Read Kahua TANIELE 2 1 Bible Online

TANIELE 2 1 - Kahua bible

TANIELE 2 1

¹Na mane haoru gi oru o Hanania, o Misaele mo Asaria, na maneraha o Nebukanesa ki bani kasira igê na baga gi raha, ngaira ka arârâ ma igê na vavatana na gi. Ngaira ka kiria na Araha ma ka hagarahasia.

²Ma i ngekana i rarona na gi o Asaria ki ura so haritagi igê, ma ki nunginungi raha, ki vi:

³“Araha, God iata na êvarimami, igami kami hagarahasigo ma kami rahesigo. Na atamu ki rongo raha tare, ki bê ki arâ.

⁴Igo ko katogami surigi na tauhamami. Na tauhamu hato ka koro ma ka oto tare. Na suriha iamu ma na tarani, go katogami renigi, ka râ suria na monariha.

⁵I oto na tauhamu, matena go hagaitangigami, igami ma na ai i Jerusaleme, na hinua raha apuna iata na êvarimami. Na hagaitangiha ngekana ki ararigami, suria mi bagatauhamami.

⁶Igami kami haritohego ma kami murisigego. Igami kami aharêngigi na ara ni ramata iamu.

⁷Igami kami pe râ surigi na ramata iamu tangagami. Manga vi igami, ma kami têgi na ramata, vikê igami kami oga igê na ramana.

⁸Ma vi na ta nikâ? Na suriha iamu ma na hagaitangiha, go vategami, ka monari ga ararigami.

⁹Igo ko tagarenigami tangara na merongamami, ga pe botage renigi na ramata ma ka haritohego ngavê, ma ka mego hetehateha, ma ko tagarenigami tanga na maneraha, i erataga ngavê, ma ki mareha rârâ i pasina na otoha.

¹⁰Igami na kariamu mi rahesigo, igami kami muni ma, suria mi maki. Na makiha ki nahuigami ngavê.

¹¹Siana ko kasi renigami hagetage, i era ma ki pe rongo raha na atamu. Siana ko aharêngia na suruheri iamu henigami.

¹²Gu ama ni takigami nga hete. Gu hagamonarigi na suruha iamu tanga o Abaramo, na ani go takuia bâraha, ma tanga o Isako na kariamu, ma tanga o Jakobo na êvarita na Isiraelita, i oto na parongana i maamu.

¹³Igo ko suru tangara, hanana vigo hagarakonira na raraha iata mangagi na higu i vavearo, se na one i one.

¹⁴Ma i ngekê, Araha, igami kami pe rako. Na enoni, naka ma i na ani mavê na agua, ngaira ka rako teharigami. Naka ma i he, na enoni ka kitenigami. Igami kami maki ngavê renigi na bagatauhamami.

¹⁵I ngekê igami kami pe nahunira rârâ na maneraha, se vi na poropete, se na enoni vige bêngenigami. I ngekê ki mareha rârâ na Ruma ni Rotu, hanana vigami susu tangago, se mi vogasigo, se vigami tagarenigi na ngauha tangago, se vigami hagahigasigo renigi na marâ i sigini koro. I mareha rârâ ta agua, hanana vigami rahesigo igê, hanana vigu takuigami.

¹⁶Gu aganarigami, suria mi angitenigi na tasi iamami, ma kami tangahurigami. Gu aganarigami nga tagenana manga i nago, matena mi susu tangago renira na sipi mane, na puruka mane, ma renira rako na rehagaro na kareta na sipi.

¹⁷Ngaia getea ma na angiteniha iamami ka na vogasiha iamami tangago i ngekê. I bara vi tani râ nikâ. Gu aganaria, hanana mi têtê viteamu i mêrihamami hagenani. Na enoni, i hagêguri togo renigo, ki asa vige bagahagêguri.

¹⁸Igami kami suru i mêrihamami hagenani, hanana vigami tototo surigo, kami rahesigo ma kami avarasigo.

