Read Kahua JEREMIA 51 Bible Online

JEREMIA 51 - Kahua bible

JEREMIA 51

¹Na Araha ki vi: “Inê kê page hagatorangenia na roga raha ke nahuia i Babilonia ma na enoni igê.

²Inê be hagatorangenira na ai ni mahuara, ke ruhuruhua i Babilonia, manga na maguara i ahegenigi râ na momo. Igê na bagabevoani ngegana ngaira ka page sugaria igê na ara ni agua ma ka rurugua na agua hagenani.

³Siana kamu naka na matora tangara na mane ni me igê, hanana siana ka hanatenigi na mage iata, se viga ngahingahi pusira mareta. Nahuira nga na mane na gapu haoru. Mutera na ara ni mane ni me hato.

⁴Ngaira ka page mamari ma ka page meme surigi na tara i hinua iata.

⁵Inê na Araha God raramohaga huniê, inê kê pe kasi renira na ai ni Isiraele me Juta, naka ma, ma ngaira ka haritoheê, inê na God Apuna iata.

⁶Gavatenia i Babilonia. Mu gava tange na manavami, i era ma kamu meme, matena na hagaitangiha ki tarahua i Babilonia renigi na bagatarihata na enoni igê. I ngekê inê be barua aporo na siva tangara ma be hagaitangira ararigi na bagatarihata hato.

⁷I nago i Babilonia ki manga na kâkâ na golo i rimaku. Na enoni hato i maveta ka tono igê ma ki aripo na maata. Ngaira ka tonomia na vaini igê ma ka bekabekaga ngavê.

⁸Ma i ngekê i Babilonia ki parama, ma ki vota ma ki aruhuruhu. Mu angiangi maramara renia. Mu baraigi na maara iana ma hanana ga page mavomavo vari.

⁹“Na mahuara, ga oga i ngekana, ka vi: ‘Igia ka uhungia, viga tamania i Babilonia ma ki bani teha na matena, vige tamania igê. Nika, ge râ ke aporo i pasika. God nga kani hagaitangia i Babilonia ma ki ruhuruhua ngavê renia na raramohana.’”

¹⁰Na Araha ki vi: “Na kariaku ka ngere, ka vi: ‘Na Araha ki pane henigia. Nika, ge râ ke hagarongora na ai i Jerusaleme renigi na tauhana na Araha God iaka.’”

¹¹Na Araha ki hagatorangenia na maneraha ni Metia me Pesia, suria ngaia ki kato, viga ruhuruhua i Babilonia. Igê na tarana ngekana ngaia ki barua aporo renia na siva tangara, suria ngaira ka ruhuruhua ngavê na Ruma ni Rotu iana. Na araha ni me, ga taharia i Babilonia, ka ngere tangara na mane ni me iata, ka vi: “Rategi na mage iami. Mu ngahi ma kamu kasi mamava.

¹²Sugaria na para rihuia Babilone. Ge rako na mane ni anumasiha. Nakara na me ke ahi hekarigi.” Na Araha ki hagamonaria na haganunuha iana tangara na ai ni Babilonia.

¹³Ngaira ka ogasigi na berarogani na ve raha ma ka ruruguha ngavê. Ma na matena iata ki hato noga ma ki sugi hato iata.

¹⁴Na Araha raramohaga hunia ki bani tohe renia marena, vi ngaia ki page hagatorangenira rako na mane ni me, hanana viga taharia i Babilonia, manga na ruruha raha ni pê. Ngaira ka page kasikasi mamava, suria ga teha.

¹⁵Na Araha ki hagavora na maveta, suria ngaia ki raramohaga hunia. Ngaia ki hagavora na ano, suria ngaia ki tako mataha ngavê. Ngaia ki gasia na vavearo, suria ngaia ki girara ngavê.

