Read Kahua ANGIHA MARAMARA 4 Bible Online

ANGIHA MARAMARA 4 - Kahua bible

ANGIHA MARAMARA 4

¹Na golo iamami ki bâ riariaga. Na golo matarotaro ki pe togatoga. Na hê na Ruma ni Rotu ka tâ totoko surigi na tara.

²Na mane na gapu haoru i Sione ka mangagi na golo manimani tangagami, ma i ngekê ka mangagi na apira na marâ purua, na enoni ka tahegi.

³Na enasi na o vasiga ki hagasusura na karena, ma na kariaku ki mareha. Ngaira ka pe botage renira na kareta. Ngaira ka mangara na auvê.

⁴Ngaira ka nakara ma vê na kare gari iata, ka mesi magêha ma na tonoha. Na kareta ka angisi ngêra, ma ki asa ta na enoni, vige hagangêra.

⁵Na enoni, ga magoto tare renigi na ngêra mora, ngaira ka mesi magêha surigi na tara. Na ani ga ruruguha ma ka hagesuru bâkoro tare, ngaira ka garigari ngêra igê na bê ni roro.

⁶Na hagaitangiha tangara na kariaku hetakui ki teharia na ani tangara na ai ni Sotome, suria God ki parama, ma ki hagaitangia i Sotome, ma ki pe hagaitanga tatage.

⁷I nago na maneraha iamami ka matarotaro, ka siki ahuru teharia na suru. Na apekoroha iata ki togatoga teharigi na hê ahe. Na bâkorohata ki mave mangagi na hê marava.

⁸Ma i ngekê na bâbâhata ka masuri teharigi na arisu. Na enoni ka pe hagarera vê nikâ. Ngaira ka hetâhi surigi na tara. Ngaira ka rataga ma ka herungurungu na apeta manga na runguni na hana.

⁹Ga babarisi na ani ga me igê na hearihatana teharira na ani ga mesi magêha, suria ga kakasi mataro me ka meme, suria i marehasira na ngauha.

¹⁰Na bagabevoana, i tarahura na kariaku, ki katora, ka tanugi na tarani, ga kakahuru renigi. Na gete ka pigira na kareta hetakui, hanana ga ngaura, suria i marehasira ngavê na ngêra.

¹¹Na Araha ki mangariaga ngavê ma ki tako hagetage renira. Ngaia ki sungia i Sione, ma ki hagamakaka.

¹²I mareha makoko vê, vi ta na maneraha, se vi na ani mavê na enoni suria na maveta hagenani, vige tongesuria, vi manga ta na merongamami ma ki taharia i Jerusaleme, ngaia ki girara i henahuraua.

¹³Ma ki manga ngekana, suria ma poropete igê ka tasi ma na mane ni vogasiha ka bagaparongata, suria ga nahuira ka me na enoni koro.

¹⁴Na enoni raha igê ka herâonge i hinua mangara na enoni, ga guru, ka arâ tatagara, suria ga mamanuhi re gaputa. Ma na enoni ka magu, vige hatarira.

¹⁵Na enoni ka ngirira, ka vi: “Tari era vê! Mu era! Mu râ! Siana kamu hatariê!” Tahema ngaira ka arâhigi na agua tangagi na agua ma na enoni ka makimakitenira igê ma ka paira.

¹⁶Na Araha ki kasi renira, suria ngaia marena ki tokorenira. Ngaia ki pe hagahigasira na mane ni vogasiha ma na enoni raha nikâ.

¹⁷Igami kami naasia rârâ na hetamaniha, ma ki mareha vê. Igami kami naasia rârâ ta na agua, vige tamanigami. Ma ki bara!

¹⁸Na merongamami ka maisurigami bâraha tare. I bara tangagami, vigami arârâ i metara. I sugia ma vige hato iamami.

¹⁹Na merongamami ka rêrête me teharira na ahetaronga ga hagavato. Ngaira ka tarigenigami igê na hungani. Ngaira ka harisurigami, ma ka ahi karigami igê na masusu.

²⁰Ngaira ka hagatotongoa na maneraha iamami, gami tako togo renia, na ani God ki bani atea. Ngaira ka suta karia, ki vota. Igami kami hagêguri togo renia, vi ngaia ki anumasigami tenira na merongamami. Ma ki mareha!

²¹I koro ma, mu ru, igamu na ai ni Etome. I koro ma, mu vagevage, na ai ni Usu. Na bagabevoana ki page tarahugamu nogami. Igamu nikâ kamu page tariahehu, ma kamu page rupaturi, kamu maki.

²²Sione, igo ko bani kasi mena na tasi iamu. Na Araha ki sugi toregami aporo tanga i pasimami. Ma igamu na ai ni Etome, na Araha ki page hagaitangigamu ma ki page ranganigi na bagaparongami.