Read Kahua ESEKIELE 39 Bible Online

ESEKIELE 39 - Kahua bible

ESEKIELE 39

¹Na Araha God ki tamasi tangê, ki vi: “Igo, karena enoni ma, gu rangania o Gâka, na maneraha teha i marungira na ai ni Meseki me Tubala. Gu tamasi poropete tanga. Gu hagarongoa renigi na tamasinga iaku tanga, gê vi vikê: Gâka, inê na Araha God, kê merongasigo.

²Inê be horogo, ku râ tanga na agua getea. Inê be bêngenigo tenia i pasimu tangagi na hungani i Isiraele, hanana gu taharia.

³Ma i ngekana inê be tahurugi igê na epage ni me iamu tenia na rimamu na mahamu, ma na mage iamu tenia na otomu.

⁴Gâka, igo ma na mane ni me iamu ma na me hato, ga pane henigo, igamu kamu page meme igê na hearihatana igê na hungani i Isiraele. Inê be hagangêra na manu ma na marâ vasiga hato renigi na gahuami.

⁵Igamu kamu page meme igê na masusu. Ngaia kani gê visia, inê na Araha God.

⁶Inê be tanga na gi i Magâka ma surigi na ara ni tarasini hato. Na enoni igê ka vi ma, vi ngaira ka asitatara igê. Ma ngaira ka page tahetara reniê, vi inê ka na Araha.

⁷Inê be hagabângenia tangara na kariaku na Isiraelita, vi inê ka na God apuna. Na ataku ki hato, vige rongo era nikâ. Vikana na enoni i maveta ka page tahetara reniê, vi inê ka na Araha, na God apuna, ga rahesia na Isiraelita.

⁸“Inê na Araha God kê vi, vi na tamasinga iaku ki page vaga me mave nga. Ngaia nga ka na matena gê bani visia.

⁹Na enoni surigi na hinua i Isiraele ka page arâ ka ruguni re na ario na tangaruha, ga panigi na mane ni me. Ngaira ka page tangatanga gi renigi na bêata, na epage, na mage, na ora ma na mata. Na ario ngegana ka gâga surigi na harisi gi pi.

¹⁰I pe ararira, vige papapario nikâ, se vige tapigi so nikâ na apinige igê na vapuni, suria na tangaruha, ga panigi so na me, ngaigi nga na ario iata. Ngaira ka page hanago ma ka page rurugu tenira na merongata, ga bani rurugu ma ka hanago bê me tangara. Ngaia kani gê visia, inê na Araha God.”

¹¹Na Araha ki vi: “Igê na matena ngekana inê be atea ta na agua i Isiraele, na agua ga page bagia igê o Gâka. Ngaia ka na ‘Maruguna ni Tarari’, i na apanena bêkê na Asime. I ngekana nga kani ga page bagira igê o Gâka ma na mane ni me hato iana, ma na enoni ki apu, vige tarari nikâ i ngekana. Ga page hêtana na maruguna ngekana, vi ‘Na maruguna iata na me iana o Gâka’.

¹²Na Isiraelita ka page aruma surigi na hageha gi pi, ka bêbagi na gahuata ma ka maningaia aporo nikâ na agua.

¹³Ngaira hato igê na agua ka page tagara haku igê na bagiha ni nuni. Inê be hagarahasira, matena gê page arâ igê na raramohaku raha. Ngaia kani gê visia, inê na Araha.

¹⁴I murini na hageha gi pi ngegana ka page atera igê tani na mane, hanana ga râhia na agua hageani. Na tagaraha iata kani ga page ahungigi na gahuata, ga hita so mêngagi, ma ka bagigi, hanana ga maningaia na agua.

¹⁵Matena ga arârâ ma ka tarahugi na surita na enoni, ngaira ka page nakagi igê na girarani. Vikana na enoni ni bagiha ni nuni ka bâsigi ma ka bagigi igê na ‘Maruguna iata na me iana o Gâka’.

¹⁶Ngaira ka maningaia vikana aporo na agua. Hagarangia i ngekana ki oga igê na hinua i Hamona: hinua ni mane ni me.”

¹⁷Na Araha God tamasi tangê, ki vi: “Igo, karena enoni ma, gu uni hakura me na manu hato ma na marâ vasiga hato tenigi na ara ni agua, hanana ga ngaugi na ganiani ni vogasiha, gê hagarêgi tangara. Na ngêra raha igê na hungani i Isiraele ngekana. Ngaira ka page ngaugi igê na hasigota na mane ni me ma ka page tonomigi na gaputa.

¹⁸Ngaira ka page ngaugi na apeta na mane ni me ma ka page tunumigi na gaputa na maneraha i maveta. Ga page harasira ngaira hato mangara na sipi mane, se na kareta na sipi, se na goti, se na puruka mane binibinikaga ni Basani.

¹⁹Igê na matena ni ngêra raha ni vogasiha ngekana ngaira ka girara, ga masumasu renigi na êbeta, ma ka tunumigi na gaputa, mataro me ki aripo na maata.

²⁰Ngaira ka page masu aharêngira renira na hosi ni me henira na me igê, ma renira na mane ni me ma na mane ni hearihatana. Ngaia kani gê visia, inê na Araha God.”

²¹Na Araha ki vi: “Inê be hagagirarara na enoni i maveta renia na raramohaku raha, ma manga i he kê hagamonarigi na katoha iaku, ga oto.

²²Tenia i ngekana na Isiraelita ka page tahetara reniê igê, vi inê nga ka na Araha God iata.

²³Ma na enoni i na agua getigi ka page tahetara, vi na Isiraelita ka mamahuara igê na agua getigi, suria ngaira ka haritoheê ma ka bagaparongata. Inê kê kasi renira, ma kê nakara na merongata ka teharira ma ka mutera igê na hearihatana.

²⁴Inê kê kasi renira ma kê hagaitangira meni na bagatauhata, suria ngaira ka aharêngigi na ramata iaku.

²⁵“Ma inê na Araha God kê vi, vi haganega tenia nga i ngekê inê be takuira igê na ai ni Isiraele, na raraha iana o Jakobo. Inê be katora, ke oga aporo igê na ramana, hanana i ama ni rongorongo raha nga na ataku apuna.

²⁶Matena ga gâga suri parongata aporo igê na apanena iata mareta, ma ki mareha rârâ ta na enoni, vige hagamagusira nikâ, ngaira ka page bonotenia na makiha, i nahuira, suria ngaira ka pe toto suriê.

²⁷Inê be torera aporo na kariaku tenigi na apanena hato iata na merongata, hanana gê hagabângenia tangara na enoni i maveta, vi inê ka na God apuna.

²⁸Vikana na kariaku ka page tahetara reniê, vi inê ka na Araha God iata, igê na matena gê nakara na merongata ka henahuraura igê, ma nikâ igê na matena gê hagahakura aporo me, kê torera aporo igê tanga i pasita, na ara ni hitangita, mareha vive tihia tani.

²⁹Inê be angarira na ai ni Isiraele, ma ki asa hagetage, vi ve kasikasi renira nikâ. Ngaia kani gê visia, inê na Araha God.”