Read Kahua BARUKU 4 Bible Online

BARUKU 4 - Kahua bible

BARUKU 4

¹Na takoha mataha ki na buka ni ramata iana God. Ngaia ki na ramata, i asa vige page hato. Na enoni, ga marupea maninga, ka page nahunia na morana na mauriha, ma na ani, ga pe marupea, ka page meme.

²Ai ni Isiraele, ge urisi parongaka. Ge têa nganganihaga na takoha mataha. Ge tabea na marara bâkoro iana.

³Siana ka hagamarumungenira na enoni getera, ka tavoa tenigia na ageageha iaka. Siana na ai mahuara ka nahunia.

⁴Ai ni Isiraele, igia ka babarisi. God ki bani hagagiraragia renigi na tarani, ga hagakoro obana.

⁵Kariaku, mu ramoramo! Na atami Isiraele! Na ata i asa, vige page hato.

⁶Ga hagavuringenigamu tangara na ahuroto, ma ki mareha tanga vige mutegamu ngavê. Suria igamu kamu hagamangaria God, tahema ngaia ki mahatangenigamu tangara na merongami.

⁷Igamu kamu hagamangaria na ani, i hagavoragamu, suria igamu kamu vogasira na ataro ma kamu pe vogasia God hete.

⁸Suria igamu kamu bonotenia God, i bani oga me ma tarema ma ki marupegamu, manga vi igamu ka na karena, tahema igamu kamu hagamamasiaga Jerusaleme, i marupegamu manga vi ngaia ka na kenami.

⁹Jerusaleme ki bâsia God, i hagaitangigamu, suria ngaia ki mangariaga tangagamu. Jerusaleme ki vi tange na hinua hato rihia, ki vi; “Bâsia na mamasiganiha raha, God ki vateê renia.

¹⁰Inê kê bâsia God, i bani oga me ma tarema, ngaia ki hagamarumungenira na merongaku, ka henahuraura na kareku, mane ma na hehene.

¹¹Inê kê marupera ma kê vagevagesira bâraha na kareku ma inê kê angi ma kê angi maramara renira, matena ga henahuraura paniê.

¹²Siana ta na enoni ki mamava teniê i ngekê, gê mamasiaga, ma kê nâ ma kê magari. Na kareku ka pe râ surigi na ramata iana God, ma na bagaparongata ka katoê, kê vora re na hiru.

¹³Ngaira ka pe botage renigi na ramata iana, ma ka usi vige komani têgi. Ngaira ka usitenia God, hanana vi bêngenira igê na otoha.

¹⁴“Râ me, igamu na hinua hagarangiê, ma kamu takusia, manga i he God, i bani oga me ma tarema, kani hagamarumu, ka henahuraura na kareku.

¹⁵Ngaia ki hagatorangenira me na mane ni me i na marê hagatê, ka taharira na kareku. Na me ngegana ki bara vê, vige makimakiga. Ngaira ka tamasi igê na tamasinga, i rongo getigi. Ngaira ki bara, vige hagahigasira na bani nuni, ma ki asa, vige takira na kare.

¹⁶Na me ngegana kani ga henahuraura na kareku hetakui, na mane ma na gete, ma inê kê hita so ikê gê nâ ma kê magari.

¹⁷“Kareku, manga i he kê girara, vigê tamanigamu?

¹⁸Na ani i hagaitangigamu, ngaia ma ki girara, i hagatahigamu tenira na merongami.

¹⁹Kareku, ua, mu râ! Mu kahu giraragamu maremi! Be oga so ma inê, inê getegeteê.

²⁰Inê kê bani tasigi râ na ani i bâkoro na tuguni, gê tuguni renigi igê na matena ni marapeha. Ma kê bani urisi renigi na tarisigani na gahu, suria gê hari ma kê avaravara. Igê na ogaha iaku inê be ama ni avarasia nga God, i bani oga me ma tarema.

²¹“Kareku, mu ramoramo, ma kamu avarasia God. Ngaia ki page hagatahigamu tenira na merongami, ga hagamamasiagagamu ma ka ramonigamu tare.

²²Inê kê tongesuria, vi God, i bani oga me ma tarema, ngaia ki sugi hagatahigamu. God apuna ki page hagakoro obaku, suria ngaia ki sugia ma, vige hetaki renigamu, renia ngaia ki na hagamauri iami, i bani oga me ma tarema.

²³Matena ga henahuraugamu, inê kê angisigamu ma kê mesigamu ngavê. Ma God ki page toregamu aporo me tangê, ma ki page katoê, kê ageagesigamu, ma kê obâbakoro tare.

²⁴Na enoni igê na hinua hagarangiê ka bani bâsira na merongami, ga henahuraugamu, ma ka page bâsia nikâ God, i hagatahigamu, suria i raramohaga hunia ma ki bani oga me ma tarema.

²⁵Kareku, mu piringiape ma kamu aganarigi na hagaitangiha, God ki vategamu renigi. Na merongami ka hagamamasiaga apemi, ma igamu kamu sugi bâsira, ga mutemute ma igamu kamu page teharira.

²⁶Kareku, igamu kamu bani aro pere igê na tara i sutasutaga. Ga henahuraugamu mangara na totoha ni sipi, na manero ka hanagora ma ka bêngenira vê.

²⁷“Kareku, mu ramoramo, ma kamu avarasia God. Ngaia ki hagaitangigamu, ma ki page takuigamu aporo.

²⁸I nago igamu kamu togeaga, kamu kasi renia God, ma i ngekê ki tuguhigamu, mu togeaga i mêrihami hagenani, kamu urisi parongami ma kamu têtê viteana.

²⁹God, i bani katogi na bagabevoani, ki tarahugamu, ngaia ki page hagatahigamu ma ki page katogamu, kamu vagevage tare ma tarema.”

³⁰Jerusaleme, gu ramoramo. God, i bani hagamarahugo, ngaia ki page haganaku parongamu.

³¹Na mamasiaganiha ki page tarahura na ani, ga hagatavatavago, ma ka mamavatenigo, matena go vota.

³²Na mamasiaganiha ki page tarahugi na hinua, ga henahuraura na karemu. Na mamasiaganiha ki page tarahua i Babilone, na hinua na karemu ka vora re igê na kare rakuraku.

³³I nago i Babilone ki vagevage, matena go vota ma ki koro na obana, suria go aruhuruhu Henaka, ma ngaia ki page arikuku, suria ngaia marena so ki page hihiruga.

³⁴Inê be hatungia na ageageha iana renia ga rako makira na enoni igê, ma be urusia na paroparoha iana renia na obaeraha.

³⁵Inê God, gê bani oga me ma tarema, inê be karangia na gi huria. Ngaia ki page aruhuruhu, ma na ataro ka page gâga hagahu igê.

³⁶Jerusaleme, gu bâ bêkê, ma ku bâsia igê na vagevageha, God ki vatego renia.

³⁷Bâ, na karemu! Na karemu ga bani henahuraura igana! Ngaira ka aporo me tangago! God apuna ki bonasira ka haku me tenia i kerekê ma tenia i kereso. Ngaira ka aporo me tangago ma ka vagevagesia na raramohana God.