Read Kahua JEREMIA 9 Bible Online

JEREMIA 9 - Kahua bible

JEREMIA 9

¹Na bêku ke manga na ve banga. Ma na maaku ke manga na ve pusupusu, hanana gê ama ni angisira nga surigi na bungiani ma na tangiani na kariaku, ga bani nahuira ka me.

²Manga ve nahunia tagua igê na masusu, hanana ve oga igê, vikê inê be râ panira na kariaku. Ngaira hato ka pe toto hesuri. Ngaira ka na me ni nuni ni hagaparunga.

³Na Araha ki vi: “Na hagaparunga ki angarira na kariaku. Na meata ki mangagi na epage. Na tamasinga iata ki mangagi na mage. Na hagaparunga iata ki aharêsia na marê, mareha ngavê na monariha. Ngaira ka ama ni era nga, mataro me ka erataga ngavê. Ngaira ka usiteniê, inê na Araha.

⁴I koro, ko hinarua na tamamu, i koro tangago. Tanga na goamu, siana ko gahe suria, suria na goamu ka girara ga hagabekasigo, ma na tamamu koro ka girara ga hagatoraigo.

⁵Na ara ni enoni ki hagaparura na tamana. Mareha tani vige tamasi monari. Ngaira hato ka barobaro i bêta i na ara ni matena ga tamasi. Ngaira ka tasitasi tare, ma ki asa ngavê, vige tangahurira.

⁶Na hagamamasiaganiha ma na hagaparunga ka aharêsira ngavê. Ngaira ka usiteniê inê. Ngaia kani gê visia, inê na Araha.”

⁷Tahema na Araha raramohaga hunia ki vi: “Inê be hagakorora na kariaku, manga ga hagamatarotarogi na golo renia na gi. Inê be uhungira. Ma vi na tarana ta nikâ tangara na kariaku?

⁸Ngaira ka hagahagaparu tare. Na meata ki mangagi na mage ni hana hunu. Ngaira hato ka meratamasi bâbâkoro ngavê na tamata, ma igê na aitangihata ngaira ka katogi na etu tangara.

⁹I hega, gê pe hagaitangira vari renigi na tarani ngegana? I hega, gê nakara ma vê vari ka na enoni ngegana? Ngaia kani gê visia, inê na Araha.”

¹⁰Inê kê vi: “Inê be angisigi na hungani, ma na bena ni go nikâ, suria ga marama, ma nikâ na ve igê na masusu, ga mamata. Ma ki mareha rârâ ta na enoni, vige kahu arâ nikâ igê. Ngaia ki mamangu raha renira na na puruka ma na sipi. Na manu ma na marâ vasiga i bemu ka bani gava ma ka mutemute vê.”

¹¹Na Araha ki vi: “Inê be ruhuruhua Jerusaleme, ke vora re na agua iata na o vasiga. Na hinua i Juta ka page ahoge ma ka page hihiruga.”

¹²Inê kê hagatea na Araha, kê vi: “Renia ta na agua ki aruhuruhu ma ki avagavaga manga na manihê, ma ki mareha rârâ ta na enoni, vige kahu arâ nikâ igê? Ti ki girara i aitangisia na tarana i manga ngekana? Ti ko ramatenia tanga, hanana vi girara i hagarongora na enoni getera renia?”

¹³Na Araha ki arami, ki vi: “Na tarana ngekê ki vora me, suria na kariaku ka haritohegi na ramata iaku. Ngaira ka pe tê viteaku hete, ma ka guguruga tangê ma.

¹⁴Ngaira ka togeaga, ma ka vogasigi na nununa o Bala na ataro surigi na tauhata na êvarita.

¹⁵Hoita, gu karinga na katoha iaku, inê na Araha God raramohaga huniê iata na Isiraelita. Inê be hagangêra na kariaku renigi na rauga ni mera, ma be hagatunumira renia na ve ni mera.

¹⁶Inê be tokorenira tangagi na agua getigi, ngaira ma na êvarita ka pe hagaregi rârâ. Inê be hagahakura na merongata, ke meraheariha, mataro me ke mutemute.”

¹⁷Na Araha raramohaga hunia ki vi: “Takotako! Unira me na gete, hanana ge angiangi maramara ma ke kirigi na ki ni bahiha ni nuni.”

¹⁸Na enoni ka vi: “Ge rêrête me na gete, ke angiangi maramara tangagami, mataro me kami variangiga ma ke usu na tavoni na maamami.”

¹⁹Rongo! Na ai ni Sione ka angiangi, ka vi: “Igia ke tê tara! Igia ka mu tenia i pasika. Na ruma iaka ka aruhuruhu. I nahuigia na makiha.”

²⁰Inê kê vi: “Kegamu, rongoa na Araha! Karingagi maninga na tamasinga iana. Hagesurira na karemi, ke angiangi maramara. Hagesurira na tamami, ke kirigi na ki ni bahiha ni nuni.

²¹Na mera ki banu me igê na ara ni mabaha hato ma ki ogasigi na ruma iaka. Ngaia ki hagamesira na kare i metara ma na mane haoru igê na mahera.

²²Na gahuata ka tâ totoko mangagi na ae igê na maniae, mangagi na rauga, ga retegi, ka tâ suri parongani. Ngaia kani visia na Araha.”

²³Na Araha ki vi: “Na enoni tako mataha siana ka parunira renigi na takoha mataha iata. Na mane ramo siana ka parunira renigi na raramohata. Na enoni ruruguha siana ka parunira renigi na ruruguha ma na nahuninga iata.

²⁴Manga ta na enoni, ma ki obania vi tamasi paroparo, ki tuguhia, i tamasi paroparo, suria hete vi ngaia ki aitangisiê, ma ki girarê, vi inê nga na Araha, ga aharêsiê ngavê na takuiha, na otoha ma na koroha. Na enoni i katokato vikana, ngaia nga kani hagakoro obaku. Ngaia kani gê visia, inê na Araha.”

²⁵Na Araha ki vi: “Ta na matena inê kê page hagaitangira igê na enoni hato, ga retegi na gavoni na varata, ma ka pa têtê viteaku.

²⁶Ngaira ka na ai ni Esipito, me Juta, me Etome, me Amone, me Moaba, ma na enoni hato igê na bagamasusu raha, ga tapurigi na bêta. Ngaira hato ngegana ka pe tê viteaku, ma na Isiraelita ka tagenata vê henira, suria ga pe râ suria na suruheri iaku henira.”