Read Kahua ESEKIELE 12 Bible Online

ESEKIELE 12 - Kahua bible

ESEKIELE 12

¹Na Araha ki tamasi tangê, ki vi:

²“Igo, karena enoni ma, igo ko oga i guputa na enoni, ga guguruga ngavê. Ngaira ka tonga re maata, ma ki asa, vige bâbâ tarata. Ngaira ka tonga re karingata, ma ka guguruga. Ngaira ka togeaga ngavê.

³“Hoi, igo karena enoni ma, gu maramare nuni, i gava tenia i pasina. Gu hagarurugu ma ku gava tenia ikê. Gu tavoraha i maata igê na tangiana. Manga ga bâsigo, ngaira ka kahu urisi parongata vari, suria ga guguruga bâraha.

⁴Gu hagarurugu igê na tangiana, hanana ngaira ka bâsigo, ma igê na manurahi ko kahu tavoraha i maata, manga vi igo ka na enoni, i gavagava tenia i pasina.

⁵Go tahatahakurua i maata na apê i ruma iamu ma ko migisiva hura igê na toraha iamu.

⁶Go raragea na toraha iamu ma ko naka i gaparamu i maata, ma ko tavoraha igê na roto. Gu buhigi na maamu, hanana go pe bâbâ taramu. Na tarana ngekana ki na girarana, vi inê kê haganunura igê na Isiraelita.”

⁷Inê kê râ suria manga hanana i bonasiê na Araha. Igê na tangiana ngekana inê kê hagarurugu manga na enoni, i gavagava pania i pasina. Matena i mamaru me, inê kê tahakurua hura na apê renigi na rimaku, ma kê hura igê. Ma i maata na enoni inê kê naka na toraha iaku i gaparaku ma kê râ.

⁸I tangi kê vê, ma na Araha ki tamasi tangê, ki vi:

⁹“Igo, karena enoni ma, i hega, na Isiraelita guguruga ngegana ka hagatego vari renia vi na ta kani go katoa?

¹⁰Go aramira, ko vivi, vi na tarana ngekê ki na haganunuha iana na Araha God tanga na maneraha, i marungia i Jerusaleme ma tangara na Isiraelita i ngekana.

¹¹Go hagarongora, vi na tarana, go katoa ngekana, ngaia ki na girarana na marâ, i page tarahura. Ngaia ki na haganunuha tangara. Ngaira ka page oga igê na agua getigi, ga page henahuraura tange.

¹²Na maneraha, i marungira, ki page naka na toraha iana i gaparana igê na bungiana, ma ki page siva hura igê na makuruha igê na apê, ga tahakurua tanga. Ngaia ki page buhigi na maana, hanana vi siana ki bâbâ tarana.

¹³Ma inê be kasia na hugo huria ma be tugia. Ma i hemuri be torea tanga na hinua i Babilone. Ma ngaia ki page meme i ngekana, ma mareha vige rigia Babilone.

¹⁴Inê be tokorenira rârâ na kariana hato, ma na mane ni hagaotonga iana, ma na mane ni anumasiha iana, ma na merongata ka page tarigenira renigi na tatapa borahu.

¹⁵“Matena gê tokorenira surigi na agua hagatê, ngaira ka page tahetara reniê, vi inê ka na Araha.

¹⁶Inê be hagatahira tani ma tenigi na hearihatana, na magêha ma na ringa. Ma i ngegana igê na agua hagatê ngaira ka page tahetara renigi igê na bagatarihata, vi ngaira ka erataga ngavê, ma ka page tahetara nikâ reniê, vi inê ka na Araha.”

¹⁷Na Araha ki tamasi tangê, ki vi:

¹⁸“Igo, karena enoni ma, go tatata, matena go ngêngê. Gu bubununuga, matena go totono na ve.

¹⁹Go vi tangara na enoni hato igê na agua, ko vivi, vi na enoni, ga oga mêngara i Jerusaleme, ka page manga ngekana, suria na tarana ngekana inê, na Araha God, inê kê haganunura igê. Ngaira ka page tatata, matena ga ngêngê. Ngaira ka page bubununuga, matena ga totono na ve. Ga ruhuruhua na apanena hagenani iata, suria na enoni igê ka bagatarihata.

²⁰Ka page aruhuruhu na hinua, ga gahu igê na enoni, ma na agua ki page hihiruga. Vikana ngaira ka page tahetara reniê, vi inê ka na Araha.”

²¹Na Araha ki tamasi tangê, ki vi:

²²“Igo, karena enoni ma, tanu hega na Isiraelita ka vivi tare, vi ‘Na haganunuha ki bani râ me, ma ki tanu hega ki pe vaga mave me?’

²³Gu hagarongora renia na takoha iaku, inê na Araha God, renia na tamasinga ngekana. Inê be hatungia na tamasinga ngekana. I asa na ai ni Isiraele, vige page tamasi nikâ vikana. I ngekê nga ki na matena, ga vagavaga me igê na haganunuha.

²⁴Na Isiraelita ki hato, vige page marute hagaparu nikâ, se vige haganunu hagaparu nikâ.

²⁵Inê na Araha be tamasi tangara, ma na tamasinga iaku ki page vagavaga me monari! I asa vige hagarihu. Igamu na enoni, mu guguruga, igamu maremi kamu page bâsiê, gê hagamonarigi na haganunuha iaku. Ngaia kani gê visia, inê na Araha God.”

²⁶Na Araha ki vi tangê, ki vi:

²⁷“Igo, karena enoni ma, na Isiraelita ka takusia ma, vi na maruteha ma na haganunuha iamu ka hagatê me mênga.

²⁸Tahema gu hagarongora, vi inê, na Araha God, kê vi: I asa vige hagarihu. Na tamasinga iaku ka page vaga me mave. Ngaia kani gê visia, inê na Araha God.”