Read Kahua SUSANA 1 Bible Online

SUSANA 1 - Kahua bible

SUSANA 1

¹I ta na tangiana i Babilone ki oga igê ta na mane, ga hêtana vi o Joakimo.

²Kaniana kani ka Susana, ka karena o Hilikia. Ka Susana ngaia ka na gete i bâkoro era, ma ki toto suria maninga God.

³Na enana ka na Siu, garu oto suria maninga na rotu ma karu hagesuria ka kareterua, ki râ surigi na ramata igê na buka iana o Moise.

⁴O Joakimo, na mane iana ka Susana, ki ruruguha bâraha. Na baga mu raha ni mahe ma ni apinige, na agua tanga ga barebare igê ma ka hagamamava igê, ki rihia na ruma iana. Hagarako na ani getera na Siu ka hakuhaku i pasina o Joakimo, hanana ga mehetamatamasi, suria ga hagahigasia ngavê.

⁵I pe arihu râ, ma ka atererua na meraha gi rua i berarogata na enoni, hanana garu vora re na mane ni hagatamasiha. Ngaira ka na enoni, na ani na Araha ki bani tamasi renira, ki vi: “Na eraha ki haganega i Babilone, i pasita na meraha: na mane ni hagatamasiha i asa vige bêngenira bâkoro hete na enoni.”

⁶Na vererua ngegana karu arâ tare i ruma iana o Joakimo, na ruma ga hagatamasi tare igê. Ngaira hato, ga togâni na tarani ni hagatamasiha, ka arâ i ngekana.

⁷Igê na ara ni ritovagani, matena na enoni hato ka aporoporo i pasita tanga ga ngêngê, ka Susana ki arâ tare, ki barebare igê na mu ni mahe ngekana.

⁸I na ara ni tangiani na meraha gi rua ngegana karu gâga karia ma karu hahutugia, matena i arâ ma na matena i aporo me igê, suria garu tenia ngavê.

⁹Na teniha ki aharêsirerua ngavê. Tahema ngairerua karu pe botage renigi na hagarahenga ma na tagaraha iaterua, vigaru hagatamasi igê na otoha.

¹⁰Na ara ni hitangiterua ki tenia bâraha ka Susana, ma ngairerua karu maki, vigaru hagarongorerua heri,

¹¹renigi na teniha era iaterua hegitigi.

¹²Vikana i na ara ni tangiani ngairerua karu ama ni hahutugia nga, hanana viga bâsia.

¹³I ta na ritovagana ngairerua karu hetamatamasi, karu vi: “Ge aporo, ke ngê.”

¹⁴Vikê ngairerua karu hura vê, ma karu râ hetatari. I pe arihu, ma na ara ni hitangiterua ki aporo me, hanana vi ahiahi, ki mama renia ka Susana. Ngairerua karu kakangi vê, ma karu hetarahu. Na ara ni hitangiterua ki hagatea tani ki vi: “Na ta go tabea me ikê?” Na ara ni hitangiterua ki tugupu. Tahema ngairerua karu hagarongorerua heri, vi ngairerua hato karu tenia ka Susana. Ngairerua karu harikato, vigaru naasia na matena, i araria, vigaru bâsia ngaia getea.

¹⁵Ngekana ngairerua karu naasia na matena, i araria. Ta na tangiana ka Susana ki râ me nikâ i mu ni mahe, manga bani hanana i arâ. Na kere gete tagara gi rua kani ga tage râ. Suria i mahanaga bâraha, tahema ngaia ki tabe mamanuha.

¹⁶I ngekana ki mareha rârâ igê ta na enoni, nga noga ma na meraha gi rua ngegana, garu ahi, hanana garu kikirihia.

¹⁷Ka Susana ki hagatorarerua na kere gete tagara iana, ki vi: “Muru aporo, kamuru toregi me tangê na oile ni mamanuha ma na marâ ni sigini hagatê, suria inê kê obania be mamanu. Muru girara nga, kamuru purusia na teha raha tanga na mu ni mahe, i era ma ta na enoni ki bâsiê.”

¹⁸Ngairerua karu râ, ma karu purusia na teha raha, ma karu hura igê na kere teha sisite, karu pane hura tenia na mu ni mahe, hanana vigaru totora na marâ, garu tabegi. Ngairerua karu pe hagarererua na meraha ngegana, garu ahi.

¹⁹I pusina ma na kere gete tagara karu hura vê karu râ, na maneraha gi rua, garu ahi ngegana, karu gaha râ tanga ka Susana, karu vi:

²⁰“Na teha ki purupuru. I asa ta na enoni, vige bâsigia. Igamirua kamuru tenia bâraha, vigamuru rongo era henigo. Gu aganarigamurua, kamuru megotâ.

