Read Kahua ESEKIELE 40 Bible Online

ESEKIELE 40 - Kahua bible

ESEKIELE 40

¹Ki na tangahuruta na tangiana igê na harisi haoru. Ngaia ki na tangahuruta gi rua matare rima na harisi, ga henahuraugami surigi, ma ngaia nikâ ki na tangahuruta matare he na harisi, ga henahuraua i Jerusaleme surigi. Na raramohana God ki angariê ma ki hagamaruteê.

²Igê na maruteha iaku God ki toreê tanga i Isiraele. Ma i ngekana ngaia ki kasiê igê na barana. Ma i ngekana inê kê bâsigi igê na ruma haritamani, i bâ manga na hinua.

³Ngaia ki meêrâ hagarangia, ma kê bâsia igê ta na mane, i togatoga manga na kapa. I rimana ngaia ki têrerua na apinige ni hagevovo ma na varo ni hagevovo. Ngaia ki ura igê ta na maani para.

⁴Ngaia ki vi tangê, ki vi: “Igo, karena enoni ma, gu bâ maninga! Gu karinga maninga! Go hahutugigi na ara ni marâ, gê page hagabâsigo renigi. Ngaia nga nga na tarana go râ me tanga. I tuguhigo, vigo hagarongora na ai ni Isiraele renigi na ara ni marâ, go page bâsigi.”

⁵Inê kê rigia na Ruma ni Rotu, ga para rihia. Na mane ki têa na apinige ni hagevovo. Na apinige ngekana ki tangahe tage ma na unumigana ma na kikihuna gi tage. Ngaia ki hagevovoa na para. Na para ki tangahe tage ma na unumigana ma na kikihuna gi tage bê tagere, ma ki tagenana ma henia na upupugana.

⁶Ma hemuri ngaia ki râ tanga na maani para, i maa tanga i kerekê. Ngaia ki tagere tanga, ma ki hagevovoa na maani para. I metara tanga na rarona ki tangahe tage ma na unumigana ma na kikihuna.

⁷Kerevê ki oga igê na tarâto, i tonga renigi na kiboru gi oru i ta apanena ma ki oru nikâ i ta apanena. Na ara ni kiboru ngegana ka hetagenani ma, ma na apê igê na ara ni hitangini ki tangahe tage ma na unumigana ma na kikihuna gi tage. Na upupigani na apê pusigi heri ki 5 mita. Na kiboru ngegana ka na anita na mane ni anumasiha. Ma kerevê ki oga igê na tarâto. Ngaia ki tangahe tage ma na unumigana ma na kikihuna gi tage. Ngaia ki râ tanga na kiboru, i maa tanga na Ruma ni Rotu.

⁸Ngaia ki hagevovoa na kiboru ngekana. Na borahusigana ki 8 mita. Na upupugana na apenena banu na apê ki 2 mita.

⁹

¹⁰Na kiboru iata na mane ni anumasiha, ga oga hetangenia na tarâto, ka hetagenani ma, ma na upupugani na apê pusigi heri ki hetagenani ma nikâ.

¹¹Ma hemuri na mane ki hagevovoa na tarâto igê na maani para, ma ki abâbâ. Ngaia ki 13 mita, ma na akereni heri na maani para ki 10 mita.

¹²Igê na maana na ara ni kiboru iata na mane ni anumasiha ki oga igê na apêvoro, bê tagere ki kikihu gi rua, ma ki 1 mita na upupugana. Na apê i na ara ni kiboru ki tangaha ma na unumigana ma na kikihuna gi tage tagenani.

¹³Ma hemuri ngaia ki hagevovoa hagarabo haganega tenia na murina na kiboru i ta apanena tanga na kiboru i ta apanena. Ngaia ki abâbâ na 25 mita.

¹⁴Na kiboru i maa tanga na Ruma ni Rotu ki bêrâ tanga na mahera na Ruma ni Rotu. Ngaia ki hagevovoa, ki abâbâ 20 mita.

¹⁵Na tarâto hagenani, haganega tenia na maani para i na apanena hura na para tariha me igê na maani banu na kiboru, i maa tanga na Ruma ni Rotu, ki vora 50 mita.

¹⁶Na apanini heri na apê igê na ara ni kiboru ka tonga renigi na mabaha. Tagenani ma nikâ igê na ara ni apê pusigi heri. Na mabaha ngegana ki mave na maani. Ga hagamahegi na apê pusigi heri renigi na segesegeha na nununi na nini, na gatare, na ni ma na marâ vigana.

¹⁷Ma hemuri na mane ki meêhura tanga na mahera ni Ruma ni Rotu. Na kiboru tangahuru gi oru ka oga rihia na mahera, ga oga ngahisia na para. Igê na maani na kiboru ngegana ki rihu igê na tara na hê tari, i rihia na mahera hagenani.

