Read Kahua ESEKIELE 14 Bible Online

ESEKIELE 14 - Kahua bible

ESEKIELE 14

¹Tani na enoni raha iata na Isiraelita ka râ me, ka hagateê renia na obaniha iana na Araha.

²Ma na Araha ki tamasi tangê, ki vi:

³“Igo, karena enoni ma, na enoni ngegana ka hagarapera na ataro i mêrihata hagenani, ma na ataro ka hagatasira bâraha. Ga vi ngaira vari, vi inê kê page aramira?

⁴“Hoi, gu tamasi tangara, ku hagarongora renigi na tamasinga iaku. Inê, na Araha God, kê vi vikê: Na ara ni Isiraelita, i hagarapera na ataro i mêrihana hagenani, ma ki hagamarumungenira ka hagatasia ngavê, ma ki kahu rongoa na poropete, hoi ngaia ki page rongoa na aramiha iaku, na aramiha i ararira rako na harasina.

⁵Na ataro hato ngegana ka bani tora paririra na Isiraelita teniê, ma inê kê takusia, vi na aramiha iaku ki page katora, ka tototo suriê aporo.

⁶“Tahema gu hagarongora na Isiraelita renigi na tamasinga iaku. Inê na Araha God kê arami vikê, kê vi: Mu kasira râ na harasimi, gê kitenira ngavê. Mu urisi parongami, ma kamu tototo suriê aporo.

⁷“Na ara ni Isiraelita, se na enoni mahuara i berarogata, ki kasiê ma ki hagarapera na ataro i mêrihana hagenani ma ki vogasira, ma ki kahu hagatea na poropete, hoi, inê na Araha be aramia!

⁸Inê be merongasia! Inê be hagaitangia be hagagirarara na enoni. Inê be paia hura tenia na haku iata na kariaku, hanana igamu kamu page tahetara reniê, vi inê ka na Araha.

⁹“Manga ta na poropete, ma ki arami igê na aramiha, i pe monari, ki mareha vi na enoni, kani ge hagaparua, ma inê nga hete na Araha kani gê katoa vikana. Inê be merongasia ma be paia hura tenia na haku iata na Isiraelita.

¹⁰Ngairerua na poropete ma na ani i rongoa, karu page kasikasi meni na bagaparongaterua, suria garu tasi.

¹¹Inê be kato vikana, hanana siana na Isiraelita ka kasikasi reniê, ka tasitasi, ma ka hagaerasira mareta. Ngaira ka page vora re na kariaku ma inê be God iata. Ngaia kani gê visia, inê na Araha God.”

¹²Na Araha ki tamasi tangê, ki vi:

¹³“Igo, karena enoni ma, manga ta na marê, ma ki kasikasi reniê, ma ki pe tototo suriê, inê be merongasia. Inê be hagamagahurugi na ngêra iata. Inê be katoa na magêha, ke tarahura ma ke mutera na enoni ma na togoha iata.

¹⁴Henaka vi na mane koro gi oru o Noa mo Taniele mo Joba, i rongo raha na atata, ga oga i ngekana, hoi, na korohata ki asa, vige hagatahira na enoni i ngekana, nga noga ma ngaira so mareta. Ngaia kani gê visia, inê na Araha.

¹⁵“Ata ni vi ma: Manga vi inê, ma be hagatorangenira na marâ vasiga, ga garagara hunu, hanana ge hagamesira na enoni, ma na agua ke hagamamaguraga, ma na enoni ke bara, vige râ igê,

¹⁶henaka vi na vera oru ngegana ma ke oga igê, ngaira ki bara tangara, vige hagatahira na enoni i ngekana, naka ma vi na kareta mareta, nga noga ma ngaira so mareta. Na agua ki page hihiruga. Ngaia kani gê visia, inê na Araha God mamauri.

¹⁷“Se manga vi inê, ma be katoa na hearihatana, ke tarahua na agua ngekana, ma be bonasira na mane ni me ke ruhuruhua ma ke mutera na enoni igê ma na togoha iata,

¹⁸henaka vi na vera oru ngegana ma ke oga i ngekana, ngaira ki bara tangara, vige hagatahira na enoni, naka ma vi na kareta mareta, nga noga ma ngaira so mareta. Ngaia kani gê visia, inê na Araha God mamauri.

¹⁹“Manga vi inê, ma be kasia na ringa igê na agua ngekana, suria vi ve mangariaga ngavê tanga, ma be hagamesira rako na enoni igê, ma ke mute na enoni ma na togoha iata,

²⁰henaka vi o Noa mo Taniele mo Joba ma ke oga i ngekana, ngaira ki bara tangara, vige hagatahira na enoni, naka ma vi na kareta mareta. Na korohata ki hagatahira ngaira so mareta ma. Ngaia kani gê visia, inê na Araha God mamauri.

²¹“Mu rongoa na takotako iaku. Inê, na Araha God, inê be hagaitangia i Jerusaleme renigi na hagaitangiha ge he, na ani ga erataga ngavê. Ngaigi ka na henahuita, na magêha, na marâ vasiga ga garagara hunu, ma na ringa. Ngaigi ki page mutera na enoni ma na togoha iata.

²²Manga viga tahitahi ta kere ani henira na kareta, matena ga gavagava tenia i Jerusaleme ma ka arâ me tangagamu, ma igamu kamu rongogi na bagatauhata, igamu kamu girara, vi na hagaitangiha iaku tanga i Jerusaleme ki na tarana, i oto.

²³Vikana igamu kamu tahetara renia vi na tauhaku ki tonga hunana. Ngaia kani gê visia, inê na Araha God.”