Read Kahua ESEKIELE 27 Bible Online

ESEKIELE 27 - Kahua bible

ESEKIELE 27

¹Na Araha ki tamasi tangê, ki vi:

²“Igo, karena enoni ma, gu kiria na ki ni hetakiha renia i Taire.

³Ngaia ki na hinua raha ni sugu ma ni manitava. Ngaia ki katogi na tagaraha ni hagavarahi haga henira na marê hagatê. Inê na Araha God kê vi vikê: “Taire, igo ko ageagesia na bâkorohamu. Igo ko vi, vi igo ko koro teha ngavê.

⁴Igo ko marungigi na asi hato. Igo ko manga na haka, i bâkoro ngavê.

⁵Na apemu ka tagarahia renigi na apinige, ga tapigi igê na hungana i Heremone. Na masi iamu ka tagarahia renia na apinige borahu i Libanone.

⁶Ga tahegi na vote iamu renigi na hata ni Basani. Na ge haruta iamu ka tagarahigi renigi na apinige ni Saipero ma ka parugi reoreoga.

⁷Na rohebana iamu ka tagarahigi renigi na gahu siki ni Esipito, ga turagi igê na marâ, i bâkoro era. Vikê ka bani bâbâgirarago râ hagatê. Na mamaruku iamu ka tagarahigi renigi na gahu, na ani koro teha ngavê, na gahu rotorotoaga memera ni Saipero.

⁸Na mane ni harutanga iamu ka na mane ni Sitone me Aravata. Na mane i pasimu ka torea na haka, suria ga manisingenia na asi.

⁹I rarona ka oga igê na mane ni Bibilose, ga manisingenigi na tahenga ma na puruha. “Na ara ni haka raha tenigi na marê hagatê ka arâ me tangago, ka hohoro.

¹⁰Na mane ni me iamu ka na mane ni Pesia, ni Litia me Libia. Ngaira ka kahugi na bêata ma na bubuhibê iata igê na apê na ruma iata i pasimu. Ngaira nga ka na ani ga katoa na atamu, ki rongo raha.

¹¹Na mane ni me ni Aravata me Geliki ka anumasigi na para, ma na mane ni me ni Gamata ka bâsurigi na bebetehe iamu. Ngaira ka kuhagi na bêata iata igê na para iamu. Ngaira nga ka na ani ga hagabâkorogo ngavê.

¹²“Igo ma na enoni rako i na agua getigi kamu tage hohoro heri. Igo ko hohorongenigi na marâ rako i pasimu renigi na siliva, na aiani, na kapa ma na poro tenira na ai ni Sipeni.

¹³Igo ko hohorongenigi na marâ iamu renira na kare rakuraku ma renigi na marâ ni aiani tenira na ai ni Agaia, me Tubala me Meseki.

¹⁴Igo ko hohorongenigi na marâ iamu renira na hosi ni tagaraniha, ma na hosi ni me ma na tonki tenira na ai ni Bete Togarama.

¹⁵Igo ma na enoni ni Rotose kamu tage hohoro heri. Igo ko hohorongenigi na marâ iamu renigi na rivonega ma na apinige na pou.

¹⁶Na ai ni Siria ka vuri rako era na marâ tenigo renigi na marâ, ga tagarahigi, hanana vigo hagavuringenigi ka vurivuri tenigo renigi na hê maravarava, na gahu ga turagi igê na marâ, i bâkoro, na gahu siki, na ahu, ma na hê ahe memera.

¹⁷Na ai ni Juta me Isiraele ka vuri tenigo renigi na koni, na pirui, na oile ni olive, ma na oile ni vanuniha koro.

¹⁸Na ai ni Tamasiko ka vurigi rako era tenigo na marâ, ga tagarahigi, hanana vigo hagavuringenigi, ma ka vurivuri renigi na vaini ni Gelibone ma na varehuta na sipi ni Sokare,

¹⁹ma na aiani ni Usala, na marâ ga sigini koro, ma na marâ ga ngê koro renigi na ngêra.

²⁰Na ai ni Tetane ka vuri tenigo renigi na gahu upupuga, ga vatarangenigi igê na âgâga i gerita na hosi.

²¹Na ai ni Arabia ma na maneraha i Ketare ka vuri tenigo renira na kareta na sipi ma na goti, ma na ani mane raha.

²²Na mane ni hagavaraha haga ni Seba me Rama ka vuri tenigo renigi na hê ahe i bâkoro, na golo ma na marâ ga sigini koro ngavê.

²³Na hinua i Harane me Kane me Etene, na mane ni hagavaraha haga ni Seba, ni Asure me Kilimata, ngaira ka hagavuri tangago.

²⁴Ngaira ka hagavuringenigi tangago na gahu i raha na meni, na gahu rotorotoaga memera, na gahu ga turagi igê na marâ i bâkoro, na bana totoperoga, ma na varo hirihiri raha.

²⁵Na haka ni toraha i Tasisi ka toregi na marâ, go hagavuringenigi. “Taire, igo ko manga na haka i kere ataha i asi, i higego na erutanga raha.

²⁶Na mane ka harutego tanga na matava tara, ma na târagina ki korogo i ngekana.

²⁷Na ruruguha ma na nahuninga hato iamu, na marâ hato go vurigi ma ko hagavuringenigi, na mane ni tagaraha iamu i asi, na mane iamu ga manisingenigi na tagaraniha ni haka, na mane hato ni hagaraha haga iamu, na mane ni me iamu ma na enoni hato igê, ngaira ka tono kere ataha i asi, matena i kokoro na haku iamu.

²⁸Na enoni igê na tarasini ka bubununuga, matena ga rongora, ga ngerengere avaravara raha na mane tagara iamu igê na haka.

²⁹Na ara ni haka ka baguru, suria na mane tagara igê ka bani gava i one.

³⁰Ngaira ka angisigo bâraha. Ngaira ka mesigo ngavê. Ngaira ka kuhigi na bêta renigi na rahu, ma ka oga hurihuri so ma i ano.

³¹Ngaira ka goro bê huri ma ka hagesuru tatari. Ngaira ka angi maramara renigo ma ki rugu bâraha na obata.

³²Ngaira ka angi harihari surigo, suria go magahuru, ka vi, ‘Taire, ti ki maratoramu igo na hinua go aruhuruhu i asi?’

³³Na haka ka toregi na marâ iamu, go vurigi ma ko hagavuringenigi, ma ka katora rako na marê, ka oga igê na ramana. Igo ko katora na maneraha, ka ruruguha, suria go hagavuri tangara na marâ iamu.

³⁴Ma i ngekê igo ko kokoro i asi kere vato igê na rutuna. Na ara ni nahuninga hato iamu ma ngaira hato na enoni tagara iamu ka kokoro henigo igê na rutuni.

³⁵Na enoni hato igê na tarasini ka gasuga renigo ma ka magu. Na maneraha iata ka bubununuga nogata ma i tatata na apeta.

³⁶Na mane ni hagavaraha haga i maveta hagenani ka manavatenigo ngavê. I era ngavê! Na râha su iamu ki hagamagusira ngavê na enoni. Igo ki hato iamu tare, ki bê ki arâ.”