Read Kahua JEREMIA 8 Bible Online

JEREMIA 8 - Kahua bible

JEREMIA 8

¹“I na matena ngekana ka page arahigi na surita na enoni, na surita na maneraha ma na enoni raha i Juta, na surita na mane ni hagarahenga ma na poropete, ma na surita nikâ na enoni getera hato, ga bani oga i Jerusaleme.

²Ga page tokorenigi na surita na enoni ngegana tangagi na arito, na hageha ma na higu, suria ngaira ka hagarapegi, rahesigi, ka matu tangagi ma ka vogasigi. I asa vige page ruguni aporo na surita, hanana vige ahunigi aporo. Ngaigi ki tâtâ so ma mangagi na ae, ga hagakorogi renigi na mu.

³Na hitangita na enoni era ngegana, ga hita so igê na agua, gê tokorenira igê, ngaira ka page obania viga meme, hanana vi siana ka mauri. Ngaia kani gê visia, inê na Araha raramohaga huniê.”

⁴Na Araha ki vi tangê, ki vi: “Jeremia, go tamasi tangara na kariaku, ko vivi: Manga ta na enoni, ma ki votavota, ki hega, ngaia ki page aharaga aporo vari? Manga ta na enoni, ma ki hagatasia na tara, ki hega, i asa vari vige aporo?

⁵Kariaku, tanu hega kamu murisigeê, ma kamu pe ahariê? Igamu kamu tênganira na harasimi, ma kamu usi, vigamu toto suriê.

⁶Inê kê kakaringagamu maninga, ma kê tarahua, vi igamu kamu hagahagaparu ma. I mareha na hitangimi, vige tangahuria renia na bagatauhana, se vige vi, ‘E, inê kê tasi.’ Igamu hato kamu râ suri barisumi maremi. Igamu kamu mangara na hosi ni me, ga tangotango tanga na hearihatana.

⁷Nakara mavê, na amaka ma na parenga, ngaira ka girara na matena, ga arâ me igê, ma na matena, ga aporo igê. Ngaira ka râ surigi na ramata iaku tangara. Ma igamu, na kariaku, igamu kamu tugupu, vi na ta ki tuguhigamu.

⁸Tanu hega igamu kamu vi, vi igamu kamu tako mataha ma kamu giraragi na ramata iaku? Bâ, na mane segesege iami ka hagahagaparu ma ka bani urusigi ma ka bani horohorogi na ramata.

⁹Na mane tako mataha iami ka maki, ka tako tugupu ma ki bara tangara. Ngaira ka bani usitenigi na tamasinga iaku. I manga i he kani ga girara, vi ngaira ka tako mataha?

¹⁰Tahema inê be haganahunira na enoni getera renigi na mako iata ma na gete iata tangara na mane getera. Ngaira hato, na enoni raha ma na enoni purua, ka hagahagaparu, suria ga vanasigi bâraha na haga. Na poropete ma na mane ni vogasiha nikâ ngaira ka hagahagaparura na enoni nogata.

¹¹Ngaira ka pe gagêmaga renigi na tagaraha iata. Ngaira ka vi, vi na maara iata na kariaku ki na kere garoha purua ma. Ngaira ka vi ma, ‘Na ara ni marâ ka koro ma.’ Ma hete mareha ngavê!

¹²Kariaku, igamu kamu maki surigi vari ka na bagatarihami? Mareha vê! Igamu kamu pe girara, vigamu maki! Hoita, igamu kamu page vota, na ara ni hitangimi. Inê be hagaitangigamu nga! Mu page hato! Ngaia kani gê visia, inê na Araha.

¹³“Inê na Araha, inê kê obania, vigê hagahakura na kariaku manga na enoni i opaopa kiru na harisi. Ma ngaira ka manga na vaini, i robo re varona, manga na apinige na fiki mane, i mêgu na ahani. Tahema inê kê nakara na merongata, ka parênia tenira na apanena iata.”

¹⁴Na kariana God ka hehagateri, ka vi: “Na ta ka migioga ikê? Nika, ge tabegi na hinua nganganihaga, hanana ge me igê. Na Araha God iaka ki bani surigia, hanana viga meme.

¹⁵Ngaia ki kuasigia renia na ve, i vategia, suria igia ka pe tê viteana.

¹⁶Na merongaka ka tariha me noga igê na hinua i Tane. Igia ka rongora noga na hosi iata, ga nagia kuruhi. Na agua hagenani ki angingi, matena ga angiangi na hosi mane. Na merongaka ka râ me, hanana viga hagaerasigi na apanena iaka ma na ara ni marâ hato igê.”

¹⁷Na Araha ki vi: “Bâ, inê kê hagaguhira na ma tangagamu, na ma na gara hunu, i asa vige hagamanatara. Ngaira ka page garegamu.”

¹⁸Na hetakiha iaku ki asa, vige page hato. Na aitangihaku ki hata era ngavê.

¹⁹Rongo! Suria na agua hagenani na kariaku ka avaravara, ka vi: “Na Araha ki mênga vari i Sione? Na maneraha i Sione ki gâga mênga i ngekana vari?” Na Araha, i marungira, ki arami, ki vi: “Renia ta kamu hagamangariê? Tanu hega mu vogasira na nunuta na ataro ma kamu hagarapera na harasita na enoni getera, i asa vige tamanigamu?”

²⁰Na enoni ka ngere, ka vi: “Igami kami bani opaopa na harisi. Na matena na arito ru ki bani hato. Ma igami ki mamênga, vigami tahitahi.”

²¹Na aitangihaku ki mamasiaga ngavê, suria ga mamasiaga ngavê na kariaku. Inê kê gegege ma kê anumanuma ngavê.

²²I hato vari na meresini i Gileata? Na mane mangata ki pe goga vari i ngekana? Tanu hega na kariaku kani ga pe komaga aporo?