Read Kahua JEREMIA 52 Bible Online

JEREMIA 52 - Kahua bible

JEREMIA 52

¹O Setekia ki maneraha i Juta, matena na harisi iana ki tangahuru gi rua matare tage, ma ki marungia i Jerusaleme surigi na tangahuri harisi matare tage. Na atana kenana kani ka Gamutate, ka karena na ani getea o Jeremia. I Libina ka na hinua iana.

²Na maneraha o Setekia ki haritohea na Araha, tagenana manga na maneraha o Jehoiakimo.

³Tahema na Araha ki mangariaga ngavê tangara na ai ni Jerusaleme me Juta, ma ki kasi renira. O Setekia ki guguruga tanga o Nebukanesa na maneraha i Babilonia.

⁴Tahema o Nebukanesa ki merarâ me na mane ni me hato iana, ma ka taharia i Jerusaleme igê na tangahuruta na tangiana igê na tangahuruta na hageha igê na sivata na harisi, o Setekia ki maneraha surigi. Ngaira ka taunga i metara na hinua ma ka rapigi na para rihia na hinua.

⁵Ngaira ka ama ni sugaria nga na hinua, mataro me igê na tangahuri harisi matare tage o Setekia ki maneraha surigi.

⁶Na magêha ki raha teha, ma ki mareha rârâ na ngêra tangara na enoni. Igê na sivata na tangiana igê na heta na hageha igê nga na harisi ngekana na me ni Babilonia ka tahakurugi na para ni hinua.

⁷Henaka vi na me ni Babilonia ka ura rihia na hinua, na ara ni mane ni me iana o Setekia ka gava suria na bungiana. Ngaira ka gava ka aharê igê na mu ni hagamahe rihia na ruma raha iana na maneraha. Ngaira ka hura tenia na maani para, i ratorerua na para gi rua, ma ka gava tanga na maruguna i Jotano.

⁸Ma na mane ni me ni Babilonia ka tarigenia ma ka têa na maneraha o Setekia igê na bena hagarangia i Jeriko, ma na mane ni me hato iana ka gava pania.

⁹Ngaira ka torea o Setekia tanga na maneraha o Nebukanesa, i goga i hinua i Ribila igê na apanena i Hamata. Ma i ngekana o Nebukanesa ki suria igê.

¹⁰I ngekana i Ribila ngaia ki bonasira igê na me iana, hanana ga hagamesira o karena o Setekia. Ngaira ka nahuira i maana. Ngaira ka hagamesira nikâ na enoni raha ni Juta.

¹¹Ma hemuri ngaira ka akarogi na maana o Setekia, ma ka rakua renigi na seni ma ka torea vê tanga i Babilonia. O Setekia ki oga i ruma ni hagaitangiha i Babilone, mataro me ki me igê.

¹²Igê na tangahuruta na tangiana igê na rimata na hageha igê na tangahuru matara na sivata na harisi o Nebukanesa ki maneraha surigi i Babilonia, o Nebusaratana, na mane ni hagaotonga iana na maneraha ma ki araha iata na mane ni me iana, ngaia ki banu i Jerusaleme.

¹³Ngaia ki sungigi na Ruma ni Rotu, na ruma raha iana na maneraha, ma na ruma iata na enoni raha hato i Jerusaleme.

¹⁴Na mane ni me iana ka hogegi na para ni hinua.

¹⁵Ma hemuri o Nebusaratana ki henahuraura na enoni, ga hita so i hinua, henira na ani ga manisingenigi na tagaraha, ma na ani ga bani pane henira na ai ni Babilonia.

¹⁶Ngaia ki panira so i Juta na ani ga matareha ngavê ma ka pe tongasira rârâ ta na marâ, ma ki hagatagarahira igê na pariki ni vaini ma i mu.

¹⁷Na me ni Babilonia ka barugigi na u na kapa na u ni Ruma ni Rotu, ma na kati igê ma na baga apira na kapa. Ngaira ka toregi na ara ni kapa hato tanga i Babilone.