¹⁶Ngaia ki tamasi ma, ma na ve ka vahao i avorana na vavearo. Ngaia ki katogi na marangea igê na roto. Ngaia ki unigi me na tarêheroga tenigi na maani na tangi.

¹⁷Matena na enoni ka bâsigi na tarani ngegana, ngaira ka konekone ma ka tugupu. Na mane, ga tahegi na nunuta na ataro, ka maki, suria na harasita ki asa, vige hagavoregi rârâ ta na marâ. Na harasita ka na marâ ni hagaparunga, na marâ purua ma, ga pe mauri.

¹⁸Ngaigi ki na marâ ni hagarurugana ma. Ige na mateni ni hagaitangiha na Araha ki page hagamagahurugi râ.

¹⁹Ngaira ka pe maratorana na God, na Isiraelita ka rahesia. Ngaia nga ki na ani i hagavorara na ara ni marâ hatohato, ma ki atera na Isiraelita ka vora re na anina. Na atana ki na Araha raramohaga hunia.

²⁰Na Araha ki vi: “Babilonia, igo ka na mata iaku, na tangaruha iaku igê na hearihatana.

²¹Renigo igo inê kê teharigi na agua. Inê kê mutera na maneraha igê. Inê kê nahuira na hosi ni me henira na mane ni me igê. Inê kê kumukumugi na kati ni me henira na mane ni me igê.

²²Renigo igo inê kê nahuira ka me na mane ma na gete, na gemêa ma na enoni haoru, na kere mane ma na kere gete.

²³Renigo igo inê kê nahuira na totoha ni sipi henira na avanuta, na puruka ni tagaraniha henira na avanuta. Inê kê menamenarira na maneraha henira na kariata.”

²⁴Na Araha ki vi: “Igamu kamu page bâsiê, gê barugi aporo tanga i Babilonia ma na enoni igê na ara ni bagatarihata hato tanga i Jerusaleme.

²⁵Babilonia, igo ko manga na barana, i erasia na maveta hagenani. Ma inê nga na Araha inê ka na merongamu. Inê be ranguigo ma be ruhuruhugo so i ano. Inê be sungigo ko makaka.

²⁶Na ruma ma na para iamu ka page aruhuruhu, ma ki asa vige page tagarahigi aporo. Igo ko page hihiruga ngavê tare, ki bê ki arâ. Ngaia kani gê visia, inê na Araha.

²⁷“Kasi mamava ni sugariha. Uhigi na ahuri, hanana na agua getigi ka rongogi. Hagarêra na agua getigi, hanana ge meheariha i Babilonia. Bonasira na maneraha ni Ararata, Mini me Asekenase, hanana ge sugaria i Babilonia. Atea ta na araha ni me, hanana i bêngenia na sugariha. Na hosi ni me ke râ igê na hearihatana, ke râ manga na ruruha ni pê.

²⁸Hagarêra na agua getigi, hanana ge meheariha i Babilonia. Unira me na maneraha ni Metia henira na tamata ma na kariata ma henira na mane ni me hato igê na agua, ga marungigi.

²⁹Na maveta ki angingi ma ki gisigisi, suria inê na Araha kê hagamonaria na katoha iaku, hanana gê ruhuruhua i Babilonia, ki hihiruga.

³⁰Na mane ni me ni Babilonia ka kasia vê na hearihatana ma ka ogasigi ma na ruma nganganihaga iata. Ngaira ka rumakaka, ka mangara na gete. Na maani para na hinua ka ahogehoge. Na gi ki ngêgi na ruma.

³¹Na mane tora tamasinga ka hagarongoa hesurisuri na maneraha ni Babilonia, ka vi, vi na merongana ka hoge ma ka ama hekuru renia na hinua.

³²Na merongana ka ura hagabarasia na tara tarê i ve ma ka sungigi na ruma nganganihaga. Na mane ni me ni Babilonia ka bagatugupu.

