Read Kahua ESEKIELE 36 Bible Online

ESEKIELE 36 - Kahua bible

ESEKIELE 36

¹Na Araha ki vi: “Igo, karena enoni ma, gu tamasi poropete tangagi na hungani ni Isiraele, ma ku hagarongogi renigi na tamasinga iaku.

²Inê na Araha God kê vi vikê: Na merongami ka manavatenigamu, ka vi, ‘Na hungani hagahu ngegana ka na anika!’

³Tahema gu tamasi poropete, ku tarohenigi na tamasinga iaku, inê na Araha God. Matena na enoni i na agua getigi ka henahuraugi na hungani i Isiraele, ka rurugugi ma ka nahunigi, na enoni hato ka mamanatenia i Isiraele.

⁴Hoi, mu rongo igamu na barani, na hungani, na ve ma na maruguni, na agua mu aruhuruhu ma na hinua mu hihiruga, ga bani rurugugamu ma ka bani mamanavatenigamu na enoni i na agua getigi rihigamu. Mu karingagi na tamasinga iaku.

⁵Inê na Araha God kê ramonira na enoni i na agua ngegana ma ngaira nga i Etome, suria inê kê mangariaga ngavê. Ngaira ka manavatenia na apanena iaku, ka ruhia, ka rurugua ma ka parênia, hanana viga nahunia na mako.

⁶Tahema gu tamasi poropete tanga i Isiraele, tangagi na barani, na hungani, na ve ma na maruguni. Gu hagarongogi renigi na tamasinga iaku. Inê na Araha God kê mangariaga ma ki era na obaku, suria na enoni i na agua getigi ka guharigi ma ka hagamakigi.

⁷Tahema inê na Araha God kê tohe, vi na agua ngegana ka page maki nogata.

⁸“Hungani i Isiraele, na apinige igê na mako iami ka page hisihisi aporo ma ka page hunguhungu aporo tangara na kariaku, ga sugi aporo me.

⁹Bâ, inê kê pane henigamu, ma kê botage renigamu. Na enoni ka page tagarahigi na mu igê na mako iami ma ka page hasihasi igê.

¹⁰Inê be hagarakonira na enoni igê, na Isiraelita hato igê. Ngaira ka page tagarahigi aporo na hinua, i aruhuruhu, ma ka page gâga igê.

¹¹Inê be hagatakara na enoni ma na togoha, ke rako teharia i nago. Ngaira ka page gâga igê na ramana manga i nago, na ramana i page teharia na ani i nago. Vikana igamu kamu page tahetara reniê, vi inê ka na Araha.

¹²Isiraelita na kariaku, inê be toregamu aporo tanga na agua, kamu oga tonge igê. Ngaia nga ka na apanena iami, ma na karemi ki asa, vige page mesi magêha nikâ igê.

¹³“Inê na Araha God kê vi: I monari, na enoni ka vi, vi na agua ikê ki manga na mane, i ngaura na karena, ma ki hagamesira na kareta na enoni igê.

¹⁴Bâ, haganega tenia i ngekê, ngaia ki hato, vige ngêra nikâ na karena, se vige hagamesira nikâ na karemi. Ngaia kani gê visia, inê na Araha.

¹⁵Igamu ki hato, vigamu page rongora akê nikâ na enoni i na agua getigi, vige page mamanatenigamu, se vige guharigamu. I hato vigamu page mesi magêha nikâ igê. Ngaia kani gê visia, inê na Araha God.”

¹⁶Na Araha ki tamasi tangê, ki vi:

¹⁷“Igo, karena enoni ma, matena na Isiraelita ka gâga mênga i na apanena iata, ngaira ka hagaerasia renia na bagaogaha iata ma na bagatauhata. I maaku na ogaha iata ki pe matarotaro, manga na gete, i taha na obana, i pe matarotaro surigi na ramata na rotu.

¹⁸Inê kê katora, ka hatamia na mangariaganiha iaku, suria ga nahu enoni igê na agua, ma ka erasia renigi na nunuta na ataro.

¹⁹Inê kê hagaitangira renigi na bagaogaha iata ma na bagatauhata, ma kê tokorenira surigi na agua getigi, ka mamahuara igê.

