Read Kahua BARUKU 3 Bible Online

BARUKU 3 - Kahua bible

BARUKU 3

¹“Araha raramohaga hunigo, God iata na Isiraelita, igami kami avarasigo igê na anumanumaha ma na mamasiganiha iamami.

²Araha, gu aganarigami ma ku takuigami, suria mi tangahurigami renigi na tasi iamami.

³Igo ko mauri ma ko Araha tare ma tarema, ma igami kami ama ni meme so nga.

⁴Araha raramohaga hunigo, God iata na Isiraelita, gu aganarigi na avarasiha iamami. Igami kami maratorata na enoni, ga me. Na êvarimami ka haritohego, igo na Araha God iata. Ngaira ka guguruga tangago, ma igami kami mamasiaga meni na bagaparongata ngaira.

⁵Gu bonotenigi na bani bagatauhata na êvarimami, ma ku takusigi hete na raramohamu ma na tarotarohamu,

⁶suria igo ka na Araha God iamami, ma igami kami page hagarahasigo.

⁷Igo ko bani katogami, kami hagahigasigo, hanana mi avarasigo. Ikê igê na marê, ga bani henahuraugami tanga, igami kami hagarahasigo, suria mi bani urisi parongamami tenira na êvarimami.

⁸Igo ko bani tokorenigami surigi na marê iata na ai mamahuara, ma ko katora, ka ruhigami, ka guhaberasigami ma ka kasikasi mamava hurigami. Igo ko hagaitangigami meni na bagaparongata na êvarimami, ga haritohego, igo na Araha God iamami.”

⁹Ai ni Isiraele, mu rongogi na ramata ni mêriha. Karingagi, hanana mu page takotako mataha.

¹⁰Ai ni Isiraele, ki hega, mu oga igê na marê iata na merongami? Tanu hega, kamu ngani ma kamu mameaga igê na marê iata na ani ga mamahuara?

¹¹Tanu hega, kamu makoraga mangara na enoni ga me, mangara na ani ga oga igê na agua iata na enoni ga me?

¹²Renia ta? Suria igamu kamu bani kasia na hunana na takoha mataha.

¹³Manga vi igamu ma kamu bani râ surigi na obaniha iana God, vikê igamu kamu nahunia na marapeha tarema.

¹⁴Mu garigi na morani na giraraha, na ramoha ma na takoha mataha, hanana mu page tarahugi henigi na morana na mauriha arihu, na marara i mavesigi na obami, ma na marapeha mora.

¹⁵Ti ki girara, vi i he kani oga igê na takoha mataha? Ti ki girara i bêbanu igê na ruma ni ruruguha iana?

¹⁶I he ngaira nga na maneraha surigi na marê hato i maveta

¹⁷ga hagamanatara nikâ na manu ma na marâ vasiga? I he ngaira nga na enoni ga nahuni ruruguha na siliva ma na golo ma ka tako togo renigi? I he ngaira nga na enoni, ga ruruguha ngavê, ga vanasigi ma ka gunahigi?

¹⁸I he ngaira nga na enoni, ga manisingenigi ngavê, hanana ga tagarahigi na marâ bâkoro renigi na siliva? I he ngaira nga na enoni, ga tangasigi tare na haga? Ngaira ka migime na tagaraha iata.

¹⁹Ngaira hato ka bani magahuru, ma ka oga igê na agua iata na enoni, ga me. Na enoni getera ka urusira.

²⁰Na apaparaha haoru ka ogasia na maveta, ma ngaira nikâ ki mareha ngavê, vige page tarahua na tara tanga na giraraha mora. Ngaira ka tugupu, vi i he nga na tara tanga na takoha mataha. I mareha vê vige hagarea.

²¹Na kareta nogata ka bonobê ngavê teharira.

²²I Kanane ngaira ka pe hagarea ngavê igê vi na kere takoha mataha, ma ngaira nikâ na ai ni Etome.

²³Na raraha iana ka Hagara, na enoni ni hagavara haga ni Mitiane me Tema, na enoni ni sihonga ma na ani ga tamasi ususu, ngaira hato ka garia makira na giraraha ma ka pe tarahua na tara tanga na takoha mataha. Ngaira ka bonobê ngavê renia.

²⁴Ai ni Isiraele, na arahanga iana na God iami ki raha teha ngavê. Na raramohana ki raha teha, i buhira na ara ni marâ hato.

²⁵Na arahanga iana ki baga raraha ma ki pe tonga na hagahatongina. I bara vige hagararingenia, vi aberabera se vi borahu.

²⁶I nago vê noga ka vora me igê na ataro akâka. Ngaira ki rongo raha na atata. Ngaira ka borahu ma ka ramoramo igê na hearihatana.

²⁷Ma God ki pe atera, hanana vige vora re na kariana, se vige hagagirarara renia na tara tanga na giraraha mora.

²⁸Ngaira hato ka mute ngavê, suria ngaira ka pe nahunigi na morana na giraraha ma na takoha mataha.

²⁹Ti ki akê i vavearo, hanana i torea me na takoha mataha? Ti ki mevato me tenia na vaha i vavearo?

³⁰Ti ki tage ki garia hagatê na takoha mataha? Ti ki vuria renigi na ruruguha na golo?

³¹I mareha rârâ ta na enoni, vige tarahua, se vige tarahua na tara tanga.

³²Ngaia getea ma God ki girara na takoha mataha, suria ngaia ki aitangisigi na ara ni marâ hato. Igê na giraraha raha tahema ngaia ki tarahua. Ngaia ki hagavora na maveta ki gâga tare ma ki kasira igê na ataka mavê na marâ ga mauri.

³³Ngaia ki bonasia na marara ki râ, ma na marara ki râ. Ngaia ki unia me, ma ngaia ki aporo me. Na marara ki tatata ma ki tê viteana.

³⁴Ngaia ki tamasi, ma na higu ka vora me otooto râ nga. Ngaigi ki oga igê na atohani Ngaigi ki vagevage ma ki mave, ma ki hagakoro obana na ani i hagavoragi.

³⁵Ngaia ki na God iaka. I mareha rârâ tani, vige maratorana.

³⁶Na ara ni tara ni giraraha mora ka râ me tenia ngaia, ma ngaia ki vatera na takoha mataha tangara na Isiraelita na kariana hetakui.

³⁷Tenia na matena ngekana na takoha mataha ki vora i maveta ma ki oga i berarogata na enoni.