¹⁹Siana ko hagamakigami. Gu tamanigami ma ko takuigami hete.

²⁰Araha, gu katogi na mena, hanana mi tahi, ke rongo raha na atamu.

²¹Gu katora na enoni hato, ga hagamamasiaga apemami, ke maki ma ke ape ruruhi. Gu hatungigi râ na ramoha ma na arahanga tenira. Gu hagavotarira.

²²Gu katora, ke tahetara renigo, vi igo getego ma ka na Araha God, go marungia na maveta hagenani, suria go raramohaga hunigo.”

²³Na kariana na maneraha, ga kasira so na mane haoru gi oru igê na baga gi raha, ngaira ka ama ni bugua nga na gi renigi na oile, na mangate, na asire i maria, ma na ehogoni na ario.

²⁴Na vavatani ki akê na vearina gi rua,

²⁵ma ki tataka ma ki hagamakakara na ai ni Babilone, ga ura rihia na gi.

²⁶Ma na angero iana na Araha ki vato so me i pasita o Asaria ma na tamana gi rua, ga oga igê na gi. Ngaia ki panegenigi râ hegitigi na vavatani,

²⁷hanana i magarohaga na rarona na gi. Na gi ki pe ngêra rârâ na vera oru agana. Ngaira ka pe hatamia rârâ vi na kere mamasiaganiha sisite.

²⁸Hoi, igê na rarona na gi ngaira na vera oru ka haganega ka ki. Ngaira ka hagarahasia ma ka visia koro God, ka vi:

²⁹“Ge visigo raha Araha God iata na êvarimami. Ge hagarahasigo tare, ki bê ki arâ.

³⁰Ge hagahigasia na atamu apuna, ke rongo raha. Ge hagarahasigo tare, ki bê ki arâ.

³¹Ge visigo raha i Ruma Apuna iamu. Ge hagarahasigo tare, ki bê ki arâ.

³²Ge visigo raha igê na atohamu i avorata na angero. Ge hagarahasigo tare, ki bê ki arâ. Ge visigo raha, go bâ so tararugi na rutuni hato. Ge hagarahasigo tare, ki bê ki arâ.

³³Ge visigo raha renia na arahanga iamu. Ge hagarahasigo tare, ki bê ki arâ.

³⁴Ge visigo raha renigi na marâ i vavearo. Ge hagarahasigo tare, ki bê ki arâ.

³⁵Visia raha na Araha, igamu na enoni ma na marâ hato. Hagarahasia ma hagahigasia tare, ki bê ki arâ.

³⁶Visia raha na Araha, igo na vavearo. Hagarahasia ma hagahigasia tare, ki bê ki arâ.

³⁷Visia raha na Araha, igamu hato na angero iana. Hagarahasia ma hagahigasia tare, ki bê ki arâ.

³⁸Visia raha na Araha, igamu na ve hato i avorana na vavearo. Hagarahasia ma hagahigasia tare, ki bê ki arâ.

³⁹Visia raha na Araha, igamu mu nahuni ramoha i vavearo. Hagarahasia ma hagahigasia tare, ki bê ki arâ.

⁴⁰Visia raha na Araha, igamu na arito ma na hageha. Hagarahasia ma hagahigasia tare, ki bê ki arâ.

⁴¹Visia raha na Araha, igamu na higu i vavearo. Hagarahasia ma hagahigasia tare, ki bê ki arâ.

⁴²Visia raha na Araha, igamu na rangi ma na kârupu. Hagarahasia ma hagahigasia tare, ki bê ki arâ.

⁴³Visia raha na Araha, igamu hato na roga. Hagarahasia ma hagahigasia tare, ki bê ki arâ.

⁴⁴Visia raha na Araha, igamu na gi ma na bababami. Hagarahasia ma hagahigasia tare, ki bê ki arâ.

