Read Kahua ESEKIELE 30 Bible Online

ESEKIELE 30 - Kahua bible

ESEKIELE 30

¹Na Araha ki tamasi tangê nikâ, ki vi:

²“Igo, karena enoni ma, gu tamasi poropete ma ko hagarongora na ai ni Esipito renia na tamasinga iaku. Inê na Araha God kê vi vikê: “Angiangi raha! I page era ngavê na hagaitangiha.

³I râ me noga na tangiana tanga. I sugia ma na matena tanga na Araha, i hagaitangira igê na enoni. Na tangiana ni mengo ma ni bagabevoani!

⁴Na henahuita ki page tarahua i Esipito. I Etiopia ka page bubununuga. Rako na ai ni Esipito ka page meme. Ka page hanagogi hato na ruruguha i na agua. Na agua ki page aruhuruhu.

⁵Na mane ni me i na agua getigi, ga tamania i Esipito, na me ni Etiopia, ni Libia ni Litia, ni Arabia, ni Kubu me tani nikâ, ngaira ka page me igê na henahuita.”

⁶Na Araha ki vi: “Ngaira hato, ga pane henia i Esipito, haganega tenia i Migitore igê na tarasini, tariha i Asavane i toro, ngaira ka page meme igê na henahuita. Na mane ni me ramo i Esipito ka page mutemute. Ngaia kani gê visia, inê na Araha God.

⁷Na agua ki page hihuruga ngavê, na hihirugana ga pe rongo kuruhana rârâ i nago. Na hinua igê ka page aruhuruhu ngavê.

⁸Inê be sungia i Esipito, ma be mutera na me, ga pane henia. Vikana ngaira ka page tahetara reniê, vi inê ka na Araha.

⁹“Igê na tangiana gê hagaitangia ngavê igê i Esipito, inê be hagatorangenira igê na haka na mane tora tamasinga tanga i Etiopia, hanana ga hagakangia. Ngaira ka page bubununuga. I page râ me nga na matena ngekana.”

¹⁰Na Araha God ki vi: “Inê be hagatorangenia o Nebukanesa na maneraha ni Babilonia, ki rurugugi na ruruguha hato tenia i Esipito.

¹¹Ngaia ma na mane ni me iana ka page ruhuruhua ngavê na agua. I asa iata vige hetaki. Ngaira ka page ahurara na ai ni Esipito, ma na gahuata ka page manasia na agua hagenani.

¹²Inê be hagamamataria na ve i Nile, ma be nakara na mane era ke marungia i Esipito. Na me i na agua getigi ka page hagaerasia ngavê na agua hagenani. Ngaia kani gê visia, inê na Araha.”

¹³Na Araha ki vi: “Inê be kumukumugigi na nunuta na ataro, ma be paira hura na ataro hagaparu tenia i Memepisi. I mareha rârâ ta na maneraha, vige page marungia i Esipito, ma na enoni hato igê ka page bubununuga ngavê.

¹⁴Inê be katoa, ke hihiruga i Esipito na apanena i toro, ma be sungia ke makaka na hinua i Soane igê na tarasini. Inê be hagaitangira na ai ni hinua raha i Tebesi.

¹⁵Igê na mangariaganiha raha iaku inê be hagaitangia na hinua nganganihaga ngavê i Pelusia. Inê be ruhuruhua na hinua i Tebesi, i ruruguha ngavê.

¹⁶Inê be sungia i Esipito, ma i Pelusia ki page amenamena ngavê. Na para ni hinua i Tebesi ka page ahogehoge ma na ve ki page anuia.

¹⁷Na mane na gapu haoru ni hinua i Heliopoli me Bubasiti ka page meme igê na hearihatana, ma ka page henahuraura na enoni getera.

¹⁸I page era ngavê tanga i Tagapanegesi, matena gê hatungia igê na raramohata na ai ni Esipito ma kê mutera igê na mane ni me iata, ga ageagesira. Na mengo ki page buhia i Esipito hagenani, ma ka page henahuraura na enoni hato surigi na hinua igê.

¹⁹Ngaia nga na hagaitangiha tanga i Esipito. Vikana ngaira ka page tahetara reniê, vi inê ka na Araha.”

²⁰Ki na pita na tangiana igê na hageha gi tage igê na tangahuruta matare tage na harisi, ga bani henahuraugami surigi. Na Araha ki tamasi tangê, ki vi:

²¹“Igo, karena enoni ma, inê kê bani barugia na rimana na maneraha i Esipito. I mareha ta na enoni, vige baraia, se vige hagahaga tanga, hanana vige komaga aporo, ma ke ramoramo aporo, hanana vige taua na tatapa borahu.

²²Hoi, inê na Araha God kê vi vikê. Inê kê merongasia na maneraha ni Esipito. Inê be barugirerua hato na rimana, na ani i komaga ma na ani i bani magi, ma na tatapa borahu ki page vasivasi tenia na rimana.

²³Inê be tokorenira na ai ni Esipito surigi na agua hato i maveta.

²⁴Inê be hagaramonirerua na rimana na maneraha ni Babilonia, karu ramo, hanana i taua gatagata na tatapa borahu iaku.

²⁵Inê be barugirerua na rimana na maneraha ni Esipito, ma ngaia ki page gegege, ma be hagaramonia na maneraha ni Babilonia. Matena i taua na tatapa borahu iaku ma ki usuia i Esipito renia, na enoni hato ka page tahetara reniê, vi inê ka na Araha.

²⁶Inê be tokorenira na ai ni Esipito suria na maveta hagenani, hanana ge mamahuara igê na agua getigi. Vikana ngaira ka page tahetara reniê, vi inê ka na Araha.”