Read Kahua JEREMIA 7 Bible Online

JEREMIA 7 - Kahua bible

JEREMIA 7

¹Na Araha ki tamasi tangê, ki vi:

²“Jeremia, gu râ ku ura i maa ni Ruma ni Rotu, ma ko vi tangara na ai ni Juta, ko vivi: Igamu, na ani mu bêbanu ikê, hanana mu rahesia igê na Araha, mu karinga na tamasinga iana na Araha.

³Na Araha God raramohaga hunia, na Isiraelita ka rahesia, ngaia ki tamasi vikê tangagamu: Mu urisi parongami, hanana mu gâga tare ikê.

⁴Siana kamu gahe surigi na tamasinga hagaparu. Siana kamu vi, ‘Igia ka asitatara. Bâ, na Ruma ni Rotu iana na Araha ikê! Bâ, na Ruma ni Rotu iana na Araha ikê! I asa ta na marâ, vigê page erasigia. Bâ, na Ruma ni Rotu iana na Araha ikê!’”

⁵Mu urisi parongami hete. Mu hagahigasigamu heri igê na otoha.

⁶Siana mu hagamamasiagara na mahuara, na kare banogo ma na gete na nâ. Siana kamu nahuira ka meme ikê na enoni, ga oga suri parongata. Siana kamu vogasira na harasita na enoni getera, hanana vi pe tarahugamu na eraha.

⁷Manga mu urisi parongami, inê kê nakagamu, kamu gâga tare igê na marê ikê, na marê gê bani haganahunira na uvarimi renia, ka nahunia gatagata.

⁸“Bâ, igamu kamu hagêguri togo hagaborâ ma renigi na hagaparunga.

⁹Igamu kamu hanago, mu nahunahu enoni, mu gamogamo, mu tohetohe vero, mu susu tanga o Bala na ataro, ma kamu vogasira na ataro, mu pe bani girarara me i nago.

¹⁰Na tarani ngegana inê kê usitenigi ngavê. Henaka, igamu kamu banu me ikê, i maaku, i Ruma ni Rotu iaku mareku, ma kamu vi, ‘Igia ka asitatara!

¹¹Mu takusia vari, vi na Ruma ni Rotu ki na ahiahi iata na enoni, ga hanago? Inê kê bani giraragi na bagatarihami.

¹²Mu râ i Silo, na agua ga rahesiê igê hagenago, ma kamu tarahua i aruhuruhu, suria gê hagaitangia renigi na bagatarihata na kariaku na Isiraelita.

¹³Igamu kamu aharê igê na tarani hato ngegana. Henaka gê ama ni ramonigamu nga, ma igamu kamu usi, vigamu tê viteaku. Inê kê unigamu, ma igamu kamu pe aramiê.

¹⁴Tahema na tarana, gê katoa renia i Silo, inê kê page katoa renia nikâ na Ruma ni Rotu iaku ikê, mu hagêguri togo renia. Na tarana, gê katoa renia i Silo, inê kê page katoa renia na agua nga ikê, gê haganahunigamu renia, igamu ma na uvarimi.

¹⁵Inê be kasi hagetage renigamu mangara na goami na ai ni Isiraele. Ngaia kani gê visia, inê na Araha.’”

¹⁶Na Araha ki vi: “Jeremia, siana ko nungiê, vi ve tamanira enoni ngegana. Siana ko hagatarêngenigi tangê na hagagegeha ma na avaravaraha iata. Siana ko roherohe pusira. I asa hagetage be aganarigo.

¹⁷Go pe bani giraragi vari na tarani, ga katogi surigi na hinua i Juta ma surigi na tara i Jerusaleme?

¹⁸Na kere kare ka papapa ario. Na mane ka tangatanga na gi. Ma na gete ka hahagi na bereti, hanana ga vogasia re na ataro hehene, ga hêtana vi ‘Araha ni Vavearo’. Ngaira ka vogasira nikâ na ataro getera renia na vaini, hanana ga hagaera obaku renia.

