Read Kahua ESEKIELE 42 Bible Online

ESEKIELE 42 - Kahua bible

ESEKIELE 42

¹Ma hemuri na mane ki meêrâ igê na mahera na Ruma ni Rotu, ma ki bêngeniê tanga na ruma i na apanena na Ruma ni Rotu bêrâ tanga i Tamasiko, hagarangia na ruma i na apanena bêso na Ruma ni Rotu.

²Na ruma ngekana ki vora 100 mita, ma ki abâbâ 50 mita.

³Ta apanena ki maa tanga na beraro, i abâbâ 20 mita, i râ harisuria na Ruma ni Rotu. Ta apanena ki maa tanga na ririhê na mahera na Ruma ni Rotu. Na ruma ngekana ki tonga igê na harahara gi oru, ga hari ababahi, ma ka tonga renigi na parema.

⁴Igê na apanena na ruma, i maa tanga i Tamasiko ngekana, ki oga igê na tarâto, i abâbâ 10 mita, ma na borahusigana ki vora 50 mita. I na apanena ngekana ka oga igê na maani ruma tangagi na kiboru. Na borahusigana hagenani ki 100 mita.

⁵Na kiboru igê na harahara i akere kê ka sisite teharigi na kiboru igê na ani i gupu na harahara ma igê na ani ngegana i ano na harahara, suria na parema igê ka raha.

⁶Na kiboru hato igê na harahara gi oru ka pe ura renigi vi na u mangagi na ani getigi na ruma igê na mahera na Ruma ni Rotu, ga ura renigi na u.

⁷Na borahusigana na apê na ruma, i maa tanga na mahera na Ruma ni Rotu, ki vora 50 mita, haganega igê na bogona tariha i gupu. Haganega tanga ta bogona ka oga igê na kiboru. Haganega i gupu tariha igê na bogona ngekana ki vora 50 mita nikâ. Na borahusigana hagenani na harahara akere kê ka oga igê na kiboru.

⁹I ruguhani na kiboru ngegana i na apanena bêkê na ruma, i maa tanga na mahera na Ruma ni Rotu, i ngekana ki oga igê na maani ruma tangagi na kiboru. Na maani ruma ngekana ki oga igê na agua, i haganega igê na apê, i maa tanga na mahera na Ruma ni Rotu. I na apanena na Ruma ni Rotu bêrâ tanga i Negeve ki oga igê na ruma, i hetagenani ma henia. Ngaia ki oga hagarangia na ruma i na apanena bêso na Ruma ni Rotu.

¹¹I maani na kiboru ki oga igê na tarâto, i hetagenani ma henia na ani i na apanena bêrâ tanga i Tamasiko. Na borahusigana, na abâbâhani, na bâbâhani ma na maani ruma ngaigi ka hetagenani ma.

¹²I ruguhana na kiboru igê na tarihana na ruma bêrâ tanga i Negeve ki oga igê na maani ruma kerekê igê na agua, i haganega igê na apê.

¹³Na mane ki vi tangê, ki vi: “Na kiboru, ga maa tanga na mahera, na ani igê na tarihana bêrâ tanga i Tamasiko ma na ani igê na tarihana bêrâ tanga i Negeve, ka apuna. I raruni na kiboru ngegana ngaira na mane ni vogasiha ka ngaugi igê na ganiani ni vogasiha, ga vogasia re na Araha. Suria na kiboru ngegana ka apuna, na mane ni hagarahenga ka nakagi igê na votovoto apuna tanga na vogasiha, ngaigi ka na ngêra ni vogasiha, na ganiani na vogasiha ni bonoteniha ni tasi se ni kasi meni, suria ngaia ki na agua apuna.

¹⁴Matena na mane ni vogasiha, ga oga i Ruma ni Rotu, ma ka obania, viga huhura igê na mahera na Ruma ni Rotu, ngaira ki tuguhira, viga tasigi râ na tuguni apuna iata ma ka panigi so igê na kiboru ngegana, matena ga rahesia hato na Araha. I tuguhira, viga urisigi na tuguni renigi na gahu purua, ma ka kahu huhura igê na agua tangara na enoni.”

¹⁵Matena na mane ki hagevovoa hato na mahera i Ruma ni Rotu, ngaia ki meêhura igê na tarâto bêkê, ma ki hagevovoa na mahera na Ruma ni Rotu.

¹⁶Ngaia ki têa na hagevovo ma ki hagevovoa na tarihana bêkê. Na borahusigana ki 500 mita.

¹⁷Ma hemuri ngaia ki hagevovogi na tarihana bêrâ tanga i Tamasiko, na tarihana bêrâ tanga i Negeve, ma na tarihana bêso. Na ara ni tarihani ki hetagenani ma: 500 mita.

²⁰Vikê na tarihani heri na para, i rihia na mahera hagenani na Ruma ni Rotu, ki 500 mita. Na para ki voasirerua na agua apuna ma na agua purua.