³³Na merongata ka sugi nahuira ke me ma ke purira so, mangagi na ngêra ga taketake. Ngaia kani gê visia, inê na Araha raramohaga huniê, ga rahesia na Isiraelita.”

³⁴Na maneraha ni Babilonia o Nebukanesa ki rete vurusia i Jerusaleme ma ki unumia manga na bagahua raha. Ngaia ki rurugua na hinua manga ga karangia na pi. Ngaia ki masu aharêngia renigi na marâ i obanigi ma ki kasigi râ na ani i usitenigi.

³⁵Na ai ni Sione ki ararira, viga vivi: “Na me nga ni Babilonia kani ga nahuigami.” Na ai ni Jerusaleme ki ararira, viga vivi: “Ngaira nga na ai ni Babilonia kani ga hagamamasiagagami.”

³⁶Tahema na Araha ki vi tangara na ai ni Jerusaleme, ki vi: “Inê be rohe pusigamu. Inê be barua aporo na siva tangara na merongami renigi na bagatauhata tangagamu. Inê be hagamamatarigi na ve banga i Babilone ma na ve raha i Babilonia.

³⁷I Babilone ki page aruhuruhu ma na marâ vasiga ma ka page ogasia. Na enoni ka page makimaki tenia ma ka page kakahuru renia. Ngaia ki page hihiruga ngavê.

³⁸Ngaira hato na ai ni Babilonia ka henguruhi mangara na laione ma na kareta ga pasi ngê.

³⁹Inê be hagarêa na magotoha tangara, hanana i aripo na maata ma ka vagevage. Ma i hemuri ka page mauru ma ka mauru tatarê.

⁴⁰Inê be harasira mangara na kareta na sipi se na goti mangara na sipi mane se na goti mane. Ngaia kani gê visia, inê na Araha.”

⁴¹Na Araha ki tamasi renia i Babilone, ki vi: “Babilone, na hinua raha, i rongo raha na atana i maveta hagenani, ka bani henahuraua. Na enoni igê na agua getigi ka makimaki tenia.

⁴²Na ruarua ki banu i Babilone. Na hêni na asi ka arobo huria.

⁴³Na enoni ka makimakitenigi na hinua i Babilonia. Ngaigi ki aruhuruhu. Na agua ki avagavaga ma ki hihiruga. I asa ta na enoni, vige page râ nikâ i ngekana.

⁴⁴Inê be hagaitangia Belo na ataro ni Babilone ma be tavogi aporo tenia na marâ i hanagogi. Na enoni i na agua getigi ki hato, vige page râ nikâ i Babilone, hanana vige vogasia igê. “Na para ni hinua i Babilone ka ahogehoge.

⁴⁵Kariaku, ai ni Isiraele, mu gavatenia. Mu gava tangagi na manavami, suria inê kê mangariaga ngavê tanga i Babilone.

⁴⁶Siana kamu bagahagêguri ma kamu magu, suria mu rongogi na ani mavê na rongoha. Siana kamu tongesurigi. I na ara ni harisi ka akê me tare na rongoha, ga tora hegitigi: na rongoha renia na hearihatana igê na agua, na rongoha renia ta na maneraha, i meheariha tani na maneraha.

⁴⁷Tahema ki sugia ma na matena vi inê be hagaitangira igê na ataro ni Babilone. Inê be hagamakira ngavê na enoni hato igê, suria ga hagêguri togo purua ma renira. Ngaira hato na enoni igê ka page meme.

⁴⁸Na vavearo ma na maveta hagenani karu page ngerengere vagevage, matena na me ni Metia me Pesia ka henahuraua ma ka ruhuruhua igê.

⁴⁹Babilonia ki hagamesira na enoni suria na maveta hagenani, ma i ngekê ngaia ki page vota, suria i hagamesira rako na ai ni Isiraele. Ngaia kani gê visia, inê na Araha.”

