Read Kahua ESEKIELE 24 Bible Online

ESEKIELE 24 - Kahua bible

ESEKIELE 24

¹I na tangahuruta na tangiana igê na tangahuruta na hageha igê na sivata na harisi ga henahuraugami, kami oga surigi i Babilonia, na Araha ki tamasi tangê, ki vi:

²“Igo, karena enoni ma, gu segea so na namba igê na tangiana i ngekê, suria i ngekê na maneraha ni Babilonia ki nanê rihia Jerusaleme, hanana vi henahuraua.

³Gu tamasi maramaraveta tangara na kariaku, ga guguruga bâraha. Gu tamasi suriê inê na Araha God, ko vi: “Naka na kuki igê na gi. Hagavunusia renia na ve.

⁴Naka na gaparana ma na kâna na ganiana i rarona henigi na surisuri koro.

⁵Tavoa na hasigona na sipi koro. Bugua na gi i ruguhana na kuki, hanana na ve ki agobogobo, ki aguburi na surisuri ma na hasigoni.

⁶“Inê na Araha God kê vi: Na hinua iata na manero ki hato iana. Ngaia ki manga na kuki, i hegahegaraga ma ka pe ratea, ke bâkoro. Ka tavogi tatage na hasigoni, mataro me ki baguru.

⁷Na nahu enoni igê ma na gapu ki berasia, ki nonga ma ka pe ahunigi, suria i gogo hurigi na hê.

⁸Inê be naka ma vê i ngekana, ke oga tatara so, hanana ge hagamangariê, be naka na siva tanga.

⁹“Inê na Araha God kê vi: Na hinua iata na manero ki hato iana. Inê mareku kê page bugua na gi.

¹⁰Me na ario! Hihisia na gi, hanana ge mamata na kuki. Ke tihu na hasigoni. Ke makaka na surisuri.

¹¹Naka na bagaruna na kuki igê na garaputa, hanana ge karekare ni sivi ma ke ahasuhasu na hehegani ma ke bâkoro aporo na kuki.

¹²Na gi ki asa, vige manigaia maninga. Tani ma na hehegani ka ahasuhasu.

¹³“Jerusaleme, na bagatauhamu ka hagaerasigo. Naka ma gê uhungia bâraha, vigê maningaigo, ma igo ko erataga mênga. I bara tangago, vigu matarotaro aporo, mataro me ko hatamia ngavê na mangariaganiha raha iaku.

¹⁴Ngaia kani gê visia, inê na Araha God. Na tamasinga iaku ki mora. I râ me noga na matena, gê hagaitangigo igê. Inê ki asa be bonotenigi na tasi iamu. I asa be hetaki. Inê ki asa be hagaitangigo sisite râ me. Inê be hagaitangigo hete meni na bagatauhamu. Ngaia kani gê visia, inê na Araha God.”

¹⁵Na Araha ki tamasi tangê, ki vi:

¹⁶“Igo, karena enoni ma, inê be parama, ma be torea tenigo na ani, go takuia bâraha ngavê. Siana ko hagagege, se vigo angiangi maramara renia, se vigo mesia.

¹⁷Siana ka rongogo, vigo matoanigo. Siana ko gorogoro bê hurigo. Siana ko tasigi râ na santele iamu, suria vigo mesia. Siana ko hagagi na asire. Siana ko harihari.”

¹⁸I mavoraro inê kê meratamasi na enoni. Ma i manurahi igê na tangiana ngekana na gete iaku ki me. Ma igê na tangiana i muri inê kê râ suria manga hanana i bonasiê na Araha.

¹⁹Na enoni ka koneteniê ma ka hagateê, ka vi: “Tanu hega go kato vikana?”

²⁰Inê kê aramira, kê vi: “Na Araha ki tamasi tangê, ma ki hagatorê,

²¹vigê hagarongogamu na Isiraelita renia na tamasinga iana ikê. Na Araha ki page hagaerasia na Ruma ni Rotu iana, mu tanga pupu renia ma kamu ageagesia. Ngaia ki na marâ manimani iami, mu makuania bâraha. Na karemi, mane ma na hehene, ga oga vê i Jerusaleme, ngaira ka page meme igê na hearihatana.

²²Igamu kamu page paronga manga inê. Siana kamu hagagi na asire. Siana kamu harihari.

²³Siana kamu gorogoro bê huri. Siana kamu tasigi râ na santele iami. Siana kamu angiangi, se angiangi maramara. Igamu kamu page mameaga, suria mu tasi bâraha. Igamu kamu page hagagege so maremi.

²⁴Vikana inê nga ka na hagararinga tangagamu. Igamu kamu page amaka surigi na parongaku. Matena i tarahugamu nga na tarana ngekana, igamu kamu page tahetara renia, vi ngaia nga ka na Araha God.”

²⁵Na Araha ki tamasi tangê, ki vi: “Igo, karena enoni ma, inê be torea vê tenira na Ruma ni Rotu, ga tanga pupu renia, na ruma manimani iata, ga makuania, ka ageagesia ma ka vagevagesia. Inê be torera vê nikâ tenira na kareta, na mane ma na gete.

²⁶Igê na tangiana ngekana ta na enoni, i tahi tenia na henahuita, ki page arâ me i pasimi, ma ki page hagarongogamu renia.

²⁷I ngekana igamu ki hato, vigamu bi igê. Igamu kamu page tamasi aporo, ma kamu page metamasi. Igê na tarana ngekana igamu kamu page vora re igê na hagararinga tangara na enoni. Ngaira ka page tahetara reniê, vi inê ka na Araha.”