Read Kahua ESEKIELE 2 Bible Online

ESEKIELE 2 - Kahua bible

ESEKIELE 2

¹Inê kê rongoa ta na ringe, i vi: “Igo, karena enoni ma, gu aharaga. Inê be tamasi tangago.”

²Matena i tamasi vikana, ma na raramohana God ki angariê, ma ki katoê, kê aharaga. Ma hemuri inê kê rongoa nikâ, i vi:

³“Igo, karena enoni ma, inê be hagatorangenigo tangara na Isiraelita. Ngaira ka guguruga bâraha ma ka haritoheê. Ngaira ka ama ni guguruga mênga. Ngaira ka maratorata na êvarita.

⁴Ngaira ka togeaga ngavê, ka pe hagahigasiê. Tahema, inê na Araha God, inê be hagatorangenigo. Ku hagarongora renigi na tamasinga iaku tangara.

⁵Inê kê bani girara, vi ngaira ka guguruga. Henaka vi ngaira ka têtê viteamu, se i mareha, ma ngaira hete kani ga girara, vi na poropete ki vatugira.

⁶“Igo, karena enoni ma, siana ko magutenira ngaira se na tamasinga iata. Ngaira ka page haganunugo ma ka page ruhigo. I page bâ, manga vi igo ko goga i berarogani na tone ma i berarogata na garagara pinihi. Henaka vi i manga ngekana, siana ko magutenira na eragani nuni ngegana, se vi na tamasinga iata.

⁷Gu hagarongora renigi na ara ni marâ, gê visigi tangago, naka ma ngaira ka karingago, se i mareha. Igo ko bani girara, vi ngaira ka togeaga ngavê.

⁸“Igo, karena enoni ma, gu karingagi maninga na tamasinga iaku. Siana ko guguruga mangara ngaira. Manga nga, ku ngêa na marâ, gê vatego.”

⁹Inê kê bâsia na rima, i tagarenia me tangê na buka.

¹⁰Ngaia ki tangahia, ma inê kê bâsigi na segesegeha i rarona. Ngaigi ka na hagagegeha, na hetakiha ma na mesiha.