¹⁸Na mahera na Ruma ni Rotu ki kere vato so me tenia na mahera ni Ruma ni Rotu.

¹⁹Na tarâto ki râ tanga na mahera ni Ruma ni Rotu. Na mane ki hagevovoa, na berarogaterua na tarâto ngekana ma na tarâto igê na maani para i kerekê. Ngaia ki 100 mita.

²⁰Ma hemuri na mane ki hagevovoa nikâ na tarâto igê na maani para, i maa bêrâ tanga i Tamasiko. Na tarâto ngakana ki râ tanga na mahera na Ruma ni Rotu.

²¹Na kiboru iata na mane ni anumasiha ka oga igê na tarihana heri na tarâto, ma na apê pusigi heri ma na kiboru, i maa tanga na Ruma ni Rotu, ngaigi ki hetagenani ma henigi na ani igê na ruma na maani para bêkê. Na borahusigana na tarâto ngekê ki 50 mita, ma ki abâbâ 25 mita.

²²Na kiboru ma na mabaha ma na segesegeha na nununi na apinige ka hetagenani ma henigi na ani igê na ruma na maani para bêkê. Ga tavotavo uga hagepi tagere igê tanga na maani para na tarâto ngekana. Na kiboru i na apanena vê na tarâto ngekana ki maa tanga na mahera na Ruma ni Rotu.

²³I na apanena râ na mahera na Ruma ni Rotu tenia na tarâto ngekana ki goga igê na tarâto, i râ tanga na mahera ni Ruma ni Rotu. Ngaia ki hetagenani ma henia na ani i kerekê. Na mane ki hagevovoa na berarogaterua na tarâto gi rua ngegana. Ngaia ki 100 mita.

²⁴Ma hemuri ngaia ki meêrâ tanga na tarihana bêrâ tanga na Asime. Ma i ngekana nikâ ki oga igê na tarâto. Ngaia ki hagevovogi na apê igê na kiboru ma na apê pusigi heri. Ngaigi ki hetagenani ma henigi na ani getigi.

²⁵Na ara ni kiboru ngegana ki tonga renigi na mabaha mangagi na ani getigi. Na borahusigana hagenani na tarâto ngekana ki 50 mita, ma ki abâbâ 25 mita.

²⁶Ga tavotavo uga hagepi tagere igê tanga na maani para na tarâto ngekana. Na kiboru i na apanena vê na tarâto ngekana ki maa tanga na mahera na Ruma ni Rotu. Ga hagamahegi na apê pusigi heri renigi na segesegeha na nununi na apinige.

²⁷I ngekana nikâ ki oga igê na tarâto, i râ tanga na mahera ni Ruma ni Rotu. Na mane ki hagevovoa na berarogaterua na tarâto ngekana ma na tarâto igê na maani para. Ngaia ki 100 mita.

²⁸Na mane ki meêami banu tenia na tarâto ngekana tanga na mahera ni Ruma ni Rotu. Ngaia ki hagevovoa na tarâto ngekana. Ngaia ki hetagenani ma henigi na tarâto igê na maani para.

²⁹Na kiboru iata na mane ni anumasiha ma na kiboru getea ma na apê pusigi heri ka hetagenani ma henigi na ani igê na tarâto igê na maani para. Na ara ni kiboru ngegana ka tonga renigi na mabaha mangagi na ani getigi. Na borahusigana hagenani na tarâto ngekana ki 50 mita, ma ki abâbâ 25 mita.

³⁰

³¹Na kiboru hagenago i maana na tarâto ngekana ki maa tanga na mahera na Ruma ni Rotu, ma ka hagamahegi na apê hetangenia na tarâto renigi na segesegeha na nununi na apinige. Ga tavotavo uga hagevaru tagere igê tanga na tarâto ngekana.

³²Na mane ki meêami banu tenia na tarâto i kerekê tanga na mahera ni Ruma ni Rotu. Ngaia ki hagevovoa na tarâto ngekana. Ngaia ki hetagenani ma henigi na ani getigi.

³³Na kiboru iata na mane ni anumasiha ma ka kiboru getea ma na apê pusigi heri ka hetagenani me henigi na ani igê na tarâto getigi. Ngaigi hato ki tonga renigi na mabaha rihigi. Na borahusigana hagenani na tarâto ngekana ki na vearina gi tage ma na tangahana ge he, ma ki abâbâ 25 mita.

³⁴Na kiboru hagenago i maana na tarâto ngekana ki maa tanga na mahera na Ruma ni Rotu. Ga hagamahegi na apê hetangenia renigi na segesegeha na nununi na apinige. Ga tavotavo uga hagevaru tagere akê tanga na tarâto ngekana.

