Read Kahua ESEKIELE 35 Bible Online

ESEKIELE 35 - Kahua bible

ESEKIELE 35

¹Na Araha ki tamasi tangê, ki vi:

²“Igo, karena enoni ma, gu rangania i Etome.

³Gu hagarongora na enoni i ngekana renigi na tamasinga iaku. Inê na Araha God kê vi vikê: Ai ni Etome, inê kê merongasigamu. Inê be ruhuruhua na marê iami, ke hihiruga.

⁴Inê be ruhuruhugi na hinua iami, ma na marê iami ke hihiruga ngavê. Vikana igamu kamu page tahetara reniê, vi inê ka na Araha.

⁵“Igamu ka na bani merongata me na Isiraelita. Matena i tarahura na bagabevoani meni na bagaparongata, igamu kamu nakara mavê, ka me igê na hearihatana.

⁶Tahema igamu kamu page me, ma ki asa vigamu tahi. Inê kê tohe reniê mareku, inê na Araha God, vi gê God mamauri. Na siva ki tâ tangagamu, suria mu nahu enoni.

⁷Inê be ruhuruhua na torona i Etome, ma be mutera na enoni hato, ga aharêvoro igê.

⁸Na gahuata ke manasigi na barani, ma na gahuata na ani, ga me igê na hearihatana, ka page manasigi na hungani ma na maruguni.

⁹Na apanena iami ki page aruhuruhu tare, ki bê ki arâ, ma na hinua iami ka page hihiruga tare. Vikana igamu kamu page tahetara reniê, vi inê ka na Araha.

¹⁰“Igamu kamu vi, vi na apanena gi rua i Juta me Isiraele henigi na mako iaterua ka na animi, ma kamu parênigi, henaka vi inê kê God iata.

¹¹Inê kê tohe reniê mareku, inê na Araha God, na God mamauri. Igamu kamu mangariaga tangara na kariaku, kamu hengarira ma kamu kitenira. Hoi, inê be katogamu nogami vikana. Ngaira ka page tahetara reniê, vi inê nga kani gê hagaitangigamu meni na bagatauhami tangara.

¹²Vikana igamu kamu page tahetara reniê, vi inê ka na Araha. Inê kê rongogamu, mu tamasi erasia i Isiraele, kamu vi, vi na toroni igê ka bani aruhuruhu, ma ka na animi, mu rurugugi.

¹³Inê kê rongogamu, mu guhariê renigi na tamasinga paroparo iami.

¹⁴“Etome, inê na Araha God kê vi, vi inê be ruhuruhugo ngavê, hanana na enoni hato i maveta ka page manavatenigo, go vota,

¹⁵tagenana manga i nago mu manavatenia i Isiraele, na apanena iata na kariaku, i aruhuruhu. Etome, igo ko page aruhuruhu hagenani, na hungani iamu ma na apanena hagenani iamu. Vikana na enoni hato ka page tahetara reniê, vi inê ka na Araha.”