¹⁹Ngaira ka hagaera obaku inê vari? Mareha. Ngaira mareta hete, ma ka maki re.

²⁰Tahema inê, na Araha God, kê page mangariaga ngavê tanga na agua hagenani ikê: tangara na enoni ma na totoha hato iata, tanga na Ruma ni Rotu, ma tangagi nikâ na apinige ma na ngêra. Na mangariganiha iaku ki page manga na anguruna na gi, i ngatongato tarê.’”

²¹Na Araha raramohaga hunia, na Isiraelita ka rahesia, ki vi: “Kariaku, mu ngêgi maremi na ara ni ganiani hato, na ani mu susu tangê renigi ma na ani mu vogasiê renigi. Mu ngê vê igamu! Inê kê usitenigi!

²²Matena gê torera hura na uvarimi tenia i Esipito, inê kê pe bonasira, hanana vige susu tangê, se vige vogasiê renigi na ganiani.

²³Ma kê bonasira hete, hanana viga têtê viteaku, hanana vi inê kê voravora re na God iata, ma ngaira ka voravora re na kariaku. Inê kê bonasira, ka marupegi na ramata iaku, hanana viga nahunia na ramana.

²⁴Ma ngaira ka haritohe ma ka guguruga. Ngaira ka ama ni nga togeaga ma ka râ suri barisuta mareta. Ngaira ka ama ni era ngavê nga, teharia vige koro hete.

²⁵Haganega tenia na matena na êvarimi ka hura tenia i Esipito, mataro me i ngekê nga, inê kê ama ni hagatorangenira nga me na kariaku na poropete tangagamu.

²⁶Ma ki henaka, ma na ara ni hitangimi ki haritohe ma ki guguruga. Igamu kamu togeaga ma kamu era ngavê teharira na uvarimi.

²⁷“Hoita, Jeremia, gu hagarongora na kariaku renigi na tarani ngegana, naka ma ngaira ka pe karingago. Igo ko page unira, ma ngaira ki asa, vige page aramigo.

²⁸Go vi tangara, vi ngaira ka na enoni ga pe tê viteaku inê, na Araha God iata, ma ka usi, vi inê be hagaotora. Na totosuriha ki bani magahuru vê. Na enoni ka bani hitenia vê!

²⁹“Ai ni Jerusaleme, mu angi maramara. Mu goro bê hurigamu, ma kamu kasigi râ na varehumi. Mu kiria na ki ni bagiha ni nuni igê na boteni na hungani, suria inê nga na Araha kani gê mangariaga ma kê kasi renigamu na kariaku.

³⁰“Na ai ni Juta ka bani katoa i maaku na tarana i era ngavê. Ngaira ka nakagi na nunuta na ataro i Ruma ni Rotu iaku, ma ka erasia ngavê.

³¹I maruguna i Hinome ngaira ka tagarahia igê na bea ni vogasiha, ga hêtana vi na Ngêsu, hanana ga susu igê tanga na ataro renira na kareta, mane ma na hehene. Inê kê pe bonasira vikana. Inê kê pe takusia nikâ vikana.

³²Ma i ta na matena ka page urusia igê na ata ga visia vi Ngêsu se Maruguna i Hinome, ma ka page hêtana renia vi na Maruguna ni Nahu Hunu. Ga page bêbagi nuni i ngekana, suria i mareha vi tagua râ nikâ.

³³Na gahuata ka voravora re na ngêra iata na manu ma na marâ vasiga i bemu. Ma ki mareha na enoni, hanana vige tarigenira râ panigi.

³⁴Na agua hagenani ki page bâ manga na hiru, suria inê kê page hagahatungigi na ki ni vagevageha, na ki ni hagatakuha ma na mâha surigi na ara ni hinua hato i Juta ma igê na mahera i Jerusaleme nikâ.