Read Kahua ESEKIELE 11 Bible Online

ESEKIELE 11 - Kahua bible

ESEKIELE 11

¹Na raramohana God ki angariê, ma ki rageê akê, ma ki toreê tanga na maani Ruma ni Rotu, i maa bêkê. I ngekana inê kê bâsira igê na mane tangahuru gi rua matara gi rima. I berarogata nikâ karu oga igê o Jasania karena o Asure ma o Palatia karena o Benaia. Ngairerua ka na maneraha iata na enoni.

²God ki vi tangê, ki vi: “Igo, karena enoni ma, na mane ngegana ka harikato renigi na tarani era, ma ka bêngenira bera na enoni i hinua.

³Ngaira ka vi, ‘I arihu mênga ma ka kahu totora ruma nikâ. Na hinua ki manga na kuki, ma igia ka manga na ganiani i rarona. Manga ngaia hete kani hagabarasia na gi tenigia.’

⁴Hoi, igo karena enoni ma, gu ranganira.”

⁵Na raramohana na Araha ki angariê, ma na Araha ki hagatorê, kê tamasi tangara na enoni vikê: “Ai ni Isiraele, inê na Araha, inê kê bani giraragi na tamasinga iami ma na katoha iami.

⁶Igamu kamu bani nahuira ka me rako na enoni, ma na gahuata ka manasigi na tara i hinua.

⁷“Tahema inê na Araha God kê vi tangagamu, kê vi: I monari, na hinua ikê ki manga na kuki. Ma ti na ganiani tanga na kuki? Ngaira ka na gahuata na enoni, mu bani nahuira. I asa vigamu oga nikâ ikê i hinua. Inê kê paigamu hura.

⁸Igamu kamu magutenia na henahuita, iê? Hoi, be katoa na henahuita ke tarahugamu!

⁹Inê be toregamu hura tenia na hinua, ma be mahatangenigamu tangara na me mamahuara. Inê kê bani surigamu, vigamu meme. Inê be hagaitangigamu.

¹⁰Igamu kamu meme igê na henahuita so ma igê na apanena iami maremi. Vikana na enoni hato ka page tahetara reniê, vi inê ka na Araha.

¹¹Na hinua ikê i Jerusaleme ki asa, vige anumasigamu, mangagi na ganiani, ga oga bâkoro igê na kuki. Inê be hagaitangigamu so igê na apanena iami maremi, naka ma i na agua ma i he i Isiraele.

¹²Igamu kamu page tahetara reniê, vi inê ka na Araha. Igamu kamu aharêngigi na ramata iaku, ma kamu pe râ surigi na tamasinga iaku hete, ma kamu râ surigi ma na anita na ai mahuara i na agua rihigamu.”

¹³Matena gê ranganira mênga, ma o Pilatia karena o Benaia ki apuri ki me. Inê kê tubê so i ano, ma kê ngere, kê vi: “Araha God, siana! I hega, igo ko mutera nikâ vari na kere Isiraelita, na ani ga hita so?”

¹⁴Na Araha ki tamasi tangê, ki vi:

¹⁵“Igo, karena enoni ma, bâ, na enoni, ga oga i Jerusaleme, ka tamasi tangagamu, igo ma na goamu ma na enoni, ga bani henahuraura henigo, ka vi: ‘Mu oga ma vê, hagatê tenia na Araha, suria ngaia ki bani haganahunigami renia na agua.’

¹⁶Hoi, gu hagarongora na enoni, ga bani henahuraura henigo, renigi na tamasinga iaku. Inê na Araha God, inê nga kê hagatorangenira tangagi na agua hagatê ma kê tokorenira surigi. Henaka i manga ngekana, ma ngaira ki ararira, viga rahesiê igê na agua, ga oga igê i ngekê.

¹⁷“Gu hagarongora renia na suruha iaku tangara. Inê na Araha God, inê kê suru, vi inê nga kani gê page torera hura tenigi na agua, gê tokorenira surigi, ma kê page hagahakura me i Isiraele, gê page haganahunira aporo renia.

¹⁸Matena ga aporo me, ki tuguhira, viga kasigi râ na ara ni nunuta na ataro, ga tarahugi i ngekana, suria ga hagaerasira na enoni, ma inê kê kitenigi ngavê.

¹⁹Inê be urusigi na parongata ma na aitangihata renigi na ani haoru. Inê be urusia na guguruganiha iata renia na tê vitana.

²⁰Vikana ngaira ka page marupegi na ramata iaku ma ka page tototo surigi maninga na tamasinga iaku. Ngaira ka page voravora re na kariaku, ma inê na God iata.

²¹Inê be hagaitangira na enoni, ga vogasira na ataro, ga hagaerasira na enoni, na ataro gê kitenira ngavê. Inê be hagaitangira meni na bagatauhata. Ngaia kani gê visia, inê na Araha God.”

²²Na angero ka gasigi na gagahata ma ka gaha vê, ma na wili nogani ka râ henira. Na God raramohaga hunia iata na Isiraelita ki oga i avorata.

²³God raramohaga hunia ki pania na hinua ma ki râ tanga na hungana i na apanena akê na hinua.

²⁴Igê na maruteha iaku na raramohana God ki toreê akê ma ki meê aporo tangara na enoni, ga bani henahuraura ka oga i Babilonia. Ma na maruteha ki hato.

²⁵Ma hemuri inê kê hagarongora na enoni ngegana renigi na ara ni marâ, na Araha ki kahu hagabâsiê renigi.