Read Kahua ANGIHA MARAMARA 1 Bible Online

ANGIHA MARAMARA 1 - Kahua bible

ANGIHA MARAMARA 1

¹Jerusaleme ki hihiruga ngavê. I nago na enoni ka aharêsia ngavê, ma na enoni hato i maveta ka hagahigasia, suria ngaia ki ramo teharigi na hinua hato. Ma i ngekê ngaia ki manga na gete na nâ ma na enoni igê ka na kare rakuraku.

²Na ara ni bungiani ngaia ki angiangi. Na tavoni na maana ka gogogo vota i parina. I mareha rârâ ta na tamana, vige haganaku parongana. Ngaira hato ka bani pane tanga ma ka merongasia i ngekê.

³Ga bani henahuraura na ai ni Juta. Ngaira ki bara tangara. Ngaira ka oga mamahuara i na agua getigi, ma ki asa tangara, vige nahunia na kere mamaroha. Ngaira ka oga i ruguhata na merongata, ma ki asa iata, vige gava tenira.

⁴Na tara tanga i Sione ka kahu mangumanguaga ngavê, suria i mareha ngavê ta na enoni, vige kahu arâ tanga na vogasiha igê na tangiani raha ni rotu. Na mane ni hagarahenga ma na kare viru ka angiangi ma ka gegege. Na maani para ni hinua ka bagubaguruga. Sione ki hatamia ngavê na mamasiaganiha.

⁵Na merongana ka taharia ma ka vagevagesia na ramana. Na Araha ki hagaitangia meni na bagaparongana. Na merongana ka henahuraura na kare igê ma ka bugurenira ka torera vê.

⁶Na bâkorohana Jerusaleme ki bani hato. Na maneraha igê ka mangara na goti, ga magê, suria i marehasira na go. Ngaira ka mameaga ngavê, matena ga gavagava tenira na mane, ga hagavasi renira.

⁷Jerusaleme ki hihiruga ma ki aruhuruhu. Ngaia ki takusia aporo na bâkorohana i nago. Ngaia ki pe tarahua rârâ na hetamaniha, matena na merongana ka henahuraua. Na merongana ka manavatenia, ma ka memarabe, suria i vota.

⁸Jerusaleme ki tasi bâraha ngavê. Tahema ngaia ki tongotongoga. Na ani, ga bani hagahigasia, ngaira ka kahu ruhia, suria ga bâsia i rupaturi. Ngaia ki gegege ma ki nahuia ngavê na makiha.

⁹Na tongo ka gahuigi na gahu iana, ma ngaia ki pe marâ era re na apena. Ngaia ki vota erasia ngavê. Ki mareha na ani, vige haganaku parongana. Ngaia ki avaravara, ki vi: “Araha, na merongaku ka tehariê. Gu tako reniê igê na mamasiaganiha iaku.”

¹⁰Na merongana ka hanagogi na ara ni ruruguha hato iana. Ngaia ki bâsira na enoni ahuroto, ga banu igê na na Ruma ni Rotu, na Araha ki manimania tenira.

¹¹Na ai ni Jerusaleme ka gegege bâraha, matena ga tako tugupu, vi na ta ka ngaugi. Ngaira ka hohoro na ngêra renigi na haga mora iata, hanana vi siana ka mesi magêha. Na hinua hagenani ki avaravara, ki vi: “Araha, na merongamami ka ruhigami. Gu tako renigami igê na mamasiganiha iamami.”

¹²Jerusaleme ki ngirira na enoni, ga hetaratarari igê. Ngaia ki vi: “Mu bâ! Ti ki hatamia na mamasiganiha raha manga inê? Na Araha ki hagamamasiagagê igê na mangariaganiha raha iana.”

¹³Tenia na vavearo na Araha ki kasia me na gi, i ngaugi na hasigoku ki tariha igê na suriku. Ngaia ki tu kariê, ma inê kê tu igê. Ngaia ki paniê so, ma inê kê mamasiaga tare.

¹⁴Na Araha ki ruguni haku na tasi hato iaku, ma ki hugusigi haku ki vora na ehogo ma ki naka i gaparaku. Na higahigana ki higeê, ki meme bâraha na apeku. Na Araha ki mahatangeniê tangara na merongaku, ma ki bara tangê, vi na ta be katoa.

¹⁵Na Araha ki mamanatenira na mane ni me ramo iaku. Ngaia ki kasira na mane ni me, ka mutera ngavê na mane na gapu haoru iaku. Ngaia ki piringira so na kariaku, mangagi na guani na vaini ga piringigi igê na rusi.

¹⁶Tahema inê kê angiangi bâraha. Na tavoni na maaku ka gogogo rârâ. Ti ki girara i haganaku parongaku? Ti ki girara i hagamuniê? Na merongaku ka tehariê. Na kariaku ka bagahagêguri.

¹⁷Inê kê avaravara, ma ki asa ta na enoni, vige tamaniê. Tenigi na ara ni agua rihiê na Araha ki unira me na merongaku, ka ruhiê, manga vi inê ki na marâ i mamêkuga.

¹⁸Ma na Araha ki oto na parongana, suria inê kê haritohea. Igamu na enoni i maveta, mu karingê! Bâ, inê kê mamasiaga bâraha. Na merongaku ka bani henahuraura na kariaku na gapu haoru, na mane ma na gete.

¹⁹Inê kê avarasira na tamaku, ma ngaira ka hagaparu, viga tamaniê. Na mane ni vogasiha ma na enoni raha ka mesi magêha i hinua, matena ga garigari ngêra, hanana viga mauri re.

²⁰Araha, gu takuiê. Inê kê mamasiaga ngavê. Na takoha raha ki nahuiê. I erataga ngavê na aitangihaku, suria inê kê haritohego ngavê. I metara ki ramo na nahunga ni nuni, ma i raroni na ruma ki oga igê na mera nikâ.

²¹Araha, gu karingê, gê gegege. Mareha ta na enoni, vige haganaku parongaku. Na merongaku ka manavateniê, suria igo ko hagaitangiê renia na bagabevoana. Na tangiana ni hagaitangiha, go bani surua, ke tarahura nga i ngekê. Ke mamasiaga manga inê!

²²Gu ranganigi na bagatarihata hato. Gu hagaitangira tagenana manga go hagaitangiê inê meni na bagaparongaku. Inê kê gegege renigi na mamasiaganiha iaku. I marusi agani na apeku.