Read Kahua ESEKIELE 4 Bible Online

ESEKIELE 4 - Kahua bible

ESEKIELE 4

¹God ki vi: “Igo, karena enoni ma, go torea na hê aberabera, ku naka so henigo, ma ko segea igê na hinua i Jerusaleme.

²Hanana i bâbâ, manga viga taharia, gu tagarahia na âpavoro rihia, gu ukugi na mako rihia, gu tagarahigi na agua tanga na ruma ni gahu iata na mane ni me, ma ku hagêrasigi na bebetehe henigi na marâ, ga rupurupukurugi renigi na para ni hinua.

³Gu torea na bahitana na aiani ni hanununga, ma ku hagêrasia manga na para na aiani i berarogamurua igo ma na hinua. Gu maatia na hinua. Hoi, i bâ manga na tahariana, ma igo nga ko nga na ani go taharia. Na hagararinga ngegana ka na girarana tangara na ai ni Isiraele.

⁴“Ma hemuri ko tâhia na mahamu, ma inê kê urigo meni na bagaparongata na Isiraelita. Igo ko tâtâ nga surigi na tangiani 390, ma ko mamasiaga meni na bagaparongata.

⁵Na tangiana gi tage ki urusia na harisi gi tage, suria na Isiraelita ka bagaparongata surigi na harisi 390. Suria na tarana ngekana, tahema igo ko kasikasi meni na bagatarihata.

⁶I hatohato vikana, igo ko ahoro ma ko tâhia na otomu, ma i ngekê surigi na tangahuri tangiani ge he igo ko kasikasi meni igê na bagaparongata na ai ni Juta. Na tangiana gi tage ki urusia na ara ni hitangini na harisi tangahuru ge he, gê page hagaitangira surigi.

⁷“Gu hahutugia na tahariana i Jerusaleme. Haganunua na hinua ma ko hagaramo.

⁸Inê be rakugo renigi na varo, hanana siana ko ahoro aporo, mataro me ki hatohato igê na tahariana.

⁹“Hoi, gu arogi na makoni na palaua, na koni, na pini ma na marâ vigana, ma ku hahigi na bereti renigi. Ngaigi ka na ngêra iamu surigi na tangiani 390, matena go tâhia na mahamu.

¹⁰Na ara ni kere agua na bereti ka tonganigi na ara ni tangiani. Na kere agua gi tage na bereti ki tanga so ma na tangiana gi tage.

¹¹Na kâkâ gi rua ma na ve tanga so ma na ara ni tangiana gi tage. Go ngêngê ma ko totono hagetage ma igê na tangiana gi tage.

¹²Go tangatanga gi renigi na aeta na enoni, i garaki, ma ko hahahi renigi na bereti, ma ko ngaugi. Go katogi na tarani ngegana i maata na enoni.”

¹³Na Araha ki vi nikâ, ki vi: “Igê na tarana ngekana na Isiraelita ka page ngaugi igê na ngêra, i apu tangara, i berarogata na enoni igê na agua, gê page tokorenira surigi.”

¹⁴Ma inê kê arami, kê vi: “Araha God, i bara ngavê. Inê kê pe aharê rârâ igê na ramata, be ngêgi na marâ, i manimanigi. Tenia na matena gê sisite taha me i ngekê, inê kê pe ngêgi rârâ na ganiani, ga meme mareta, se vi na ani getea na marâ vasiga, i garagara hunu i mu. I mareha ngavê be ngêgi rârâ na ngêra, ga apu.”

¹⁵Hoi, God ki arami, ki vi: “I koro ma. Nakagi vê na aeta na enoni, ma ko toregi ma hete na aeta na puruka, ma ko hahahi bereti renigi.”

¹⁶Ma na Araha ki vi nikâ: “Igo, karena enoni ma, inê be hagamagahurugi na ngauha tenia i Jerusaleme. Na enoni i ngekana ngaira ki asa, vige page têtê raharaha renigi nikâ na ngauha ma na tonoha. Ngaira ka page anumanuma ma ka page bagahagêguri, matena ga ngêngê ma ka totono.

¹⁷Na ngêra ma na ve ka page hato tenira. Ngaira ka page kakasi ma ka rataga, ma ka page meme renigi na tasi iata.”