Read Kahua ESEKIELE 46 Bible Online

ESEKIELE 46 - Kahua bible

ESEKIELE 46

¹Na Araha ki vi: “Na tarâto bêkê tanga na mahera ni Ruma ni Rotu ki araria, i purupuru nga surigi na tangiani purua ge ono, ma ki araria hete, i tahataha igê na Tangiana ni Mamaroha, ma igê na tangiani raha igê na karena hageha.

²Igê na tangiani ngegana na maneraha ki tuguhia, vi arâ tenia na mahera na Ruma ni Rotu ma ki bêbanu ki arâ suria na tarâto tanga na kiboru raha. Ngaia ki tuguhia, i rêra so hagarangia na u ni maani ruma, matena na mane ni vogasiha ka susu renira na ganiani ma ka tagarenigi na vogasiha ni haganakuha. I ngekana igê na maani ruma ngaia ki tuguhia, vi susure ma ki tubê so i ano, ma hemuri ki aporo hura. Na maani ruma ki araria, i tahataha, mataro me ki susu na arito. Igê na ara ni Tangiana ni Mamaroha na maneraha ki tuguhia, vi susu tangê igê renira na karena ge ono na sipi ma na sipi mane gi tage, ga apeape koro ma ka pe voravora era.

⁵Henia na ara ni sipi mane ki tuguhia, vi tagarenigi na tangahuru gi rua na kilo na koni, ma henia na ara ni karena sipi ki tuguhia, vi atani tagarenigi mavê na koni suria na obaniha iana marena. Henigi na ara ni tangahuru gi rua na kilo na koni ki tuguhia, vi tagarenigi na lita gi pi na oile, ga vunuvunu, ma na kâgupugana.

⁶Igê na tangiani raha ni karena hageha ki tuguhia, vi vogasi igê renira na bêhâgana na puruka mane, ma henia na ara ni goti mane ki tuguhia, vi tagarenigi na tangahuru gi rua na kilo na koni. Ma henia na ara ni karena sipi na maneraha ki tuguhia, vi atani tagarenigi mavê na koni suria na obaniha iana marena. Henigi na ara ni tangahuru gi rua na kilo na koni ki tuguhia, vi tagarenigi na lita gi pi na oile, ga vunuvunu, ma na kâgupugana. Matena na maneraha ki huhura tenia na kiboru raha igê na tarâto, ki tuguhia, vi huhura aporo suri ugana.

⁹“Matena ga arâ me na enoni, hanana viga rahesiê, inê na Araha, igê na ani mavê na tangiani raha ni rotu, na ani, ga bêbanu me igê na tarâto i na tarihana bêrâ tanga i Tamasiko, i murina na hagarahenga ki tuguhira, viga huhura igê na tarâto bêrâ tanga i Negeve. Ma na ani, ga bêbanu me igê na tarâto bêrâ tanga i Negeve, ki tuguhira, viga huhura igê na tarâto bêrâ tanga i Tamasiko. Na enoni ki apu vige huhura aporo suri ugana, ma ki huhura hete igê na tarâto, i maa tanga na ani, i banu me igê.

¹⁰Na maneraha ki tuguhia, vi bêbanu me henira na enoni ma ki huhura henira nikâ.

¹¹Igê na tangiani raha ni rotu ki tuguhira, viga tagarenigi igê na tangahuru gi rua na kilo na koni henira na ara ni puruka mane ma na goti mane, ma henira na sipi ki tuguhira, viga atani tagarenigi na ani mavê na koni suria na obaniha iata mareta. Henigi na ara ni tangahuru gi rua na kilo na koni ki tuguhira, viga tagarenigi na lita gi pi na oile, ga vunuvunu, ma na kâgupugana.

¹²“Manga na maneraha ma ki obania marena, vi susu tangê inê na Araha, se vi vogasiê renia na vogasiha ni haganakuha, na tarâto bêkê tanga na mahera ni Ruma ni Rotu ki tahataha nga tanga. Ngaia ki tuguhia, vi vogasi tagenana manga igê na Tangiana ni Mamaroha. Matena i huhura, ki tuguhia, viga purusia aporo na tarâto.

¹³“I na ara ni mavoraro igê na ara ni tangiani ngaira ki tuguhira, viga susu tangê inê na Araha renia na karena sipi, i apeape koro ma ki pe voravora era ma ki hatohato huria na harisi gi tage.

¹⁴Henia na karena sipi ngaira ki tuguhira, viga tagarenigi nikâ na kilo gi oru ma na kâgupugana na koni henigi na lita gi rua ma na kâgupugana na oile, tanga ga aroa henia na koni. Na ramata tanga na vogasiha ngekê tangê ka gâga tare, ki bê ki arâ.

¹⁵Ngaira ki tuguhira, viga tagarenigi tangê na karena sipi, na koni ma na oile i na ara ni mavoraro, tare ki bê ki arâ.”

¹⁶Na Araha ki vi: “Manga vi na maneraha, ma ki mahatangenia tagua na mako iana tanga na hitangita o karena, na mako akana ki tanga so ma o karena ngekana, hanana i nahunia nga tare.

¹⁷Manga vi na maneraha ma ki mahatangenia tagua na mako iana tanga na hitangita na kariana, na kariana ngekana ki nahunia nga na mako akana rârâ ma ki tariha me igê na harisi, na ara ni marâ ki aporo manga i bani hanana, suria na mako ki na anina na maneraha, ma ngaia so henira o karena kani ga girara ga nahunia gatagata nga.

¹⁸Na maneraha ki apu tanga, vige parênia na mako tenira na enoni. Manga vi obania vi vatera o karena tagua na mako, ngaia ki vatera na mako iana so marena, hanana siana ki parênigi na mako iata na kariaku ma ki hagamamasiaga apeta.”

¹⁹Ma hemuri na mane ki meêrâ tanga na maani ruma tangagi na kiboru, i maa tanga i Tamasiko, hagarangia na tarâto igê na mahera ni Ruma ni Rotu i na tarihana bêrâ tanga i Negeve. Na kiboru ngegana ka na kiboru apuna iata na mane ni vogasiha. Ngaia ki usia tangê na agua kereso igê na kiboru ngegana.

²⁰Ngaia ki vi tangê, ki vi: “Bâ! Ikana nga na agua, na mane ni vogasiha ka hagamako igê na ganiani ni vogasiha ni bonoteniha ni tasi ma ni kasi meni. I ngekana nikâ kani ga hahahi igê na koni tanga na vogasiha, suria i pe arari, vige toregi hura igê na mahera na Ruma ni Rotu na marâ, ga apuna, i era ma ka hagaerasira na enoni, matena ga hatarigi.”

²¹Ma hemuri ngaia ki meêrâ tanga na mahera na Ruma ni Rotu ma ki hagabâsiê renigi na kere mahera igê na ariruguni ge he na mahera na Ruma ni Rotu.

²²Na kere mahera ngegana ka hetagenani ma. Na borahusigani ki na vearini gi tage ma na tangahana gitage, ma ki hura akê me, ma ka abâbâ 30 mita.

²³Na ara ni hitangini ki tonga re na hê tari heri rihia. Na êmu igê ka oga ngahisia na apê.

²⁴Na mane ki vi tangê, ki vi: “Na agua ni hagamako ngaigi nga kani igana. Na mane, ga tagara i Ruma ni Rotu, ka hagamako igê na ganiani, na enoni ka vogasi re.”