Read Kahua ESEKIELE 45 Bible Online

ESEKIELE 45 - Kahua bible

ESEKIELE 45

¹Na Araha ki vi: “Matena igamu na raraha iana o Jakobo kamu tongania igê na mako i na agua, ki tuguhigamu, vigamu naka râ tagua tangê inê na Araha. Na borahusigana ki veari 1250, ma ki abâbâ na vearina rehagaro gi tage. Na agua hagenani ngekana ki apuna.

²Igê na agua ngekana kamu naka igê na atohana na Ruma ni Rotu. Na akereni heri na atohana ngekana kamu katogi ki hetagenani ma: 500 mita. Rihia na atohana ngekana mu naka igê na mahera, i abâbâ 50 mita.

³Mu hagevovoa na agua ngekana. Na borahusigana ki veari 1250, ma ki abâbâ 10, 000 mita. Mu torea na Ruma ni Rotu i rarona. Ngaia ki na ruma, i apuna teha ngavê.

⁴Na apanena ngekana na agua ki na mako i apuna, suria ngaia ki na agua tangara na mane ni hagarahenga, ga tagara tangê, inê na Araha, i Ruma ni Rotu iaku. I rarona ka page goga igê na ruma iata ma na mako tanga na Ruma ni Rotu.

⁵Ma na bogona na agua ngekana ki tage tora ma henia ta bogona. Ngaia ki na agua tangara na Levita, ga tagara i Ruma ni Rotu. I rarona ka page oga igê na hinua iata, ga gâga igê.

⁶“Ma kamu hagevovoa tagua ngahisia na agua apuna. Na borahusigana ki veari 1250, ma ki abâbâ 5000 mita. Ngaia ka na atohana na hinua raha, ga page ogasia na ani mavê na Isiraelita, i obania.”

⁷Na Araha ki vi: “Mu naka tagua na mako tanga na maneraha igê na tarihana bêkê ma i bêso igê na agua apuna ma na agua tanga na hinua raha. Na agua i na tarihana bêso ki arârâ ma ki tariha igê na Asiraha ma na agua i na tarihana bêkê ki arârâ ma ki tariha igê na pereperegana na agua. Na mako tanga na maneraha ngekana ki raharaha mangagi na mako, na agua ga tonganigi na raraha iana o Jakobo.

⁸Ngaia nga ka na mako iana na maneraha i Isiraele, hanana ngaia ki hato, vige hagamamasiagara nikâ na raraha iana o Jakobo, ma ki nakara vê hete ka nahunigi mareta na mako iata.”

⁹Na Araha God ki vi: “Maneraha ni Isiraele, i uhu noga! Naka vê na tasi! Nakagi vê na hearihatana ma na hagamamasiaganiha ni nuni. Mu katogi ma hete na tarani, ga koro ma ka otooto. Siana kamu parênigi nikâ na mako iata na kariaku. Inê nga na Araha God kani gê vi tangagamu ngekê.

¹⁰“Na ara ni hitangimi ki tuguhia, vi siana ki ravarava haga igê na higahigani ma na hagararini na marâ.

¹¹Na hagararina na ‘ephah’ na marâ mamata ki tage tora ma henia na hagararina na ‘bath’ na marâ na nongona. Na tangahuru na ‘ephah’ ki vora na ‘homer’ gi tage, ma na tangahuru na ‘bath’ ki vora na ‘homer’ gi tage nikâ. Na ‘homer’ ki na hagevovo.

¹²Na higahigani ka manga igê: na ‘gerah’ tangahuru gi rua ki vora na ‘shekel’ gi tage, ma na tangahuru ge ono na ‘shekel’ ki vora na ‘mina’ gi tage.

¹³“Na Isiraelita ki tuguhira, viga mahatangenigi tanga na maneraha iata na votovoto, ga manga ikê: na ani gi tage na koni tenigi na ara ni tangahuru ge ono na koni, ma ki tagenani ma nikâ tangagi na harisi,

¹⁴ma tangagi na ara ni tangarê na oile ni olive. Mu hagevovo igê na ‘bath’. Na tangahuru gi tage na ‘bath’ ki vora na ‘homer’ gi tage, se na ‘kor’ gi tage.

