Read Kahua ESEKIELE 43 Bible Online

ESEKIELE 43 - Kahua bible

ESEKIELE 43

¹Na mane ki meêrâ tanga na maani para bêkê.

²I ngekana inê kê bâsia râ, na God iata na Isiraelita i râ me igê na raramohana raha hunia. Inê kê rongoa na rongohana na râha me iana, i rongo manga na asi i maguhuguhu, ma na maveta ki togatoga renia na mavetana na raramohana raha.

³Na maruteha ngekê ki tagenana manga na ani i nago, matena God ki râ me, ki ruhuruhua igê i Jerusaleme, ma ki tagenana ma nikâ manga na ani hagarangia na ve i Kibare. Inê kê tubê so kê puru i ano.

⁴Na Araha raramohaga hunia ki râ suria na tarâto bêkê ma ki banu igê na Ruma ni Rotu.

⁵Na Araha ki angariê ma ki rageê akê ma ki meêbanu igê na mahera ni Ruma ni Rotu. I ngekana inê kê bâsia igê, vi na mavetana na raramohana na Araha ki raro i Ruma ni Rotu.

⁶Na mane ki ura heniê i ngekana. I metara na Ruma ni Rotu inê kê rongoa igê na Araha, i tamasi tangê, ki vi:

⁷“Igo, karena enoni ma, ikê nga ki na atohaku. Inê be oga ikê. Inê be oga tare i pasita na Isiraelita ma be marungira tare. Ngaira ma na maneraha iata ki hato, vige page erasia nikâ na ataku apuna. Ngaira ki hato, vige page vogasira nikâ na ataro, se vige bêbagi na gahuata na maneraha iata hagarangia ikê.

⁸I nago na maneraha ka tagarahigi na ruma raha iata ngahisia na Ruma ni Rotu iaku. Na apê hevoro ki voasigami, inê ma ngaira. Ngaira ka erasia na ataku apuna renigi na bagatauhata, gê kitenigi ngavê. Tahema igê na mangaraganiha iaku inê kê mutera ngavê.

⁹Haganega tenia i ngekê ki tuguhira, viga kasia râ na vogasiha ni ataro, ma ka nakara hagatê na gahuata na maneraha iata. Manga ga katokato vikana, inê kê gâga i pasita tare, ki bê ki arâ.

¹⁰“Ma igo karena enoni ma, gu hagarongora nga na enoni renia na Ruma ni Rotu, vi manga i he ka tagarahia. Gu hagamakira renigi na bagatauhata.

¹¹Matena ga tangahurira renigi na bagatauhata, gu hagararingenia tangara, vi manga i he ki bâ na Ruma ni Rotu: na atohani na kiboru ma na marâ hato, na maaniruma ma na tarâto igê, na borahusigana ma na aberaberagana ma na ara ni marâ hato igê. Go segegi so na marâ hato ngegana henigi na mangata ma na ramata tange, hanana ngaira ka giraragi ma ka arâ surigi maninga, ma ka marupegi maninga na mangata ma na ramata ngegana.

¹²Na ani, i teha ngavê na ramata tanga na Ruma ni Rotu, ki manga ikê: Na mahera hagenani rihia na Ruma ni Rotu igê na hungana ki na agua i apuna, marena vi na agua purua.”

¹³Ga hagevovoa na bea ni vogasiha tagenana manga ga hagevovoa na Ruma ni Rotu. Na hagevovona na bea ni vogasiha ki manga ikê. I ano rihia na bea ni vogasiha ki na tarana ruhu tangagi na gapu. Ngaia ki na 1 mita bê vato, ma ki abâbâ na 1 mita. Na hagapepe i na apanena hura ki na 50 sentimita bê tagere.