²¹Manga i mareha, igamirua kamuru page torego igê na tamasinga, ma kamuru tohetohe, vi igamirua kamuru bâsigo, vigo hagatorangenirerua aporo na kere gete tagara iamu, ko oga getego, hanana vigo arâ henia na mane haoru.”

²²Ka Susana ki manavasua raha, ki vi: “E, i bara tangê! Manga vigê aganarigamurua, inê kê page meme renia na gamogamoha. Manga vigê usisi, inê ki asa be tahi tenia na raramohamurua.

²³Inê kê usi be rongogamurua, suria gê pe obania ve haritohea na Araha, be tasitasi, naka ma muru hagatoraiê.”

²⁴Vikana ka Susana ki ngere raha ngavê, ma na meraha ngegana karu ngere hagatoraia,

²⁵ma na hitangiterua ki tango tangagi na teha, ma ki tangahigi.

²⁶Matena na enoni tagara, ga oga i ruma, ka rongoa na ngereha i mu, ngaira ka tango râ, ka banu igê na kere teha tanga na mu, hanana ga girara, vi na ta kani tarahua ka Susana.

²⁷Na meraha gi rua ngegana karu hagatoraia ka Susana i maata na enoni tagara. Na enoni tagara ka gasuga ma ka maki, suria ka Susana ka pe rongoa rârâ henigi na tarani vigana.

²⁸Igê na tangiana i muri me, matena na enoni ka haku nikâ i ruma iana o Joakimo, na meraha gi rua ngegana karu râ nogaterua. Ngairerua karu tako nga, vigaru katoa na katoha era iaterua, hanana vigaru suria bera ka Susana ki meme.

²⁹I maata na enoni hato ngairerua karu vi: “Merâ me ka Susana, kaniana o Joakimo, ka karena o Hilikia.”

³⁰Ngaira ka merâ me. Na enana, na karena ma na goana hato ka râ me henia.

³¹Ka Susana ki na gete koro ma ki bâkoro ngavê.

³²Ngaia ki buhia na bêna ki so i maana renia na gahu, i vavararaga. Na meraha era ngegana karu haribona, ka tavoa râ na gahu tenia na bêna, hanana vigaru vagevagesia na bâkorohana.

³³Na enana, na karena, na goana ma na enoni hato ka angi, matena ga bâsia vikana.

³⁴Na meraha gi rua ni hagatamasiha ngegana karu aharaga akê i maata na enoni, karu tê buhia ka Susana, ma karu tuguria.

³⁵Ka Susana ki angi, ma ki atakê, suria i hagêguri togo renia na Araha.

³⁶Na meraha gi rua ngegana karu tamasihari suria vikê, karu vi: “Matena igamirua getegamirua kamuru barebare i mu ni mahe, na gete ngekê ki banu me henirerua na kere gete tagara gi rua iana. Ngaia ki purusia na teha raha, ma ki bonasirerua na kere gete tagara iana, karu aporo.

³⁷Ma hemuri ta na mane haoru, i bani ahi i rarona na mu, ki vaga me, ma ki râ tanga, ki metâ.

³⁸Igamirua kamuru oga igê na ariruguna na mu ni mahe, ma na matena muru bâsirerua vikana, igamirua kamuru tango râ i pasiterua.

³⁹Igamirua kamuru bâsirerua, garu paronga iera. Igamirua kamuru uhungia, vigamuru taua na mane, ma ki bara, suria i ramo teharigamirua. Ngaia ki tango tanga na teha, ki tangahia, ma ki gava vê ki râ.

⁴⁰Vikana igamirua kamuru têa na gete. Igamirua kamuru hagatea renia na mane, ma ngaia ki usi, vige hagarongogamirua renia. Igamirua kamuru tohe, vi na tamasinga iamirua ngekê ki monari.”

⁴¹Na enoni, ga haku i ngekana, ngaira ka tongesurirerua, suria ngairerua ka na enoni raha iata ma nikâ garu na mane ni hagatamasiha. Ngaira ka suria ka Susana, hanana vi meme.

⁴²Ma ka Susana ki ngere, ki vi: “God, igo ko bani oga me ma ko gâga tare, ki bê ki arâ. I mareha rârâ ta na marâ, vige pinihi tenigo. Igo ko bani giraragi na ara ni marâ, i nago tarani i vora me.

⁴³Bâ, inê kê sugi me. Igo ko girara, vi inê kê pe tugiê rârâ na tarana, garu visia. Igo ko girara, vi ngairerua karu hagatoraiê. I tanu hega kani vigê meme?”

