Read Kahua BARUKU 2 Bible Online

BARUKU 2 - Kahua bible

BARUKU 2

¹“Tahema na Araha ki hagamonaria na haganunuha iana tangagia ma tangara na mane ni hagaotonga iaka, na maneraha iaka, na enoni raha iaka, ma na ai ni Isiraele me Juta.

²I maveta ki mareha rârâ igê na tarani, ga vora i Jerusaleme, matena na Araha ki hagamonarigi igê na haganunuha iana, ga oga igê na Buka ni Ramata iana o Moise.

³Na tarani ngegana ka era ngavê. Na enoni ka ngêra na kareta, na kere mane ma na kere gete.

⁴Na Araha ki tokorenigia ma ki mahatangenigia tangara na apanini me hato, ga oga rihigia, ka marungigia. Ngaira ka manavatenigia ma ka makimaki tenigia.

⁵Igia ka haritohea na Araha God iaka, ma ka usi, vige tê viteana. Tahema igia ka pe teha ma ka vora re na kare rakuraku.

⁶“Na Araha God iaka ki koro ma ki oto na parongana. Ma igia henira na êvarika na makiha ki nahuigia.

⁷Henaka vi na Araha ki hagaitangigia, manga i bani haganunugia,

⁸ma igia ka ama ni haritohea nga. Igia ka pe rahesia, ma ka pe kasigi râ na bagatauhaka.

⁹Ngaia ki hagaitangigia renigi na bagabevoani, i bani nanêgia renigi. Na Araha ki oto na parongana igê na ara ni tarani, i katogi tangagia,

¹⁰suria igia ka pe tê viteana ma ka pe râ surigi na ramata iana.

¹¹“Igo, na Araha God iata na Isiraelita, igo nga ko torera hura na kariamu tenia i Esipito, suria igo ko raramohaga hunigo, ma ko katogi na mena ma na tagaraha raha, ga hagakonera na enoni. Igo ko hagabângenia na raramohamu raha hunia. Tahema ki rongo raha na atamu mataro me i ngekê.

¹²Araha God iamami, igami kami haritohego. Igami kami pe toto surigo. Igami kami aharêngigi na ramata hato iamu.

¹³Siana ko ama ni mangariaga nga tangagami. Igami ma ta kereani kani mi hita so igê na marê iata na mahuara, go tokorenigami surigi.

¹⁴Araha, gu aganarigi na avarasiha iamami, ma ku hagatahigami, hanana na enoni hato ka hagarahasigo. Gu tamanigami, hanana mi hagakoro obata na ani, ga bani henahuraugami.

¹⁵Igê na tarana ngekana na enoni hato i maveta ka page aitangisigo, vi igo ka na Araha God iamami, ma ko bani atera na ai ni Isiraele ka vora re na kariamu igo.

¹⁶“Araha, tenia i pasimu apuna, gu bâsigami, mi mamasiaga. Gu aganarigi na avarasiha iamami.

¹⁷Gu bâ! Bâsigami. Igo ko bani girara, vi na enoni, ga bani me ma ka oga igê na agua iata na enoni me, ngaira ki asa iata, vige hagarahasigo, se vige tarohenia na otohamu.

¹⁸Araha, ngaira ma hete na ani ga mauri kani ga girara, ga hagarahasigo ma ka tarohenia na otohamu, naka ma ga mamasiaga bâraha, se ga tuku ngavê, se i memega na apeta, se ga magê, se i vahagaga na maata.

¹⁹“Araha God iamami, igami kami avarasigo, ko takuigami, mareha vi surigi na tauhata koro na êvarimami ma na maneraha iamami.

²⁰Igo ko mangariaga tangagami, ma ko hagaitangigami, manga go bani haganunugami, matena go tamasi tangagami i harata na kariamu na poropete.

²¹Ngaira ka vi: ‘Siana mu togeaga. Mu nakagamu maremi hete i ruguhana na maneraha i Babilonia, ma hanana mu gâga igê na marê, gê bani haganahunira na êvarimi renia.

²²Ma ki manga igamu, ma kamu usi, vigamu tê viteaku ma kamu pe nakagamu maremi i ruguhana,

²³hoi, inê kê hatungigi na ki ni vagevageha, ma na magotoha ma na ngêra ni hagatakuha surigi na hinua i Juta me Jerusaleme. Na marê hagenani ki page aruhuruhu ma ki page hihiruga.’

²⁴“Ma igami kami pe tê viteamu, hanana vigami nakagami maremami i ruguhana na maneraha ni Babilonia. Tahema igo ko hagamonaria na haganunuha iamu, go bani visia i harata na kariamu na poropete, suria go vi, vi na surita na maneraha iamami ma na êvarimami ka page tavogi tenigi na anoanota ma ka page tokorenigi.

²⁵Ma i ngekê ngaigi ki tâ totoko. Na arito ki singigi suria na tangiana, ma ka anumaga suria na bungiana. Na enoni rako ka me renigi na mamasiaganiha, na magêha, na hearihatana ma na ringa.

²⁶I ngekê na Ruma ni Rotu iamu ki aruhuruhu, suria na bagaparongata na ai ni Isiraele me Juta kani hagaratena, ko ruhuruhua.

²⁷“Henaka i manga ngekana, ma igo, Araha, ko megami piringiape ma ko hagabângenia, vi igo ko takuigami ngavê,

²⁸manga go bani surua i harana na kariamu o Moise, matena go bonasia, ki segegi na ramata iamu i maata na Isiraelita.

²⁹Igo ko bani vi: ‘Manga mu pe têtê viteaku, igamu, mu rako teha, ka page hita so ma ta kereani na hitangimi igê na marê, gê page tokorenigamu surigi.

³⁰Inê kê bani girara, vi igamu kamu haritoheê, suria igamu kamu togeaga, kamu guguruga. Ma na matena ga page henahuraugamu igê tanga na marê getea, igamu kamu page tako aporo.

³¹I ngekana igamu kamu page tahetara, vi inê nga ka na Araha God iami. Inê be katogamu, kamu urisi parongami ma kamu agana kamu tê vita.

³²I ngekana igê na marê, ga page henahuraugamu tanga, igamu kamu page hagarahasiê igê, ma kamu page hagahigasiê igê.

³³Igamu ki hato, vigamu page togeaga nikâ kamu guguruga, se vigamu erataga, suria igamu kamu page takusigi aporo na tarani, ga tarahura na êvarimi, matena ga haritohea na Araha.

³⁴Ma hemuri inê be toregamu aporo tanga na marê, gê haganahunira na êvarimi o Abaramo, mo Isako, mo Jakobo renia suria na tohenga iaku, ma igamu kamu page nahunia aporo. Inê be hagarakonigamu nga, ma ki asa iami, vigamu page abubu nikâ.

³⁵Inê be naka na suruheri henigamu, na ani i asa vige page hato. Inê nga be God iami, ma igamu nga ka na kariaku. I asa be page paigamu hura nikâ, igamu na ai ni Isiraele, tenia na marê, gê haganahunigamu renia.’