¹⁴Na hunana na bea ni vogasiha ki na 2 mita bê tagere, haganega tenia i ano tanga na gerina. Na akereni heri na gerina na hunana na bea ni vogasiha ka na 1 mita. Igê na gerina ngekana ki tâ igê nikâ tani na bea. Na bea ngekana ki na 4 mita bê tagere. Na akerena heri na gerina na bea ngekana ka na 1 mita.

¹⁵Tani nikâ na bea ki oga ahaha igê na bea ngekana. Ngaia ka na bea, ga susu igê. Ngaia ki na 4 mita bê tagere. Igê na akereni na bogoni heri ka ura akê igê na marâ, ga bâ mangagi na hona na puruka.

¹⁶Na akereni heri na bea, ga susu igê, ka hetagenani ma: na 12 mita.

¹⁷Na akereni heri na ani i gupu na bea ka hateganani ma: na 14 mita. Na hagapepe i na apanena hura na tarana ruhu ki na 50 sentimita. Na tarana ruhu ki na 1 mita bê vato. Igê na tarihana bêkê ki oga igê na tara tagere na bea ni vogasiha.

¹⁸Na Araha God ki tamasi tangê, ki vi: “Igo, karena enoni ma, gu karingê. Matena ga tagarahia hato igê na bea ni vogasiha tanga ga susu igê, ma ka kamusia renigi na gaputa na ganiani, ga vogasi re, ki tuguhigo, vigo hagapua surigi na mangata igê.

¹⁹Go tagarenia na puruka mane tangara na mane ni vogasiha tenia na varo ninuni iana o Levi, tenia na hagosi ni nuni iana o Satoke, suria ngaira ma ngegana kani i oto tangara, viga hagarahe tangê. Inê na Araha God kani gê vi vikana. Na puruka ngekana ngaia ki na vogasiha ni bonoteniha ni tasi.

²⁰Go kamusigi na honi ge he, ga ura akê igê na bea ga susu igê, renigi na gapuna, ma ko kamusigi re nikâ na gerini na hunana na bea ni vogasiha ma na hagapepe ni tarana ruhu. Igê na tarana ngekana igo ko hagamatarotaroa renia na bea ni vogasiha, ma ko hagapua, ki voravora re na aniku, inê na Araha.

²¹I tuguhigo, go sungia na puruka mane ni vogasiha ni bonoteniha ni tasi igê na agua tanga i metara na mahera ni Ruma ni Rotu.

²²“Igê na ruata na tangiana ki tuguhigo, vigo torea na goti mane, i apeape koro ma ki pe vora era, ma ko tagarenia tanga na vogasiha ni bonoteniha ni tasi. Gu hagapua na bea ni vogasiha renia na gapuna, tagenana ma manga go bani katoa renia na gapuna na puruka mane.

²³Matena go katokato hato vikana, go torererua na bêhâgaterua na puruka mane ma na sipi mane, garu komaga ma karu pe vora era.

²⁴Go tagarenirerua tangê. Na mane ni vogasiha ki tuguhira, viga hagamarasigarerua ma ka susu renirerua tangê inê na Araha.

²⁵“Igê na ara ni tangiani gi pi ki tuguhigo, vigo katogi igê na vogasiha ni bonoteniha ni tasi renira na goti, na puruka mane ma na sipi mane, na ani go girara, vi ngaira ka apeape koro ma ka pe vora era.

²⁶Igê na ara ni tangiani gi pi na mane ni vogasiha ki tuguhira, viga hagamatarotaroa na bea ni vogasiha ma ka hagapua, ki voravora re na aniku, inê na Araha.

²⁷I murini na tangiani gi pi igê na varuta na tangiana ma igê na ara ni tangiani i muri, ki bê ki arâ, na mane ni vogasiha ki tuguhira, viga susu tangê igê na bea ni vogasiha, ma ka tagarenigi igê na vogasiha ni nakuha tangara na enoni. Vikana igamu kamu hagakoro obaku, ma inê be korokoro tangagamu. Ngaia kani gê visia, inê na Araha God.”