Read Kahua ESEKIELE 21 Bible Online

ESEKIELE 21 - Kahua bible

ESEKIELE 21

¹Na Araha ki tamasi tangê, ki vi:

²“Igo, karena enoni ma, gu sira râ i Jerusaleme, igê na agua ni vogasiha, go ramonira ma ko ranganira na enoni ni Isiraele.

³Gu hagarongora renigi na tamasinga iaku. Inê na Araha God kê vi vikê: Inê ka na merongami. Inê be amuria akê na tatapa boraha iaku ma be mutegamu renia, igamu hato, na ani koro ma na ani era.

⁴Inê be ahurara na enoni hato i Isiraele me Juta.

⁵Na enoni hato i maveta ka page girarê, vi inê na Araha kani gê amuria akê na tatapa borahu iaku, ma ki asa be naka aporo igê na angana.

⁶“Igo, karena enoni ma, gu gege. Gu gege manga na enoni i nahuia na takoha. Gu gege igê na mamasiaganiha iamu i maata na enoni.

⁷Manga vi ngaira, ma ka hagatego, ka vivi, ‘Vego na ta ki katogo?’ hoi, go aramira, ko vivi: Na rongoha era ki hatara me noga. Matena i mataro me, na enoni hato ka page bubununuga. Ngaira ka page arikuku na apeta. Ngaira ka page anumanuma bâraha, ma ki page tatata na burunigata. Hoi, i mataro me! Ngaia nga! Ngaia kani gê visia, inê na Araha.”

⁸Na Araha ki vi tangê, ki vi:

⁹“Igo, karena enoni ma, gu tamasi poropete. Gu tamasi urusiê, inê na Araha, ku vi: “Na tatapa borahu, na tatapa borahu i maniniaga ma ki masi ngavê.

¹⁰Ngaia ki masi ni ahuranga, i maniniaga ma ki maromarora manga na marangea i hetakiri. I mareha na matena ni vagevageha. Na kareku ki pe marâ na apeta renigi na haganunuana na hagaitangiha.

¹¹Na tatapa borahu, i masi maniniaga, ki nanê ni tahurunga. Ngaia ki masi maniniaga ma ki nanêa na manero.

¹²Igo karena enoni ma, gu angi ni hetakiana. Na tatapa borahu ki tâ tangara na kariaku ma tangara na enoni raha hato i Isiraele. Ngaira ka page mutemute ngavê henira na kariaku hato getera. Ge ruruhi na apemu, suria go tako borâ so ko oga.

¹³Inê kê hagagirarara na kariaku, ma ki manga viga pe tangahurira na tarani hato ngegana ka page tarahura. Ngaia kani gê visia, inê na Araha God.

¹⁴“Igo karena enoni ma, gu tamasi poropete. Gu hita baro, ma na tatapa borahu ki tahutahuru surigo, na tatapa borahu ni nahu hunu, ni maguha ma ni niniha.

¹⁵Ngaia ki hagamagusira na kariaku ma ki hagavotarira. Ngaia ki ahurara na enoni i hinua iata. Na gahuata ka manasigi na tara. Ngaia ki maromarora manga na marangea ma ki maniniaga ni nahu hunu.

¹⁶Tatapa borahu, go masi maniniaga ngavê. Gu tahuru heriri. Gu tahuru mavê.

¹⁷Inê nogaku be hita baro ma ke hato na mangariaganiha iaku. Ngaia kani gê visia, inê na Araha.”

¹⁸Na Araha ki tamasi tangê, ki vi:

¹⁹“Igo, karena enoni ma, gu naka na giraraterua na tara gi rua, na maneraha ni Babilonia ki girara, i migirâ me igê na tatapa borahu iana. Go hagêrasia na u na giraraha igê na agua, garu matanga igê na tara.

²⁰Ta matangana ki ususu râ tanga i Raba, na hinua raha iata na Amorita, ma ta matangana ki ususu râ tanga i Juta, tanga i Jerusaleme, na hinua nganganihaga.

²¹Na maneraha ni Babilonia ki ura hagarangia na u na giraraha igê na matangana na tara. Ngaia ki ngingigi na mage, ki matu, ma ki bâ igê na rokona na ganiana ni vogasiha, hanana vi girara, vi na ani ta na hitangiterua na tara kani arâ igê.

²²Hoi, na rimana na otona ki here igê na mage na giraraha, i usu râ i Jerusaleme. Ngaia ki na girarana, vi ngaia ki arâ nga i Jerusaleme, ma ki tagarahigi igê na bebetehe, ma ki ngerengere ni hearihatana, ma ki tahatahakurugi na maani para igê, ma ki ukugi na mako, ma ki tagarahigi na âpavoro.

²³Na ai ni Jerusaleme ki bara, vige tongesuria na haganunuha, suria ga bani nakagi na suruheri. Na haganunuha ngekana ki hagagirarara, vi na maneraha ki page ranganigi na eraha iata ma ki page henahuraura.

²⁴Hoi, inê na Araha God kê vi vikê: Na tasi iami ka vaga mave. Na enoni hato ka giraragamu, vigamu erataga. Na oganiha iami ki hagabângenigi na bagatarihami. Inê kê bani surigamu, ma kê mahatangenigamu tangara na merongami.

²⁵“Ma igo, maneraha ni Isiraele, igo ko erataga ngavê. Igo ko bagaparongamu ngavê. I sugi hato iamu. I sugia ma na tangiana, i page tarahugo igê na hagaitangiha.

²⁶Ngaia kani gê visia, inê na Araha God. Gu tavoa râ na gahu i bêmu. Gu kasia râ na tarepuri i raemu. Na ara ni marâ hato ka heurusige. Ga kasira akê na enoni purua, ma ka kasira so na enoni raha.

²⁷Aruhuruhunga! Aruhuruhunga! Inê be ruhuruhua na hinua i Jerusaleme, ma hagenago tarana ki page arâ me na ani, gê bani atea, hanana i hagaitangia igê na hinua. Inê kê page vatea nga na ramoha, hanana i henahuraua.”

²⁸Na Araha God ki tamasi tangê, ki vi: “Igo, karena enoni ma, gu tamasi poropete. Gu hagarongora na ai ni Amone renigi na tamasinga iaku. Go vi tangara, ko vivi: “Ga bani amuria akê na tatapa borahu. Na tatapa borahu ki nanê ni nahu enoni. Ngaia ki masi maniniaga ni hagamuteha. Ga bani ratea, ki marora manga na marangea.

²⁹“Na hagamarutehami ki pe monari. Na hinarunga iami ka na hagaparunga ma. Igamu kamu erataga ngavê ma kamu bagatarihami. I sugi hato iami. I sugia ma na tangiana, i page tarahugamu igê na hagaitangiha. Na tatapa borahu ki page reterete ngurigamu.

³⁰“Naka aporo na tatapa borahu igê na angana. Inê be surigamu igê na agua, mu vora igê i pasimi.

³¹Igamu kamu page hatamia na mangariaganiha raha iaku. Ngaia ki page tarahugamu manga na vavatana na baga gi raha. Inê be mahatangenigamu tangara na me, ga page hagatavatavagamu. I asa vige hetaki.

³²Na gi ki page ngaugamu. Na gapumi ki page berasia na apanena hagenani iami. Ma na enoni hato ka page hitenigamu. Ngaia kani gê visia, inê na Araha.”