Read Kahua ESEKIELE 17 Bible Online

ESEKIELE 17 - Kahua bible

ESEKIELE 17

¹Na Araha ki tamasi tangê, ki vi:

²“Igo, karena enoni ma, gu tamasi maramaraveta tangara na Isiraelita ma ku hagahira.

³Gu tamasi urusiê tangara, ko vivi: “Ta na matena ki oga na baga ahetaronga raha, i tonga na gagahana raha ngavê, i borahu era na taretareni. Na varehuna ki bâkoro ma ki totoperega. Ngaia ki gaha tangagi na hungani i Libanone ma ki gara barugia na bêna na apinige raha.

⁴Ngaia ki migi gaha na gokoni tanga na hinua igê na agua hagatê, na hinua iata na enoni ni hagavaraha haga.

⁵Ma hemuri ngaia ki torea na varo ni vaini tenia na apanena iata na Isiraelita, ma ki hasia igê na mako koro, i ango, igê na mu magarohaga i papana na ve.

⁶Na varo ngekana ki vavaka bâkoro, i abubu ma ki arubebe so ma. Na arani ka ono râ tanga na ahetaronga. Na vagani ka so ngavê i ano. Na bâguni ka bâgo ma ka suru.

⁷“Hoi, tani nikâ na baga ahetaronga raha. Na gagahana karu bagararaha ngavê. Na varehuna ki upupuga. Na varo ni vaini ki ono râ tanga. Na arani ma na vagani nogani tenia na mako, ga hasia igê. Ngaia ki obania, vi na ahetaronga ke manuhia.

⁸Ma ngaia ki bani oga igê na mako koro, i ango, igê na mu magarohaga i papana na ve, hanana vi akê, ki baugo, ma ki surusuru, ki hunguhungu ma ki voravora re na vaini mora.

⁹“Hoi, inê na Araha God be hagatego. I hega, na varo na vaini ngekana i girara vari, i mauri ma ki akê bâkoro? I hega, na ani i nago na ahetaronga, ngaia ki ragea vari henigi na vagani? Ngaia ki tupitupi husigi vari na guani? Ngaia ki garagara barugigi vari na arani, i suru, hanana vi maugu ma ki maria? I mataku ma, viga ragea henigi na vagani. I pe arari, vige harigogo tanga.

¹⁰I monari, ga bani hasia i ngekana. I page mauri ma ki page akê vari? I page meme vari, matena na roga mahana tenia i kerekê ki hitaria? I meme vari igê na agua, ga hasia igê?”

¹¹Na Araha ki vi tangê, ki vi:

¹²“Gu hagatera na enoni guguruga ngegana, manga vi ngaira ka girara na girarana na maramaraveta ngekana. Gu hagatakusira renia na maneraha ni Babilonia, i râ me i Jerusaleme ma ki henahuraua na maneraha henira na tamana tanga i Babilonia.

¹³Ngaia ki atea ta na raraha iana na maneraha, ma ki naka na suruheri iana henia, ma ki katoa, ki tohe, hanana vi tototo suria. Ngaia ki henahuraura na enoni raha,

¹⁴hanana vi siana na enoni ka usisi nikâ, vige gâga i ruguhana, ma ka tototo suria so ma hete ngaia.

¹⁵“Ma na maneraha ni Juta ki ura pusia, ma ki hagatorangenira na kariana tanga i Esipito, ka nungira na hosi ni me ma na mane ni me gahu. I hega, ngaia ki page togo vari na takotako iana? I hega ngaia ki girara vari, vi katoa vikana? Ngaia ki bara tanga, vige aharêngia na suruheri ma ke tahi tenia na hagaitangiha.

¹⁶“Inê na Araha God mamauri, inê kê vi, vi na maneraha ngekana ki page me i Babilonia, suria ngaia ki aharêngigi na tohenga iana ma na suruheri iana henia na maneraha ni Babilonia, i kasia ki maneraha.

¹⁷Henaka, ma na maneraha ni Esipito henira na mane ni me gahu iana, ki asa iata, vige tamania igê na henahuita, matena na me ni Babilonia ka toregi na bebetehe ma ka tagarahigi na âpavoro, hanana viga mutera na enoni.

¹⁸Ngaia ki aharêngia na tohenga iana ma ki pe râ suria na suruheri iana. Ngaia ki katogi na tarani ngegana, tahema i asa vige tahi.

¹⁹“Tahema inê na Araha God, inê kê tohe, vi inê kê page hagaitangia, suria i aharêngia na suruheri, i tohe reniê, vi tototo suria.

²⁰Inê be hugoa, ma be torea tanga i Babilonia, ma be hagaitangia i ngekana, suria ngaia ki pe toto suriê.

²¹Na mane ni me ramo iana ka page me igê na hearihatana, ma na ani, ga tahitahi mêngara, ka page totoko surigi na ara ni agua. Me hemuri igamu kamu page tahetara reniê, vi inê ka na Araha, kê hagamonaria na tamasinga iaku.”

²²Na Araha God ki tamasi, ki vi: “Inê be barugia na gokona na arana i geregerena na apinige raha. Inê be hasia igê na barana,

²³na barana i akê ngavê i Isiraele. Ngaia ki page baugo ma ki page hunguhungu, ma ki page voravora re na apinige koro ma ki borahu. Na ani mavê na manu ka page tagetage ma ka beabea ma ka roborobo igê.

²⁴Na apinige hato igê na agua ka page tahetara reniê, vi inê ka na Araha, gê tapigi so na apinige, ga borahu ma kê katogi na ani, ga abubu, ka borahu. Inê kê hagamariagi na apinige, ga mauri, ma kê hagamêrigi na apinige, ga maria. Ngaia kani gê visia, inê na Araha, vi inê kê hagamonarigi.”