Read Kahua ANGIHA MARAMARA 3 Bible Online

ANGIHA MARAMARA 3 - Kahua bible

ANGIHA MARAMARA 3

¹Inê kê girara manga i he ki hata na hagaitangiha tenia na God.

²Ngaia ki bugureniê nga igê na mengo ma ki tugupu na aitangihaku.

³Ngaia ki merongasiê igê na ara ni tangiani ma ki ama ni nahuiê nga.

⁴Na apeku ki mamari ma ki ahabatobato. Ngaia ki barugigi na suriku hato.

⁵Ngaia ki katogi na mamasiaganiha ma na anumanumaha, ka aharêsiê ngavê. I asa iaku be gavatenigi.

⁶Ngaia ki purusiê igê na mengo ni mera.

⁷Ngaia ki rakuê renigi na seni. Inê kê oga i ruma ni hagaitangiha. I bara be togâna i he.

⁸Inê kê ama ni avaravara nga ma God ki pe aganariê rârâ.

⁹Inê kê tariahehu. Na apê na hê rihiê ka hagabarasiê.

¹⁰Ngaia ki ahi naasiê manga na hua. Ngaia kaunihiê manga na laione.

¹¹Ngaia ki tarigeniê tenia na tara manga na manero. Ngaia ki ranguiê ma ki rurugu teniê, ma ki paniê so.

¹²Ngaia ki okea na epage iana ma ki hagaututumiê renia ma ki hanasiê.

¹³Na mage iana ka kumu nga i apeku.

¹⁴Na enoni ka meêmarabe tare ma ka barobaro ki reniê.

¹⁵Ngaia ki hagangêê renigi na mamasiaganiha ma ki hagatonomiê renia na tonoha mahe.

¹⁶Ngaia ki ratea i ano na bêku igê na rarate ma ki barugigi na rivoku igê.

¹⁷Inê kê pe hagaregi rârâ nikâ na apekoroha, na marapeha ma na vagevageha.

¹⁸Inê kê vi ma, vi i sugia be me. Na hagêguringa togo iaku renia God ki bani hato.

¹⁹Matena gê takusigi na mamasiaganiha iaku ma suria nikâ inê ka na mahuara, e, inê kê hataera ngavê.

²⁰Inê kê takusigi tare. Tahema inê kê bagahagêguri.

²¹Henaka i manga ngekana, ma inê kê ramo aporo, matena gê takusia na tarana ngekê:

²²Na hetakuiha iana na Araha ki asa vige page hato. Na korohana ki gâga tare, ki bê ki arâ.

²³Ngaia ki manga na kârupu i na ara ni mavoraro, manga na arito i raboa i na ara ni mahogotani.

²⁴Inê tanga ma na Araha. Tahema inê be hagêguri togo renia.

²⁵Na Araha ki koro tanga na ani mavê na enoni, i hagêguri togo renia.

²⁶Tahema ki ararigia, viga naasia haharitagi ma, hanana na Araha ki hagatahigia.

²⁷I koro ka hagesuringenia na piringiapeha igê na mamasiaganiha, matena ga karekare mêngagia.

²⁸Matena ga mamasiaga, ki ararigia, ka munimuni ma ka piringiape ma.

²⁹Ka aganarigi ma ka vi, i koro ma. Vari na ara ni marâ ki page koro,

³⁰naka ma viga nahuigia se ga guharigia. Nakara ma vê.

³¹Na Araha ki hetaki ma ki asa, vige kasi renigia ngavê.

³²Henaka ngaia ki hagaera obaka, ma ngaia ki hetaki tangagia, suria na hetakuiha iana i asa, vige page hato.

³³I monari, ngaia ki hagaitangigia ma ki hagamamasiaga apeka, ma ngaia ki pe vagevagesigi na tarani vigana.

³⁴Matena na enoni ka purira so i ano na kare rakuraku suria na maveta hagenani, ki hega, na Araha ki pe girara vari?

³⁵Matena ga katora bera na enoni igê na tarani ga pe oto i maana God,

³⁶ki hega, na Araha ki pe girara vari?

³⁷Ti ki girara i tamasi ma, ma ka vora me na marâ? Ngaia getea ma na Araha.

³⁸Na ara ni marâ hato ka oga i ruguhana, na koroha ma na eraha nikâ.

³⁹Tanu hega igia ka hagagege? I ararigia, viga kasikasi meni hete na bagaparongaka.

⁴⁰Hoi, ge haharirigi na tauhaka, ma ke urisi parongaka.

⁴¹Ke tê viteana God i mêrihaka hagenani, ma ke nunginungi, ke vi:

⁴²“Araha, igami kami tasi ma kami haritohego, ma igo ko pe ata ni tako mavê renigi bagatarihamami.

⁴³Igo ko mangariaga ngavê tangagami. Igo ko tarigenigami ko nahuigami. I mareha ngavê na hetakiha tangagami.

⁴⁴Igo ko pinihi igê na vaha, i hagabarasigi na avarasiha iamami tangago.

⁴⁵Igo ko katogami, kami manga na bê ni roro i maata na enoni hato i maveta.

⁴⁶Na merongamami hato ka guharigami ma ka mamanatenigami.

⁴⁷Na bagabevoani ma na perenga, na aruhuruhunga ma na maguha ka tarahugami.

⁴⁸Na tavoni na maaku ke gogogo mangagi na ve, suria na kariaku ka mute.

⁴⁹Na tavoni na maaku ka gogogo tare

⁵⁰mataro me na matena igo na Araha God ko bâsigami igê.

⁵¹I rugu bâraha na obaku, matena gê bâsigi na mamasiaganiha, ga tarahura na gete i pasiku.

⁵²Na merongaku ka tuê manga na manu. Ngaira ka merongasiê igê na tarani i pe tonga hunani.

⁵³Ngaira ka kasiê so mamêrigaku igê na kiru, ma ka kasi hê huriê.

⁵⁴Na ve ki nonga ki sugi anuiê. Ma inê kê vi: “E, gê sugi meme!”

⁵⁵I rarona na kiru inê kê avarasigo igê, Araha.

⁵⁶Matena gê nungigo, hanana vigo aganariê, igo ko aganariê nga.

⁵⁷Igo ko aramiê, ko vi: “Siana ko magu.”

⁵⁸Igo ko rohe pusiê, Araha, ma ko hagatahiê.

⁵⁹Igo ko bani giraragi na tarani era, na merongaku ka katogi tangê. Gu pane heniê igê na kotiha ma ko hagaitangira na merongaku.

⁶⁰Igo ku bani girara, viga merongasiê ngavê ma ka harikato reniê.

⁶¹Araha, igo ko bani girara, vi ngaira ka guhariê. Igo ko bani giraragi na katoha hato iata.

⁶²Ngaira ka hakuhaku reniê, ma ka harikato reniê tare i na ara ni tangiani.

⁶³Ngaira ka meêmarabe tare.

⁶⁴Araha, gu hagaitangira meni na bagatauhata.

⁶⁵Gu kuasira, ke bagahagêguri.

⁶⁶Igê na mangariaganiha raha iamu gu tarigenira ma ku mutera!”