Read Kahua ANGIHA MARAMARA 2 Bible Online

ANGIHA MARAMARA 2 - Kahua bible

ANGIHA MARAMARA 2

¹Na Araha ki rotosia i Sione, suria i mangariaga bâraha tanga. Ngaia ki ruhuruhua na hinua, i rongo raha na atana. Ngaia ki pania nikâ na Ruma ni Rotu iana igê na tangiana ni mangariaganiha raha iana.

²Na Araha ki mutera na ara ni hinua i Juta. Ngaia ki mareha vige hetaki. Ngaia ki hogegi na ruma nganganihaga. Ngaia ki hagamakira na maneraha ma na tamata.

³Igê na mangariaganiha raha iana ngaia ki hatungigi igê na raramohata na Isiraelita. Ngaia ki usi, vige tamanigami, matena na merongamami ka taharigami. Na mangariaganiha raha iana tangagami ki manga na anguruna na gi, i hagamakakagi na arâ ni marâ hato.

⁴Ngaia ki hanasigami, manga vi ngaia ki na merongamami. Ngaia ki mutera hato na ani ga manatangenigami. Igami i Jerusaleme kami hatamia na mangariaganiha iana, i manga na gi, ga meria hurigami.

⁵Na Araha ki manga na merongamami. Ngaia ki ruhuruhua i Isiraele. Na ruma raha ma nganganihaga ka aruhuruhu. Ngaia ki hagamamasiagara na ai ni Juta. Ngaira ka ama ni gegege nga, ma ka ama ni angiangi maramara nga.

⁶Ngaia ki kumukumugia na Ruma ni Rotu iana, na agua mi rahesia igê. Ngaia ki hogea manga na ruhu. Ngaia ki hatungigi na tangiani raha ni rotu ma na Tangiani ni Mamaroha nikâ. Igê na mangariaganiha raha iana ngaia ki usitenira igê na maneraha ma na mane ni vogasiha.

⁷Na Araha ki kitakita na bea ni vogasiha iana ma ki mu tenia na Ruma ni Rotu iana. Ngaia ki hagamarumungenira na merongamami, ka hogegi na apê igê. Suria ga teha, ngaira ka kasi mamava igê na Ruma ni Rotu, mi rahesia ma kami vagevagesia igê.

⁸Na Araha ki togeaga, ki hogegi na para ni hinua i Sione, hanana ga aruhuruhu na para ma na bebetehe igê. Ngaia ki pe makuku.

⁹Na maani para ka makomo agani i ano. Na raburini ka babaro agani. Na maneraha ma na tamana ka bani henahuraura. Mareha na mane ni vogasiha, hanana vige page ramatenigi na ramata. Na Araha ki hato, vige hagamarutera nikâ na poropete.

¹⁰Na meraha i Jerusaleme ka muni. Ngaira ka oga hurihuri so i ano. Ngaira ka goro bê huri ma ka hagesuru tatari. Na gete na kare viru ka angi ma ka tu bê so.

¹¹I nahuiê ngavê na angiha. I erataga ngavê na aitangihaku. I nahuiê ngavê na hetakiha renira na kariaku ga mute. Na kere kare ma na kare gari ka mesi magêha suria na hinua.

¹²Ngaira ka angisi ngêra ma tonoha, ma ka avaravarasira kenata. Ngaira ka mesi magêha, mangara na mane ni me ga mamari. Ngaira ka meme i rimata kenata.

¹³Jerusaleme hetakui, na ta be visia? Go maratorana na ta? Manga i he kê haganaku parongamu? Ti ki mamasiaga ngavê manga igo? Na mamasiaganiha iamu ki raha manga na asi. Ti ki girara i hagakorogo aporo?

¹⁴Na poropete iamu ka hagaparugo ma renigi na hagaparunga ma na maruteha babanga iata. Ngaira ka pe ranganigo, hanana vigu tahitahi. Ngaira ka hagabekasigo, ma igo ko pe tako ni urisi parongamu.

¹⁵Na enoni, ga hetaratarari, ka bâsigo ma ka makimaki tenigo. Ngaira ka karikarige bê ma ka manavatenigo, Jerusaleme, suria go aruhuruhu. Ngaira ka vi: “I he nga na hinua i bâkoro era, ea? I he nga na hinua i rongo raha na atana suria na maveta hagenani, ea?

¹⁶Na merongamu hato ka megomarabe ma ka bâ hemarasi renigo. Ngaira ka tamasi erasigo, ka vi: “Igami kani mi ruhuruhugo. Nga na tarana mi bani gunahia me ngekana!”

¹⁷I ngekê na Araha ki bani hagamonaria nga na bani haganunuha iana tangagami. Ngaia ki hagaitangigami ngavê, manga i bani vi. Mareha ngavê vige hetaki. Ngaia ki katora na merongamami, ka teharigami ma ka manavatenigami, suria mi vota.

¹⁸Jerusaleme, gu avarasia na Araha. Na tavoni na maamu ke gogo mangagi na ve surigi na tangiani ma na bungiani. Siana ko mamaro ni angiha. Go ama ni angiangi nga.

¹⁹Go ama ni avarasia nga na Araha surigi na bungiani hagenani. Gu visigi mataha na aitangihamu. Gu nungi rapurapu renia na Araha, hanana i takuira na karemu, ga mesi magêha suria na hinua.

²⁰Bâ, Araha, bâsira na enoni, go hagamamasiagara ngavê. Na gete ka ngêra na kareta hetakui. Igê na Ruma ni Rotu iamu ka nahuira igê na mane ni vogasiha ma na poropete.

²¹Na enoni na gapu haoru ma na bani nuni ka me ka tâ totoko suria na hinua. Na merongaku ka ahurara na gapu haoru, na mane ma ne gete. Igo ko nahuira igê na mangariaganiha iamu. Ma ki asa vigu hetaki.

²²Igo ko unira me na merongaku tenigi na ara ni agua rihiê, tanu manga go guhira tanga na hinanga raha. Na mangariaganiha iamu igê na tangiana ngekana ki asa vige tihia ta na enoni. Ngaira ka nahuira ka me na kareku, gê takuira ma kê bâsurira.