Read Kahua BARUKU 1 Bible Online

BARUKU 1 - Kahua bible

BARUKU 1

¹O Baruku karena o Neraia ki segea na buka ikê. O virana ki no Maseia. Ngaia ki na raraha iata o Setekia mo Hasatia mo Hilikia. Ngaia ki segea i Babilonia,

²igê na pita na tangiana igê na hageha igê na rimata na harisi, na ai ni Babilonia ga bani henahuraua igê i Jerusaleme ma ka bani hagamakaka renia na gi.

³O Baruku ki tomania raha na buka ikê tanga o Jehoiagino karena o Jehoiakimo,

⁴ma tangara na enoni hato, ga oga i Babilone i papana na ve i Sutu. Ngaira hato i nekana ka râ me, hanana ga karinga i tomania. Ngaira ka na tamana na maneraha, na enoni raha, na meraha, ma na enoni getera, na enoni haoru ma na bani nuni ma na enoni purua nikâ.

⁵Matena ga rongoa i tomania, ngaira ka kahu angiangi, ka harihari ma ka rahesia na Araha.

⁶Ma i hemuri ngaira ka haku haga, ma na ara ni hitangita ki kasi nga na haga hato, i pe obanigi vige mauri re.

⁷Ngaira ka hagatorangenigi na haga tanga o Jehoiakimo na maneraha ni hagarahenga, ma tangara na mane ni hagarahenga getera ma na enoni hato, ga oga henia i Jerusaleme. Vaemana o Jehoiakimo ka no Hilikia mo virana ka no Salumu.

⁸Igê na tangahuruta na tangiana igê na hageha, ga hêtana vi Sivana, o Baruku ki toregi na kâkâ tanga na hagarahenga, ga bani hanagogi na me ni Babilonia tenia na Ruma ni Rotu, ma ki hagaguhigi tanga i Juta. Na kâkâ ngegana ka tagarahigi renigi na siliva. O Setekia karena o Josia na maneraha ni Juta kani vi, ka tagarahigi,

⁹i murina na matena na maneraha o Nebukanesa ni Babilonia ki bani henahuraura igê o Jehoiagino, na maneraha, na mane ga manisingenigi na tagaraha, na enoni raha ma na enoni purua tenia i Jerusaleme tanga i Babilone.

¹⁰Ngaira ka segea na leta tangara na ai ni Jerusaleme, ka vi: “Igami kami kasi vê na haga igê tangagamu. I koro, kamu vurira re na sipi ma na goti, hanana mu vogasia re na Araha ma tanga na vogasiha ni bonoteniha ni tasi, ma kamu vurivuri re nikâ na marâ i sigini koro, ma na koni tangagi na vogasiha. Mu vogasi igê na bea ni vogasiha iana God na Araha iaka.

¹¹Mu nungia na Araha, hanana i tamanirerua o Nebukanesa na maneraha i Babilonia mo Belosasare o karena, hanana garu mauri arihu manga na vavearo.

¹²Mu nungia na Araha, ki hagaramonigami ma ki bêngenigami, hanana o Nebukanesa ma o Belosasare o karena, karu anumasigami, ma kami têtê viaterua suria na ogaha iamami, hanana garu korokoro tangagami.

¹³Igami kami nungigamu, hanana mu avarasia na Araha God tangagami, suria igami kami haritohea, ma ngaia ki mangariaga mênga tangagami.

¹⁴I koro, kamu tomania na buka ikê, mi hagatorangenia vê tangagamu, ma kamu tangahurigamu i Ruma ni Rotu renigi na tasi iami igê na tangiani raha ni rotu ma igê na tangiani getigi mu hakuhaku igê tanga na hagarahenga.

¹⁵“Mu tangahurigamu vikê renigi na tasi iami. Na Araha God iaka ki koro ma oto na parongana. Ma igia ka nahuigia mênga na makiha. Igia hato na ai ni Juta me Jerusaleme,

¹⁶na maneraha iaka, na enoni raha iaka, ma na mane ni hagarahenga iaka, ma poropete iaka ma na êvarika, igia hato ka maki,

¹⁷suria igia ka haritohea na Araha God iaka,

¹⁸ma ka guguruga tanga. Igia ka pe tê viteana, se vige râ surigi na ramata iana.

¹⁹Haganega me tenia na matena na Araha ki torera hura igê na êvarika tenia i Esipito, hanana i haganahunigia renia na marê na mako koro ma ki ango, ngaia ki haganunugia, matena i tamasi i harana o Moise. Ma i ngekê igia ka mamasiaga renigi na haganunuha ngegana.

²¹Igia ka usi, vige tongesurigi na tamasinga iata na poropete, na Araha God ki hagatorangenira me tangagia. Ma igia ka râ suri barisuka mareka ma hete igê na teniha era iaka. Igia ka hagarapera na harasita na enoni getera, ma ka katogi na tarani, i kitenigi na Araha.