenia na agua hagatê, hanana ga taharigamu. Ngaira ka ramoramo, ma na raraha iata ki bani oga me kere vê noga. Na tamasinga iata ki hihitaga. I asa, vigamu rongogiraragi.

¹⁶Na mane ni hananiha iata ka na mane ramo ma ka hanahana hunu.

¹⁷Ngaira ka page ngaugi na mu ma na harisi iami. Ngaira ka page nahuira ka meme na karemi, mane ma na gete. Ngaira ka page ngaura hato na sipi ma na puruka iami. Ngaira ka page erasigi ngavê na pariki ni vaini ma ni fiki iami. Na mane ni me iata ka page ruhuruhugi na hinua nganganihaga, mu hagêguri togo renigi.”

¹⁸Na Araha ki vi tanga o Jeremia, ki vi: “Naka ma i manga ngegana igê na matena ngekana, inê ki asa be mutera hato ngavê na kariaku.

¹⁹Ngaira ka page hagatego, ka vivi: ‘Tanu hega na Araha God iaka ki katogami vikana?’ Gu aramira, ko vivi: ‘Tagenana ma igamu kamu kasi renia na Araha, ma kamu hagahigasira na harasita na enoni getera igê na apanena iami maremi, igamu kamu page hagahigasira nogami na mahuara igê na apanena iata, mareha vi igê na animu maremi.’”

²⁰Na Araha ki vi: “Vi tangara na raraha iana o Jakobo, vi tangara na ani ni Juta:

²¹Karinga, igamu na enoni mu bekabekaga ma kamu bonobonoga. I tonga hagaborâ na maami, ma kamu pe bâbâ. I tonga hagaborâ na karingami, ma kamu pe karinga.

²²Inê nga na Araha be hagategamu. Tanu hega mu pe maguteniê? Tanu hega mu pe tata reniê? Inê kê naka na one na taritarihana na asi. Ma na asi ki asa, vige aharêngia. Na asi ki arobo igê vari, ma ki asa vige banu i bemu. Na hêni ka rongo raha vari, ma ki asa vige mataharia.

²³Ma igamu, igamu kamu togeaga ma kamu guguruga. Igamu kamu murisigeê ma kamu kasi reniê.

²⁴Igamu kamu pe tako ni hagahigasiê, henaka gê hagasivorigi na ngêra iami ma kê hagamaririgi na mu iami igê na mateni tange.

²⁵Surigi na bagatarihami tahema na tarani koro ngegana ka pe tarahugamu.

²⁶“Na mane, ga erataga, ka oga i berarogami, na kariaku. Ngaira ka ahehi hekarigi, mangara na mane ga migiahi na basu tangara na manu. Ngaira ka tutu karira na enoni.

²⁷Ngaira ka bani hagavunusigi na ruma iata renigi na marâ, ga rurugugi, tagenana manga na mane i hanahana manu ma ki hagavunusia na anga iana renira. Ngaira ka hagahagabeka ma ka hanago. Tahema ngaira ka ramo teha ma ka ruruguha.

²⁸Tahema ngaira ka binibinikaga ma ka ape koro. Na bagatauhata ngaira ka aharêngigi na ani mavê na ramata. Ngaira ka pe roherohe pusira na kare banogo ma na enoni, ga matareha, hanana vige nahunigi na marâ, ge oto tangara.

²⁹“Ma inê, na Araha, inê be hagaitangira renigi na bagatarihata ngegana. Inê be naka na siva tangara na enoni ngegana.

³⁰Ta na tarani, ga makitaga ma ka erataga ngavê, ka vora me igê na agua ngekê.

³¹Na poropete ka hagahagaparu ma, ma na mane ni vogasiha ka tê viteata, ma na kariaku ka pe ura pusigi. Manga ngekana ngaira ka page katoa na ta, matena ga votavota?”