²⁰I na ara ni agua, ga totoko surigi, ngaira ka hagamakiê inê na God, suria na enoni getera ka vi, ‘E, henaka vi ngaira ka na kariana God, ma ngaia ki paira hura tenia na apanena iana!’

²¹Na tarana ngekana ki hagaera obaku ngavê, suria na Isiraelita ka hagaerasia na ataku apuna surigi na ara ni agua, ga totoko surigi.

²²“Hoi, gu hagarongora na Isiraelita renigi na tamasinga iaku tangara. Inê na Araha God kê vi vikê: Na tarana, gê page katoa, ki asa vi ve katoa tangagamu igamu, ma tangê inê mareku hete, suria igamu kamu hagaerasia na ataku apuna surigi na ara ni agua, mu totoko surigi.

²³Suria igamu kamu hagaerasia na ataku i pasita na enoni ngegana, tahema inê be hagabângenia tangara, vi inê ka na God raramohaga huniê, gê apuna. Vikana ngaira ka page tahetara reniê, vi inê ka na Araha. Ngaia kani gê visia, inê na Araha God. Renigamu igamu, inê be hagabâsira na enoni ngegana, vi inê nga ka na God apuna.

²⁴Inê be toregamu aporo tenigi na marê hato, mu mamahuara surigi, ma be haganahunigamu aporo renia na apanena iami maremi.

²⁵Inê be kamusigamu renia na ve marava, ma be hagamatarotarogamu tenira na ataro ma tenigi na ani mavê na marâ, ga erasigamu.

²⁶Inê be urisigi na parongami ma na aitangihami renigi na ani haoru. Inê be urusia na guguruganiha iami renia na tê vitana.

²⁷Inê be angarigamu, hanana mu marupegi na ramata iaku ma kamu tototo surigi maninga na tamasinga hato iaku tangagmu.

²⁸Igamu kamu page gâga igê na agua, gê bani haganahunira na êvarimi renia. Igamu kamu page vora re na kariaku, ma inê be God iami.

²⁹Inê be hagatahigamu tenigi na ara ni marâ, ga erasigamu. Inê be katogi na mu, ke ganora ngavê, hanana siana kamu mesi magêha nikâ.

³⁰Inê be katogi na apinige ni ngêra, ke rasi ma ke aharêsigamu na harisi, hanana siana na enoni i na agua getigi ka hagamakigamu, suria vi tarahugamu na magêha.

³¹I asa vigamu bonotenigi na bagatauhami ma na bagaogaha iami. Igamu kamu page maki renigi hete na tasi iami ma na bagaparongami.

³²Bâ, inê kê pe kato vikana tangagamu igamu. Inê kê obanigamu hete, vigamu maki ma ki nahuigamu na makiha renigi na bagatauhami. Ngaia kani gê visia, inê na Araha God.

³³“Inê na Araha God kê vi: Matena gê hagamatarotarogamu hato tenigi na tasi hato iami, inê be nakagamu, kamu tagarahigi aporo na hinua iami, ga aruhuruhu, ma kamu ogasigi aporo.

³⁴Na enoni ga riri igê na mu iami, ngaira ka bâsigi, i bonoga ma ki masigu, ma inê be nakagamu, kamu tagarahigi aporo.

³⁵Na enoni ka page konekone, ka vivi, ‘E, i nago na agua ikê ki na bagamasusu raha, ma i ngekê ngaia ki manga na mu i Etene. I nago na hinua igê ka aruhuruhu, ka ahogehoge ma ka hihiruga, ma i ngekê ngaigi ki nganganihaga ma ka ogasigi na enoni rako.’

³⁶Vikana na enoni i na agua getigi rihia, ga tahitahi mêngara, ka page tahetara reniê, vi inê nga na Araha kani gê tagarahigi aporo ma hinua, ga aruhuruhu, ma kê hasigi aporo na mu, ga bani masigu i nago. Ngaia kani gê visia, inê na Araha, ma be hagamonaria.

³⁷“Na enoni ka page aharêsigi na hinua, ga surungigi, manga na sipi ni vogasiha ga aharêsia i Jerusaleme igê na tangiana raha ni rotu i nago.

³⁸Vikana ngaira ka page tahetara reniê, vi inê ka na Araha.”