¹⁵“Na Isiraelita ki tuguhira nikâ, viga mahatangenia na ani gi tage na sipi se na goti tenigi na ara ni tangarê gi rua na sipi se na goti. I tuguhigamu, vigamu tagarenigi na ngêra ni vogasiha ma na ganiani tanga mu susu renigi ma tanga na vogasiha ni haganakuha, hanana gê bonotenigi na tasi iami. Ngaia kani gê visia, inê na Araha God.

¹⁶“Na enoni hato ki tuguhira, viga mahatangenigi na votovoto ngegana tanga na maneraha ni Isiraele.

¹⁷Na maneraha ki tuguhia, vi mahatangenira na ganiani tanga ga susu renira hagenani, ma na ngêra ma na vaini ni vogasiha, hanana na Isiraelita ka vogasi igê na Tangiana ni Mamaroha ma igê na tangiani raha ni rotu igê na ara ni karena hageha, ma igê na tangiani raha getigi na rotu. Ngaia ki bâbâsurigi na vogasiha ni bonoteniha ni tasi, na vogasiha ni ngêra, na ganiani tanga ga susu renigi hagenani, ma na vogasiha ni haganakuha, hanana gê bonotenigi na tasi iata na Isiraelita.”

¹⁸Na Araha God ki vi: “Igê na tangiana gi tage igê na hageha gi tage ki tuguhigamu, vigamu vogasi renia na puruka mane, i apeape koro ma ki pe voravora era, hanana mu hagamatarotaroa na Ruma ni Rotu.

¹⁹Na mane ni vogasiha ki tuguhira, viga torea tagua na gapuna na puruka ni vogasiha ni bonoteniha ni tasi ngekana, ma ka monegi renigi na una na maani Ruma ni Rotu, ma renigi na rarini na bogoni heri na bea ni vogasiha, ma igê na u na tarâto tanga na mahera ni Ruma ni Rotu.

²⁰Igê na pita na tangiana na hageha ngekana ki tuguhigamu, vigamu katokato vikana nikâ tangara na enoni, ga tasi purupuru ma ka pe girara so, vi ngaira ka tasi. Igamu kamu hagamatarotaroa na Ruma ni Rotu renia na tarana ngekana.

²¹“Igê na tangahuruta matare he na tangiana igê na hageha gi tage ki tuguhigamu, vigamu haganega kamu hagarahasia na tangiana raha na Paseka. Surigi na tangiani gi pi ki tuguhigamu, vigamu ngaugi ma igê na bereti i pe ahunga.

²²Na tangiana gi tage igê na tangiana raha na Paseka na maneraha ki tuguhia, vi nahuia igê na puruka mane tanga na vogasiha ni bonoteniha ni tasi, tanga ngaia marena ma tangara na enoni hato.

²³Surigi na tangiani gi pi i na ara ni tangiani igê na Paseka ki tuguhia, vi susu tangê renira na puruka mane gi pi hagenani, ma na sipi mane gi pi hagenani, ga apeape koro ma ka pe voravora era. Ngaia nikâ ki tuguhia, vi tagarenia na vogasiha ni bonoteniha ni tasi renia na goti mane surigi na ara ni tangiani.

²⁴Henira na ara ni puruka mane ma na goti mane, ga vogasi renira, ngaia ki tuguhia, i tagarenigi na tangahuru gi rua na kilo na koni ma na lita gi pi na oile, ga vunuvunu, ma na kâgupugana.

²⁵“Igê na Tangiana ni Ruhu igê na tangahuruta matara gi rima na tangiana igê na pita na hageha na maneraha ki tuguhia, vi katokato tagenana ma manga igê na tangiana raha na Paseka. Igê na ara ni tangiana surigi na tangiani gi pi ki tuguhia, vi tagarenigi igê na vogasiha ni bonoteniha ni tasi ma ki susu renira na ganiani hagenani henigi na koni ma na oile, ga hetagenani.”