⁴⁴Na Araha ki aganaria na nungiha iana.

⁴⁵Matena ga torea vê ka Susana, hanana viga nanahuia ki meme, God ki angaria ta na mane haoru, o Taniele na atana.

⁴⁶Ngaia ki ngere raha, ki vi: “Inê kê usi hagetage, vi ve bâsia, mu nahuia ki meme.”

⁴⁷Na enoni hato ka aharia, ka vi: “Suria i hega go vi vikana?”

⁴⁸O Taniele ki ura i maata, ki vi: “Isiraelita, i hega, mu beka? I tanu hega kani mu suria purupuru na gete na Isiraelita? Tanu hega kani mu pe tarahua i nago, vi ngaia ki kato vikana monari? Igamu ki mareha ngavê, vigamu uhungia, hanana vigamu tarahua na ta ki monari!

⁴⁹Mu hagatamasi aporo! Na meraha ngegana karu hagaparu ma igê na tamasinga iaterua.”

⁵⁰Hoi, na enoni hato ka rêrête ka aporo i ruma ni hagatamasiha. I ngekana na enoni raha ka vi tanga igê o Taniele, ka vi: “Râ me, ku oga so henigami, ma ku ramatenia tangagami na takoha iamu, suria God ki katogo, ko tako mataha.”

⁵¹O Taniele ki tamasi tangara, ki vi: “Mu tora hetatari renirerua na meraha na mane ni hagatamasiha, ma be hagatererua hegitigi.”

⁵²Ma hemuri o Taniele ki unia me na hitangiterua ma ki vi tanga, ki vi: “Igo ka na meraha ni eraha. Igo ko togâni na meni na tasi iamu.

⁵³Igo ko surira bera na enoni. Igo ko hagatotongora na ani, ga oga suri parongata, ma na ani, ga bagaparongata hete, ko nakara ma vê, henaka vi na Araha ki vi, siana ko hagamesira na enoni, i koro ma ki oto na parongata.

⁵⁴Manga vi igo, ma ko bâsia monari ka Susana henia na mane haoru, hoi, gu visia me: Igê na hunana na apinige ta kani go bâsirerua, garu rongo era igê?” Ngaia ki arami, ki vi: “Igê na hunana na kere gahiga.”

⁵⁵O Taniele ki vi: “Koro era! Na hagaparunga iamu ki apariri tangago so maremu, ko meme. God ki bani bonasia na angero iana, hanana i reterete vurusigo.”

⁵⁶O Taniele ki haribona, ka torea vê na ani ngekê na meraha, ma ka torea me nikâ na ruata na meraha. O Taniele ki tamasi tanga, ki vi: “Igo na eragani nuni! Igo na Siu, ma ki tanu hega, ko usurira na Kananita? Na bâkorohana na gete ngekana ki uhungigo, ma na teniha era ki aharêsigo.

⁵⁷Igamurua kamuru bani kato me vikana henira na gete na Isiraelita, suria ga magutenigamurua ngavê. Ma ngaia ma ikê ka na gete na Isiraelita i usi, vige aganaria na teniha era iamurua.

⁵⁸Hoita, gu visia me: Igê na hunana na apinige ta kanigo bâsirerua, garu rongo era igê?” Ngaia ki arami, ki vi: “Igê na hunana na angari raha.”

⁵⁹O Taniele ki vi: “Koro era! Na hagaparunga iamu ki apariri tangago so maremu, ko meme. Na angero iana God ki bani nanê, hanana i reterete vurusigo renia na tatapa borahu iana, ma ki hatungigamurua ngavê.”

⁶⁰Vikana na enoni hato ka ngere raha, ma ka hagarahasia God, i hagatahira na ani, ga hagêguri togo renia.

⁶¹Ngaira ka apariri tangarerua na meraha gi rua ngegana, suria o Taniele ki hagatanga monari renirerua, vi ngairerua karu tohe vero.

⁶²Na ramata iana o Moise ki vi, ga hagahatungira nga na enoni, ga tohetohe vero, renia na hagaitangiha, ga harikato renia na ani, vi ga hagatoraia. Tahema ka nahuirerua karu me, ma ka hagatahia na gete i matarotaro ngekana.

⁶³Na enana ka Susana, ma o vaniana, ma na goana ngaira ka hagarahasia God, suria ga tarahua, vi ka Susana ki pe katoa rârâ na tarana, na meraha karu hagatoraia renia.

⁶⁴Haganega tenia i ngekana o Taniele ka hagahigasia ngavê.