Read Kahua JEREMIA 50 Bible Online

JEREMIA 50 - Kahua bible

JEREMIA 50

¹Na Araha ki tamasi tangê renia na hinua raha i Babilone ma renira na enoni igê, ki vi:

²“Hagarongora na enoni hato i maveta. Tarohenia na taroha tangara. Gu hagarari tangara ma ku ramatenia na rongoha. Siana ko munimunia. Babilone ki bani vota! O Maratuku na harasina ki hato. Na harasina i Babilone ka maki ngavê. Na nunuta ka amenamena ngavê.

³“Na ai ni Metia me Pesia ka taharia i Babilone ma ka page ruhuruhua ma ka page hagahirungia. Na enoni ma na togoha iata ma na marâ vigana ka page gava.”

⁴Na Araha ki vi: “Igê na matena ngekana na ai ni Isiraele me Juta ka page arâ me ka angiangi, ma ka page bâbâ reniê inê, na God iata.

⁵Ngaira ka page hagatea na tara tanga i Sione ma ka arâ igê. Ngaira ka page naka na suruheri heniê. Na suruheri ngekê ki asa, vige page hato, ma ki asa iata, vige page aharêngia.

⁶“Na kariaku ka mangara na sipi. Na avanuta ka hagatarupera i toro. Ngaira ka tugupu rârâ igê na hungani ma na barani. Ngaira ka bani bonotenigi na hinua iata.

⁷Na ani, ga tarahura, ka hagavasira. Na merongata ka vi: ‘Ngaira ka haritohea na Araha. Tahema i koro ma, viga nahuira ka meme. Ngaira ka pe toto suria na Araha, na êvarita ka hagêguri togo renia.’

⁸“Ai ni Isiraele, mu gavatenia i Babilone. Mu hagenago kamu pania na marê, manga na goti mane i nanago tarata na goti hehene.

⁹Inê be hagaramonira na me ni Metia me Pesia, hanana ge taharia i Babilone. Ngaira ka page rêra harahara pusia i Babilone, ma ka page henahuraua. Ngaira ka manisingenigi na epage ma na mage, ma ki asa vige atatara.

¹⁰Ngaira ka page rurugua i Babilonia, ma ka page toregi vê na ara ni marâ hato. Ngaia kani gê visia, inê na araha.”

¹¹Na Araha ki vi: “Ai ni Babilonia, igamu kamu bani hagahirungia na marê iaku. Igamu kamu obakoro ma kamu vagevage, manga na puruka ga vagevagesigi na go, mangara na hosi mane ga angiangi.

¹²Ma mu bâ, ga page henahuraua na hinua iami maremi ma ka page hagamakigamu ngavê. Babilonia ki page mameaga ngavê teharigi na agua hato getigi. Ngaia ki page voravora re na masusu, i avagavaga ma ki ngangataga.

¹³I Babilone ki page hihiruga, suria inê kê mangariaga bâraha tanga. Ngaia ki page aruhuruhu. Na enoni hato, ga riri igê, ka page konekone ma ka page kakahuru renia.

¹⁴“Mane ni hananiha, mu ura harahara. Mu ura rihia i Babilone. Hanasia, suria i haritoheê inê na Araha.

¹⁵Mu kasi mamava, suria mu teha. Babilone ki vota! Na para ni hinua ka makumakuruga. Ngaigi ki ahogehoge. Na siva iaku tangara na ai ni Babilone. Mu barua na siva tangara. Mu katogi tangara ngaira na tarani ga katogi tangara na enoni getera.

¹⁶Siana kamu hasihasi i Babilonia. Siana kamu opaopa igê na ngêra. Na mahuara hato igê ka page magutenia na hearihatana ma ka page gava aporo tange i pasita.”

¹⁷Na Araha ki vi: “Na ai ni Isiraele ka mangara na sipi, na laione ga tarigenira ma ka tokorenira. Hagenago na maneraha teha i Asiria ki ngêngê hasihasira, ma hemuri o Nebukanesa na maneraha i Babilonia ki kurukurugi na surita.

¹⁸Tahema inê na Araha God raramohaga huniê iata na Isiraelita, inê be hagaitangia na maneraha o Nebukanesa ma na apanena iana, tagenana manga i nago gê hagaitangia igê na maneraha teha i Asiria.

¹⁹Inê be torera aporo na Isiraelita tanga i pasita. Ngaira ka page ngêngê na ngêra, ga akê igê na hungana i Karamele, i na apanena i Basani. Ngaira ka page ngê masu renigi na ngauha i na apanena i Eperaimi me Gileata.

²⁰I na matena ngekana ki page mareha vê igê na tasi, se vi na eraha i pasita na ai ni Isiraele me Juta. Inê be bonotenigi na tasi iata na enoni, gê hagatahira. Ngaia kani gê visia, inê na Araha.”

²¹Na Araha ki vi: “Taharira na ai ni Merataimi me Pekote. Nahuira ke mute ngavê. Râ suria na tamasinga iaku tangagamu. Ngaia kani gê visia, inê na Araha.

²²Na hearihatana ki manasia na agua ma na ara ni marâ igê ka aruhuruhu.

²³Babilonia ki manga na ekare. Ngaia ki puta menamenaria na maveta hagenani. Ma i ngekê na ekare ki maromo agani. Na agua hato i maveta ka gasuga renia.

²⁴“Babilonia, igo ko meêheariha. Inê kê naka na tu karigo. Igo ko pe hagare, ma igo ko tutu igê.