¹⁸Ngaira ka hanagogi vê nikâ na sipeti, ma na marâ ga sinosino rahu hurigi, matena ga maningaia na bea ni vogasiha, ma na marâ ga maningaigi renigi na laiti, ma na apira, i gogogo hurigi na gapu, matena ga vogasi, ma na apira ga susu igê na marâ i sigini koro, ma na ara ni marâ na kapa getegi tanga na hagarahenga.

¹⁹Ngaira ka toregi vê na ara ni marâ, ga tagarahigi renigi na golo se na siliva. Ngaigi ka na kere apira sisite, na apira ni maraha, na apira ni gapu, na apira ni rahu, na atohani na laiti, na apira ni marâ i sigini koro, ma na apira ga karangigi igê na vaini tanga na vogasiha.

²⁰Na maneraha o Solomone ki bani mahatangenigi tanga na Ruma ni Rotu na u gi rua, na kati, ma na baga apira raha, i matare i gerita na nunuta na puruka mane tangahuru matarerua. Na marâ hato ngegana ka tagarahigi renigi na kapa ma ka hihigaga ngavê.

²¹Na u gi rua ngegana karu heavore. Na borahusina na ara ni hitangiterua ki 9 mita. Ngairerua karu raroga ma karu 6 mita hagarabo. Na upupugana na kapa ki 8 sentimita. Igê na ara ni bêterua na u ki oga igê na kapa na boroterua na kapa. Na borahusigaterua ki 1 mita ma na 50 sentimita. Ngairerua karu maremarega ki ruhu ki taku, ma ka tagarahigi igê na marâ ga bâ mangagi na guani na bana,

²³na tangarê gi tage, ma ka bâsigi ma na tangahuru gi siva matara ke ono, matena ga bâbâ hari surigi akê. Na ara ni marâ hato ngegê ka tagarahigi renigi na kapa.

²⁴Ma nikâ o Nebusaratana, na araha iata na mane ni me, ki henahuraura o Seraia na mane raha teha ni vogasiha, mo Sepania na mane ni vogasiha, na ruata tanga, ma na mane gi oru, ga onosuria na Ruma ni Rotu.

²⁵I berarogata na enoni i hinua ngaia ki rakura na araha ni me igê na hearihatana, na vere pi na mane ni hagaotonga iana na maneraha, ga gâga mêngara i hinua, na mane segesege iana na araha ni me igê na hearihatana, i garira na mane tanga na hearihatana, ma na enoni raha tangahuru ge ono tenigi na hinua getegi.

²⁶O Nebusaratana ki torera tanga na maneraha i Babilonia, i oga i hinua i Ribila i na apanena i Hamata.

²⁷I ngekana na maneraha ki bonasira igê na kariana, ka hagatavatavara ma ka hagamesira. Vikê ga henahuraura na ai ni Juta tenia na apanena iata.

²⁸Ikê ngaira hato na enoni o Nebukanesa ki henahuraura. Igê na pita na harisi i maneraha surigi ngaia ki torera vê 3,023 na ai ni Juta.

²⁹Igê na varuta na harisi i maneraha surigi ngaia ki torera vê 832 na ai ni Jerusaleme.

³⁰Matena i maneraha surigi na harisi tangahuru girua matare oru, o Nebukanesa ki torera vê na enoni 745. Ngaira hato ga toma hakura ki vora 4,600 na enoni.

³¹Igê na matena o Evili Merotaga ki vora renia na maneraha i Babilonia, ngaia ki hetaki tanga o Jehoiagino na maneraha ni Juta, ma ki kasia hura tenia na ruma ni hagaitangiha. Na tarana ngekê ki vora me igê na tangahuru matara na ruata na hageha igê na harisi tangahuru gi oru matara na pita na harisi, i murina ga bani henahuraua igê o Jehoiagino.

³²O Evili Merotaga ki koro tanga ma ki hagarahasia teharira na maneraha getera, ga bani henahuraura henia tanga i Babilonia.

³³I ngekana na maneraha ki hagamarumungenia o Jehoiagino, hanana vi i urusia na gahu iata na enoni rakuraku ma ki mebêrihu, mataro me ki me.

³⁴Nikâ ngaia ki naka tani na tarana, hanana vi vatea na kere mena, i ararigi na ogaha iana i na ara ni tangiani, mataro me ki meme.