Read Kahua ESEKIELE 29 Bible Online

ESEKIELE 29 - Kahua bible

ESEKIELE 29

¹Ki na tangahuruta matarerua na tangiana igê na tangahuruta na hageha igê na tangahuruta na harisi, ga bani henahuraugami surigi. Na Araha ki tamasi tangê, ki vi:

²“Igo, karena enoni ma, gu rangania na maneraha ni Esipito. Gu hagarongoa, vi na hagaitangiha ki page tarahua, ngaia ma na agua hagenani i Esipito.

³Gu hagarongoa na maneraha ni Esipito renia na katoha iaku ikê tanga. Maneraha ni Esipito, inê kê merongasigo. Igo ko maratorana na bagahua raha, i oga i ve i Nile. Igo ko vi, vi ngaia ka na ve iamu, suria go vi, vi igo kanigo hagavora.

⁴Inê be area na haramu renia na hinu, ma be katora na siara i ve iamu, ke kukuhigo. Ma hemuri inê be okego hura akê tenia na ve henira na siare hato, ga kukuhigo.

⁵Inê be kasigamu hato, igo ma na siare ngegana, igê na bagamanihê raha. Na apemu ki page tâtâ hurihuri so i ano, ma ki asa ta na enoni vige bagigo. Inê be hagangêra na manu ma na marâ vasiga renigo.

⁶Vikana na enoni hato i Esipito ka page tahetara reniê, vi inê ka na Araha.” Na Araha ki vi: “Esipito, na ai ni Isiraele ka naasigo, hanana vigo tamanira. Ma igo ko pe ramo. Igo ko manga na ate.

⁷Matena ga matarigigo, igo ko barobaro, ko kumukumu i bebeta ma ka tagira na apeta.

⁸Tahema inê na Araha God, inê be hagaitangigo renia na henahuita. Na merongamu ka page taharigo, ma ka page ahurara na kariamu ma na togoha iamu.

⁹Esipito ki page aruhuruhu ma ki page hihiruga. Vikana na enoni ka page tahetara reniê, vi inê ka na Araha. “Suria go vi, vi na ve i Nile ki na ve iamu, suria go vi, vi igo kanigo hagavora,

¹⁰tahema inê kê merongasigamurua, igo ma na ve iamu. Inê be ruhuruhua i Esipito hagenani, ke hihiruga, haganega tenia na hinua i Migitore igê na tarasini tariha igê na hinua i Asavane i toro, ma ki râ tare tanga i Etiopia.

¹¹I asa ta na enoni, se vi na togoha, vige tarêhia. Ngaia ki page hihiruga surigi na tangahuri harisi ge he.

¹²Inê be ruhuruhua i Esipito, ke manga na bagamanihê raha. Na hinua i Esipito ka page aruhuruhu surigi na tangahuri harisi ge he. Na aruhuruhunga, na ani i raha teha ngavê, ga pe rongo kuruhana me rârâ i nago kere vê noga. Inê be tokorenira na ai ni Esipito surigi na agua getigi, hanana ga mamahuara igê.”

¹³Na Araha God ki vi: “I murini na tangahuri harisi ge he inê be takuira aporo na ai ni Esipito, ma be torera aporo tenigi na agua, gê bani tokorenira surigi.

¹⁴Inê be kasira, ke oga i Esipito i na apanena i toro, na agua ga haganega me igê na êvarita. I ngekana na raramohata ki page memeaga igê.

¹⁵Ngaira ka page memeaga ngavê teharigi na agua getigi, ma ki hato iata, vige page marungigi nikâ na agua getigi. Inê be katora ke memeaga, hanana siana ka tugurigi nikâ na agua getigi, hanana vige têtê viteata.

¹⁶Na Isiraelita ki asa, vige naasira nikâ, hanana vige tamanira. Na tarana, i tarahua i Esipito, ki hagatakusira tare na Isiraelita, vi ngaira ka tasi, matena ga hagêguri togo renia i Esipito. Vikana na Isiraelita ka page tahetara reniê, vi inê ka na Araha God.”

¹⁷Ki na tangiana gi tage igê na hageha hagenago igê na tangahuruta gi rua matare pi na harisi, ga bani henahuraugami surigi. Na Araha ki tamasi tangê, ki vi:

¹⁸“Igo, karena enoni ma, o Nebukanesa na maneraha ni Babilonia ki taharia i Taire. Ngaia ki katora na mane ni me iana, ka biribêgi ma ka bugurugi na toraha higa, ma ka ahapiripiri renigi na varehu i bêta ma ka ahabatobato renigi na gaparata. Ngaia ma na mane ni me iana ka tagara bâraha ngavê, ma ka tagara hagaborâ ma.

¹⁹Tahema inê na Araha God kê vi vikê: Inê be mahatangenia i Esipito tanga na maneraha o Nebukanesa. Ngaia ki page rurugugi ma ki page hanagogi na ara ni ruruguha hato i Esipito, ma ki migirâ, hanana i vurira re na mane ni me iana.

²⁰Inê be vuria renia i Esipito meni na tagaraha iana tangê, suria na mane ni me iana ka tagara tangê. Ngaia kani gê visia, inê na Araha.

²¹“I murina ngekana inê be katora na ai ni Isiraele, ke raramohaga aporo. Ma igo, Esekiele, igo ko page tamasi tatahura tangara. Vikana ngaira ka page tahetara reniê, vi inê ka na Araha.”