²⁵Igê na mangariganiha raha iaku inê kê tavogi hura na ara ni tangaruha iaku, suria inê na Araha God raramohaga huniê, kê obania, vigê hagaitangigo, Babilonia.

²⁶“Taharia rihia i Babilonia. Hogegi na ruma ni ngêra igê. Pagepage haku na marâ, mu henahuraugi igê. Ruhuruhua na agua. Hagahirungia ngavê.

²⁷Mutera na mane ni me hato igê. Mu ahurara. Na ai ni Babilonia ki hato iata. I ngekê nga ki na matena ni hagaitangiha tangara.”

²⁸Rongo! Na enoni ka gava me, ka tahi tenia i Babilonia, hanana ga hagarongoa i Jerusaleme, vi na Araha God iaka ki barua na siva tangara na enoni i Babilonia, suria ga ruhuruhua na Ruma ni Rotu iana.

²⁹“Mu hakura na mane ni hananiha, ke taharia i Babilone. Kasira ke râ ngaira hato ga girara ga hanahana. Ura rihia na hinua, hanana siana ta na enoni ki tahitahi. Hagaitangia meni na bagaparongana. Katoa renigi na tarani, i katora re na enoni getera, suria ngaia ki hagarahasia marena, ma ki ruhiê inê na God Apuna iata na Isiraelita.

³⁰Tahema na mane ni me na gapu haoru ka page me. Ma na gahuata ka page tâ totoko surigi na tara ma na mahera i hinua. Ngaia kani gê visia, inê na Araha.

³¹“Inê na Araha God raramohaga huniê, inê kê merongasigo, Babilonia, suria go hagarahasigo maremu bâraha. I ngekê ki na matena iaku, gê hagaitangigo igê.

³²Igo ko paroparo ngavê, ma ko page tapasu ko votavota. Ma ki asa ta na enoni, vige page ragego akê. Inê be sungigi na hinua iamu, ma na agua hagegani ki page makaka.”

³³Na Araha raramohaga hunia ki vi: “Na ai ni Isiraele me Juta ka mamasiaga. Na me ni Babilonia, ga henahuraura, ka ngahisira rârâ ma, ma ka usi, vige nakara vê ke aporo.

³⁴Ma na ani, i page hagatahira, ngaia ki raramohaga ngavê. Na atana ki na Araha raramohaga hunia. Ngaia marena ki page roherohe pusira, hanana na maveta ki page nahunia na marapeha, nga noga ma i Babilonia ki mareha.”

³⁵Na Araha ki vi; “Babilone, ge me! Na enoni igê, ge me! Na maneraha ma na mane tako mataha igê ge me!

³⁶Na poropete ngarangara igê, ge me! Ngaira ka bekabekaga ngavê. Na mane ni me igê, ge me! Ngaira ka bubununuga ngavê.

³⁷Na hosi ma na me igê, ge me! Na kati ni me igê, ge babaro agani! Na mane ni me igê, ga vatevatera, ge me! Ngaira ka mangara na gete. Na ruruguha igê ke hagaerasigi ngavê, ge rurugugi ma ke hanagogi.

³⁸Ge arito ru! Na mako ke avagavaga. Na ve ke mamata. Renia na nunuta na ataro ka aharêsia na marê i Babilonia ka hagamagusira ma ka hagabekasira na enoni igê.

³⁹“Tahema na ataro ma na harasi ka page ogasia i Babilone ma na gorogoro ma na manu ni ngê. Ngaia ki page hihiruga tare, ki bê ki arâ.

⁴⁰Na tarana, i tarahurerua i Sotome me Gomora, matena ga ruhuruhurerua henigi na hinua hagarangirerua, ki page tarahua nikâ i Babilone. Ngaia ki page hihiruga ngavê tare. Ngaia kani gê visia, inê na Araha.

⁴¹“Bâ, na me ni Metia me Pesia ka râ me. Ngaira ka râ me hagatê ma ka raramohaga. Rako na maneraha ka hagarêa na hearihatana.

⁴²Ngaira ka têgi na epage ni me ma na tatapa borahu iata. Ngaira ka hagatavatava ngavê ma ki mareha ngavê, vige hetaki. Ngaira ka tagirira na hosi ni me iata ma ka nagiakuruhi manga na asi i maguhu. Ngaira ka nanê, hanana viga taharia i Babilonia.

⁴³Na maneraha ni Babilonia ki rongoa na rongoha renia ma ki arikuku na apena, suria i nahuia na maguha, manga na haraniha, i tarahua na gete, i harate kare.

⁴⁴Inê na Araha be parama ma be hagavasira na ai ni Babilonia tenia na hinua iata, manga na laione ki parama ma ki vaga me tenia na bemu i akerena na ve i Jotano ma ki taharira na togoha igê na pariki ni go. Na ani inê nga kê atea ngaia kani page marungira. Ti ki maratoraku? Ti ki girara i rêra barasiê? Ti ki girara i hagate susuriê?

⁴⁵Hoi, mu rongoa na katoha iaku renigi na hinua i Babilone ma na enoni igê. Ga page henahuraura na kareta nikâ, ma ngaira hato na enoni ka page bubununuga ma ka page hataera ngavê renigi.

⁴⁶I page rongo raha ngavê na tarana i Babilonia, matena i votavota igê. Na maveta hagenani ki page gisigisi ma na enoni igê na agua getigi ka page rongogi na angiha iata.”