³⁵Ma hemuri na mane ki meêrâ tanga ta na tarâto nikâ. Ngaia ki hagevovoa. Ngaia ki hetagenani ma henigi na ani getigi.

³⁶Na kiboru iata na mane ni anumasiha ma na kiboru getea ma na apê pusigi heri, ga hagamehegi, ma na mabaha rihigi, ka hetagenani ma henigi na ani getigi. Na borahusigana hagenani na tarâto ngekana ki na vearina gi tage ma na tangahana ge he, ma ki abâbâ 25 mita.

³⁷Na kiboru hagenago i maana na tarâto ngekana ki maa râ tanga na mahera na Ruma ni Rotu. Ga hagamahegi na apê hetangenia na tarâto ngekana renigi na segesegeha na nununi na apinige. Ga tavotavo uga hagevaru tagere akê tanga na tarâto ngekana.

³⁸Igê na mahera na Ruma ni Rotu, i na tarihana tanga i Tamasiko, ta na parema ki oga igê na tarâto, i râ tanga na mahera ni Ruma ni Rotu. Na parema ngekana ki maa tanga na ruma raha, i maa bêrâ tanga na mahera. Ngaia ki na parema ga tananigi igê na gahuata na marâ, ga nahuira tanga ga susu renira.

³⁹Igê ngaia na ruma raha ki oga igê na bea ge he, gi rua i tapanena ma gi rua i tapanena. Na bea ngegana ka na bea tanga ga nahuira igê na marâ tanga ga susu renira, se tanga na vogasiha ni bonoteniha ni tasi se ni kasi meni.

⁴⁰I metara igê na ruma ngekana na bea ge he ka matare igê na apê, na ani gi rua i tapanena ma na ani girua i tapanena hagarangia na maani ruma.

⁴¹Ngaigi haku ki vora na bea ge varu: na ani ge he i rarona na ruma ma na ani ge he i metara igê na mahera, hanana ga nanahuira igê na marâ tanga na vogasiha, se tanga ga susu renira.

⁴²Na bea ge he tanga ga susu igê ka tagarahigi renigi na hê, ga retegi. Ngaigi ki na bea, na ani ga akê 1 mita. Na borahusigani ma na ababeragani ki hetagenani ma: ga 1 mita ma 50 sentimita. Na tarini na bea ki rihu suria na apê i ruma. I ngekana ka na agua, ga nakagi igê na ara ni gira hato tanga ga tagarahira na marâ, ga nahuira tanga ga susu ma ka vogasi renira. Na tarini na bea ka tahi rima. Igê na bea ka nakagi igê na ganiani tanga ga susu ma ka vogasi renira.

⁴³

⁴⁴Ma hemuri ngaia ki meêbanu igê na mahera ni Ruma ni Rotu. Na kiboru gi rua karu oga i ngekana, garu maa tanga na mahera ni Ruma ni Rotu. Tani ki oga hagarangia na tarâto i na tarihana tanga i Tamasiko, ma ki maa tanga na tarihana bêrâ tanga na Asime. Tani ki oga hagarangia na tarâto i na tarihana tanga na Asime ma ki maa tanga na tarihana bêra tanga i Tamasiko.

⁴⁵Na mane ki hagarongoê, vi na ani, i maa tanga na tarihana bêrâ tanga na Asime, ki na anita na mane ni vogasiha, ga tagara i Ruma ni Rotu.

⁴⁶Ma na ani, i maa tanga na tarihana bêrâ tanga i Tamasiko, ki na anita na mane ni hagarahenga, ga susu ma ka vogasi igê. Na mane ni hagarahenga hato ngegana ka na raraha iana o Satoke. Ngaira ka na raraha iana o Levi, ma ngaira getera ma kani oto tangara, viga hagarahe i maana na Araha.

⁴⁷Na mane ki hagevovoa na mahera ni Ruma ni Rotu. Na tarihana ge he ki hetagenani ma: 100 mita. Na Ruma ni Rotu ki oga i na bogona kereso, ma i maana na Ruma ni Rotu ki oga igê na bea ni vogasiha.

⁴⁸Ngaia ki meêbanu igê na kiboru hagenago igê na Ruma ni Rotu. Ngaia ki hagevovoa na maani Ruma ni Rotu. I metara tanga na rarona ki 5 mita, ma ki abâbâ 14 mita. Na upupugani na apê i na apanena heri ka 3 mita.

⁴⁹Ga tavotavo uga tagere hagetangahuru tanga akê na kiboru hagenago igê na Ruma ni Rotu. Ngaia ki abâbâ 20 mita. Tenia na maani ruma tanga na murina ruma ki 12 mita. I na akerena heri na maani Ruma ni Rotu karu oga igê na u gi rua.