Read Kahua JEREMIA 6 Bible Online

JEREMIA 6 - Kahua bible

JEREMIA 6

¹Raraha iana o Benamino, mu gava tanga na manavami! Mu gava pania i Jerusaleme! Mu uhigi na ahuri i Tekoa. Mu tanga na gi ni hagararinga i Bete Hagereme. Na eraha, i page erasigi na ara ni marâ hato, ki sugi râ me tenia i Babilonia.

²Na hinua i Sione, i bâkoro ngavê, ngaia ki page aruhuruhu.

³Na maneraha henira na kariata ka page taunga ngekana. Sione ki manga na bena ni go koro era. Na avanu ni sipi ka torera me igê na sipi iata. Ngaira ka page tagarahigi tonganira na ruma ni gahu iata rihia na hinua.

⁴Ngaira ka page vivi: “Nanê! Ke taharia Jerusaleme! Nanê! Ke taharia igê na ritovagana!” Ma hemuri ka vivi: “E, i bani teha na matena. Na tangiana ki sugi hato. Bâ, i borahu na mamaruganiha.

⁵Nanê! Ke taharia igê na bungiana. Ke ruhuruhugi na ruma nganganihaga igê!”

⁶Ngaira ka tamasi vigana, suria na Araha raramohaga hunia ki bani vi: “Tapigi so na apinige. Rapia i Jerusaleme, hanana ga raua. Inê be hagaitangia na hinua ngekana, suria i aharêsia na hagamamasiaganiha.

⁷Na bagatarihata na ai ni Jerusaleme ki manga na ve banga, i ama ni gogogo nga. I ngekana inê ke rongogi ma igê na hearihatana ma na hagamamasiaganiha. I ngekana inê kê bâsigi ma igê na maeha, na maara ma na mera.

⁸Jerusaleme, inê kê haganunugamu, hanana vigamu aitangi. I era ma kê kasikasi renigamu ma kê ruhuruhua na hinua iami, ki manihêga ma ki hihiruga.”

⁹Na Araha raramohaga hunia ki vi tangê, ki vi: “Gu garira maninga na Isiraelita koro, ga hita so mêngara, ma ko hagatahira, manga na mane i garigari maninga na guani na vaini, ga hita so mêngagi.”

¹⁰Inê kê kê hagate, kê vi: “Ti kê hagatarêngenia tanga na tamasinga iamu? Ti ki pasi rongoa? I pungu na karingata! Ngaira ka pe mage ni karinga. Ngaira ka rurusigi ma na tamasinga iamu, gê hagatarêngenigi tangara.

¹¹Araha, inê kê mangariaga ngavê nogaku tangara. Na mangariaganiha ki manga na gi igê na aitangihaku. I asa be hahutogo.” Ma na Araha ki vi tangê, ki vi: “Nakara ma, renia na mangariganiha iaku inê be nahuira na kare igê na mahera ma na enoni haoru igê na tavani hakuta. Na enoni êragi, na mane ma na gete, na meraha ma na gemêa, ka page henahuraura vê ngaira hato.

¹²Na enoni getera ka page raugi na ruma iata, na mu iata, ma na gete iata nikâ. Inê be hagaitangira na enoni i na agua ngekê.

¹³Ngaira hato, na enoni raha, na enoni purua ma na kare, ngaira ka vanasigi ma na haga, ma ka ravarava haga. Na poropete ma na mane ni vogasiha nikâ, ngaira ka hagabekasira na enoni.

¹⁴Ngaira ka pe râ surigi maninga na tagaraha iata. Ngaira ka vi ma, vi na maara iata na kariaku, ki manga na kere garogaroha ma. Ngaira ka vi, vi ngaira ka koro era vê, ma ka vi, viga râ surigi maninga na mani tarani. Ma hete i mareha ngavê!

¹⁵Ngaira ka maki vari, matena ga katogi na tarani, ga era ngavê? Mareha! Ngaira ka pe maki surigi. Ngaira ka hitenia ngavê na makiha. Tahema ngaira ka page votavota tatage, igê na matena gê page hagaitangira igê. Ngaira ka page hatohato hagetage. Ngaia kani gê visia, inê na Araha.”

¹⁶Na Araha ki vi tangara na kariana, ki vi: “Mu bâbâ tarami. Mu takotako maninga. Mu hagategami so maremi. Na uvarimi ka râ bâ hega? Na tara ta ki koro? Mu arâ suria, ma hanana mu page gâga igê na ramana.” Ma ngaira ka vi: “Mareha. Igami kami usi.”

¹⁷Ma hemuri na Araha ki kasira na mane ni anumasiha, hanana viga hagananêra na kariana. Ngaia ki vi tangara, ki vi: “Mu karinga na ringena na ahuri ni hagananêha.” Ma ngaira ka vi: “Mareha. Igamu kami usi.”

¹⁸Tahema na Araha ki vi: “Igamu na enoni getegamu i maveta, mu karinga, hanana mu giraragi na tarani, ga page tarahura na kariaku.

¹⁹Maveta hagenani, gu rongo! Inê be hagaitangira na kariaku ngegana renigi na bagatarihata, suria ngaira ka usitenigi na hagesuringa iaku ma ka aharêngegi na ramata iaku.

²⁰Inê ki asa be aganarira, matena ga susu tangê renigi na marâ ga sigini koro, ga vurigi me i Seba se i na agua hagatê. Inê ki asa be aganarira, matena ga susu tangê. Inê ki asa be vagevagesira, matena ga vogasiê.

²¹Tahema inê be katora, ke tapasu ma ke vota. Ngaira hato ka page me: na enani kare henira na kareta, na enoni hato henira na tamata.”

²²Na Araha ki vi: “Na me ka râ me tenia i Babilonia. Ngaira ka râ me hagatê, ga rako ma ka ramo teha, ma ka hagarêa na hearihatana.

²³Ngaira ka migirâ me na epage ni me ma na tatapa borahu iata. Ngaira ka katogi na hagamamasiaganiha, ma ki asa hagetage vige hetaki. Ngaira ka hebungi, manga na asi i arobo, matena ga râ me igê na hosi ni me iata. Ngaira ka nanê, hanana viga taharia Jerusaleme.”

²⁴Na ai ni Jerusaleme ka vi: “Igami kami bani girara na rongoha. Igami kami bubununuga ma kami tugupu. Na anumanumaha ma na mamasiaganiha ka tarahugami. Igami kami manga na gete i harate kare.

²⁵Igami kami magu, vigami râ i bemu se igê na tara, suria na merongamami ka tangaru ka têgami me ma ka oga rihigami.”

²⁶Na Araha ki vi tangara na kariana, ki vi: “Mu hagesuru tatari. Mu hurihuri igê na rahu. Mu angi maramara ngavê, mangarerua na enani kare garu angisia o kare i tage iaterua. Na merongami ka page hagakakangi me ka taharigamu, ma ka page hagaerasigamu ngavê.

²⁷“Igo Jeremia, gu uhungira na kariaku, ma ku hagakitakitara, vi ngaira ka bâ mara ta.

²⁸Ngaira ka guguruga, ka togeaga, ma ka parisihêga ngavê. Ngaira hato ka bagatarihata, ma ka hagatoraira na enoni.

²⁹Naka ma na gi raramohaga ngavê, ngaia ki asa, vige hagamatarotaroa na siliva. Inê kê hagamatarotarora ma hagaborâ na kariaku, suria na ani ga era ka pe râ tenira na ani ga koro.

³⁰Ga page visira vi na momogani, suria inê nga na Araha kani gê usitenira.”