⁴⁵Visia raha na Araha, igamu na rogaroga ahuru ma na singiha. Hagarahasia ma hagahigasia tare, ki bê ki arâ.

⁴⁶Visia raha na Araha, igamu na vokaha ma na anumaganiha. Hagarahasia ma hagahigasia tare, ki bê ki arâ.

⁴⁷Visia raha na Araha, igamu na tangiani ma na bungiani. Hagarahasia ma hagahigasia tare, ki bê ki arâ.

⁴⁸Visia raha na Araha, igamu na mavetana ma na rotoha. Hagarahasia ma hagahigasia tare, ki bê ki arâ.

⁴⁹Visia raha na Araha, igamu na anumaganiha ma na magarisiha. Hagarahasia ma hagahigasia tare, ki bê ki arâ.

⁵⁰Visia raha na Araha, igamu na târagina ma na maratoha. Hagarahasia ma hagahigasia tare, ki bê ki arâ.

⁵¹Visia raha na Araha, igamu na marangea ma na rotohihinga. Hagarahasia ma hagahigasia tare, ki bê ki arâ.

⁵²Visia raha na Araha, igo na maveta. Hagarahasia ma hagahigasia tare, ki bê ki arâ.

⁵³Visia raha na Araha, igamu na barani ma na hungani. Hagarahasia ma hagahigasia tare, ki bê ki arâ.

⁵⁴Visia raha na Araha, igamu na marâ hato mu baogo i maveta. Hagarahasia ma hagahigasia tare, ki bê ki arâ.

⁵⁵Visia raha na Araha, igamu na ve ma na asi. Hagarahasia ma hagahigasia tare, ki bê ki arâ.

⁵⁶Visia raha na Araha, igamu na ve banga ma na rano. Hagarahasia ma hagahigasia tare, ki bê ki arâ.

⁵⁷Visia raha na Araha, igamu na pusuasi ma na ega i asi. Hagarahasia ma hagahigasia tare, ki bê ki arâ.

⁵⁸Visia raha na Araha, igamu na ara ni manu hato. Hagarahasia ma hagahigasia tare, ki bê ki arâ.

⁵⁹Visia raha na Araha, igamu na togoha ma na marâ vasiga. Hagarahasia ma hagahigasia tare, ki bê ki arâ.

⁶⁰Visia raha na Araha, igamu hato na enoni i maveta. Hagarahasia ma hagahigasia tare, ki bê ki arâ.

⁶¹Visia raha na Araha, igamu na Isiraelita na kariana. Hagarahasia ma hagahigasia tare, ki bê ki arâ.

⁶²Visia raha na Araha, igamu na mane ni vogasiha iana. Hagarahasia ma hagahigasia tare, ki bê ki arâ.

⁶³Visia raha na Araha, igamu na kariana mu tagara tanga. Hagarahasia ma hagahigasia tare, ki bê ki arâ.

⁶⁴Visia raha na Araha, igamu na enoni mu toto suria. Hagarahasia ma hagahigasia tare, ki bê ki arâ.

⁶⁵Visia raha na Araha, igamu na enoni mu haritagi. Hagarahasia ma hagahigasia tare, ki bê ki arâ. Visia raha na Araha, igamu na enoni mu tê viteana tare. Hagarahasia ma hagahigasia tare, ki bê ki arâ.

⁶⁶Ge visia raha na Araha, igia Hanania, Asaria mo Misaele. Ngaia ki hagatahigia tenia na matahu, ma ki hagatahigia tenia na raramohana na mera. Ngaia ki toregia hura tenia na baga gi raha ma ki hagatahigia tenia na anguruna na gi ramo.

⁶⁷Ge visia koro na Araha renia na korohana, suria na takuiha iana ki asa, vige page hato.

⁶⁸Hagarahasia na Araha, igamu hato na enoni mu rahesia. Visia koro ma visia raha na Araha God i teha, suria na takuiha iana ki asa, vige page hato.