Read Kahua ESEKIELE 19 Bible Online

ESEKIELE 19 - Kahua bible

ESEKIELE 19

¹Na Araha ki bonasiê, kê kiria na ki ni hetakiha ikê renirerua na maneraha ni Isiraele.

²Kenamurua ki na laione, i bâkoro ngavê. Ngaia ki mera tâ na karena, na bêhâgata ramo ngavê.

³Ngaia ki atea na hitangita na karena, ma ki marupea, ki raha ma ki ramo. Ngaia ki hagesuria, ki gagari ma ki ngasingasi enoni.

⁴Na enoni i maveta ka rongo tarohana ma ka harikato renia. Ngaira ka suta karia ki vota igê. Ngaira ka area ma ka oke babahenia tanga i Esipito.

⁵Na kenana ki nanasi tanga rârâ ma ki tako bare so. Ma hemuri ki atea na ruata na karena ma ki marupea, ki raha ma ki ramo.

⁶Ngaia ki vora na laione, i ramo teharira na tamana. Ngaia ki hagesuringenia, hanana i gagari ma ki ngasingasi enoni.

⁷Ngaia ki hogegi na ruma nganganihaga ma ki ruhuruhugi na hinua. Na enoni i na agua ka bubununuga i na ara ni matena i ngunguru.

⁸Na mane ni me i na agua getigi ka pane haku ka meheariha. Ngaira ka suta karia, ki vota igê.

⁹Ngaira ka rakua ka purusia ma ka area, ma ka torea tanga na maneraha i Babilonia. I ngekana ngaira ka purusia i ruma ni hagaitangiha ma ka bâsuria igê, hanana siana ki rongo raha nikâ na ringena igê na hungani i Isiraele.

¹⁰Kenamurua ki manga na apinige na vaini, ga bani hasia hagarangia na ve igê na mako i magarohaga. Ngaia ki suru ma ki hunguhungu bâkoro.

¹¹Na arani ka nganganihaga ma ka ararigi tanga na vatona na maneraha. Ngaigi ki borahu ki akê, ki tariha igê na vaha i vavearo. Na enoni ka konetenia, i suru ma ki borahu.

¹²Ma ta na enoni ki mangariaga ngavê, ma ki piria akê ma ki kasia so i ano. Na roga mahana tenia i kerekê ki hagamêgugi na guani. Ngaia ki barugigi na arani. Ngaigi ki maria ma ka sungigi.

¹³I ngekê ka bani hasia igê na manihê raha, igê na mako i bêratega ma ki avagavaga.

¹⁴Na apena ki tanga renia na gi. Na gi ki ngaugi na arani ma na guani. Na apena ki asa, vige page papêhu nikâ. Na arani ki asa, vige vora re nikâ na vatona na maneraha. Ngaia ka na ki ni hetakiha, ga bani kiria ki râ me.