⁵⁰Na Araha ki vi tangara na kariana i Babilonia, ki vi: “Igamu kamu bani tahi tenia na mera. Mu râ nga! Siana kamu hagarihu! Naka ma igamu kamu hagatê tenia i pasimi, igamu kamu takusiê, inê na Araha iami, ma kamu takusia aporo Jerusaleme.

⁵¹Igamu kamu vi: ‘Igami kami maki. Ga ruhigami ma ki nahuigami ngavê na makiha, suria na ai ni mahuara ka ogasigi na agua i Ruma ni Rotu iamu, na agua ga apu tangara.’

⁵²Tahema inê kê vi: I sugia ma be hagaerasigi na nunuta na ataro i Babilone ma suria na agua hagenani ka page gegege igê na enoni, ga mamari.

⁵³Henaka manga vi Babilone ma ke akê ngavê i vavearo ma ke tagarahia igê na ruma nganganihaga, inê be hagatorangenira na me, ke ruhuruhua. Ngaia kani gê visia, inê na Araha.”

⁵⁴Na Araha ki vi: “Rongo! Na ai ni Babilone ka angi. Ngaira ka angiangi raha, suria na apanena iata ki aruhuruhu ngavê.

⁵⁵Inê be ruhuruhua i Babilone ma be mutera ngavê. Na merongata ka anuia i Babilone manga na asi i maguhu, ma ka kasi mamava ma ka taharia.

⁵⁶Ngaira ka râ me, hanana viga ruhuruhua i Babilone. Ngaira ka henahuraura na mane ni me igê ma ka barugi na epage ni me iata, suria inê ka na God, gê hagaitangira na ani ga erataga ararigi na bagaparongata.

⁵⁷Inê be hagaitangia i Babilone. Inê be katora ke ruguhira na maneraha igê, na mane igê ga tako mataha, ma na enoni raha ma na mane ni me igê. Ngaira ka page arâ ka mauru, ma ka mauru tatarê. Ngaia kani gê visia, inê na Araha raramohaga huniê, gê marungia i Babilone.

⁵⁸Na para nganganihaga rihuia i Babilone ka page ahogehoge ma na gi ki page ngaugi na maani para raha. Na enoni i maveta ka tagara hagaborâ ma. Ngaira ka tagara raha tanga na ta? Na gi ki page ngaugi na tagaraha iata. Ngaia kani gê visia, inê na Araha raramohaga huniê.”

⁵⁹Igê na heta na harisi o Setekia ki maneraha suria i Juta, ngaia ki râ i Babilonia henia o Seraia, karena o Neria ma vesina o Maseia. O Seraia ki onosurigi na ara ni marâ hato tanga na maneraha. Inê kê hagararigi tani na tarani tanga.

⁶⁰Inê kê bani segegi so igê na buka na ara ni bagabevoani, ga page tarahua i Babilone, henigi na tamasinga hato iaku renia.

⁶¹Inê kê vi tanga o Seraia, kê vi: “Matena go tariha i Babilonia, ki tuguhigo, go tomanigi raha tangara na enoni na ara ni marâ igê na buka ikê.

⁶²Ma hemuri ko nunginungi, ko vivi: ‘Araha, igo ko bani vi, vi igo ko page ruhuruhua na hinua ikê, hanana i baguru ngavê renira na enoni, renira na togoha, ma renira na ani mavê na marâ ga mauri. Ngaia ki page hihiruga ngavê tare, ki bê ki arâ.’

⁶³Seraia, matena go tomania hato na buka ikê tangara na enoni, hoi, go baroa igê na hê ma ko kasia i ve i Uparatesi,

⁶⁴ma ko vivi: ‘Nga hanana ge katoa i Babilonia ngekê. Ngaia ki page kokoro ma ki asa vige page akê aporo, suria ga page tarahua na bagabevoani, na Araha ki page hagaitangia renigi.’” Ikê ki hato igê na tamasinga iana o Jeremia.