Read Kahua ESEKIELE 25 Bible Online

ESEKIELE 25 - Kahua bible

ESEKIELE 25

¹Na Araha ki tamasi tangê, ki vi:

²“Igo, karena enoni ma, gu ranganira na ai ni Amone.

³Gu hagarongora renigi na tamasinga iaku. Inê na Araha God kê vi vikê: Igamu kamu manavatenira na kariaku, matena na merongata ka hagaerasia na Ruma ni Rotu iaku, ma ka ruhuruhua i Isiraele ma ka henahuraura na ai ni Juta.

⁴Tahema inê be hagamarumungenira na me igê na bagamasusu raha i kerekê, hanana ge henahuraua na apanena iami. Ngaira ka page toregi igê na hinua iata, ma ka page ogasia. Ngaira ka page ngêngê na apinige ni ngauha iami ma ka page rusigi na susuta na togoha iami, hanana ga tonomigi.

⁵Na hinua i Raba inê be katoa renia na panisi ni kamelo, ma na agua hagenani i Amone inê be katoa renia na pariki ni sipi. Vikana igamu kamu page tahetara reniê, vi inê ka na Araha.

⁶“Inê na Araha God kê vi: Igamu kamu hita baro, ma kamu ngerengere vagevage. Igamu kamu tamasi ruhira na ai ni Isiraele.

⁷Tahema inê be hagaitangigamu. Inê be mahatangenigamu tangara na me i na agua getigi, hanana ga page hanago ma ka page rurugu tenigamu. Inê be mutegamu ngavê. Igamu ki hato iami. Na apanena iami ki hato iana. Vikana igamu kamu page tahetara reniê, vi inê ka na Araha.”

⁸Na Araha God ki vi: “Na ai ni Moaba ka vi, vi na ai ni Juta ka maratorata na enoni i na agua getigi.

⁹Tahema inê be hagamarumungenira na merongata, ke henahuraugi na hinua igê na pereperegani, suria i bara tangara, viga ura barasira. Ngaira ka page ruhuruhugi nikâ na hinua, i bâkoro iata i Bete Jesimote, i Bala Meone, me Kiriataimi.

¹⁰Inê be nakara na me igê na bagamasusu raha i kerekê, hanana ge henahuraua i Moaba henia i Amone.

¹¹Vikana i Moaba ki hatohato iana, ma ngaira ka page tahetara reniê, vi inê ka na Araha.”

¹²Na Araha God ki vi: “Na ai ni Etome ka barua na siva ma ka hagamamasiagara ngavê na ai ni Juta. Tahema na hagaitangiha raha meni na siva ki ararira ngavê na ai ni Etome.

¹³Hoi, inê na Araha God be hagaitangira, ma be mutera na enoni hato igê ma na togoha hato i ngekana. Inê be ruhuruhua i Etome hagenani, haganega tenia na hinua i Temane tanga na hinua i Tetane. Na enoni igê ka page me renia na henahuita.

¹⁴Na kariaku na Isiraelita ka page urusiê ka barua na siva tanga i Etome, hanana na ai ni Etome ka page hatamia na mangariganiha raha iaku. Na ai ni Etome ka page tahetara renia na mamasiaganiha, i râ me tenia na siva iaku tangara. Ngaia kani gê visia, inê na Araha God.”

¹⁵Na Araha God ki vi: “Haganega me tenia i kere vê noga na ai ni Pilisitia ka hagatavatavara na merongata, matena ga barua na siva tangara. Ngaira ka makimaki tenira ma ka mutera ngavê.

¹⁶Tahema inê na Araha God be hagaitangira. Inê be mutera ngavê. Na hitangita, ga hita so ma ka oga igê na tarasini, inê be hagamagahurura.

¹⁷Inê be barua na siva tangara ma be hagaitangira bâraha ngavê. Ngaira ka page hatamia na mangariaganiha iaku. Vikana ngaira ka page tahetara reniê, vi inê ka na Araha.”