Read Kahua ESEKIELE 48 Bible Online

ESEKIELE 48 - Kahua bible

ESEKIELE 48

¹Na Araha God ki vi: “Na pereperegana bêrâ tanga i Tamasiko ki râ bêkê, haganega igê na Asiraha, tanga na hinua i Getilone, tanga na tara i aharêvoro tanga i Hamata, ma ki râ tanga na hinua i Enone. Igê na apanena harê na pereperegana ngekana karu oga igê na apaneterua i Tamasiko ma Hamata. Na ara ni agua ni mako tonganigi na varo ninuni iana o Isiraele ki oga harahara, haganega tenia na pereperegana i Tamasiko tariha râ igê na pereperegana i Esipito. Hagenago ngaia ki na mako iata na raraha iana o Tane. Hemuri vê ngaia ki na agua iata na raraha iana o Asere. Hemuri vê ngaia ki na agua iata na raraha iana o Napatali. Hemuri vê ngaia ki na agua iata na raraha iana o Manase. Hemuri vê ngaia ki na agua iata na raraha iana o Eperaimi. Hemuri vê ngaia ki na agua iata na raraha iana o Rubeni. Hemuri vê ngaia ki na agua iata na raraha iana o Juta.

⁸“Hoita, vikana ma ki oga vê na mako, i oga nanêa ta na marâ. Ngaia ki abâbâ 25,000 mita, ma na borahusigana, i haganega i kerekê tanga i kereso, ngaia ki tage tora ma henigi na mako iata na varo ninuni iana o Isiraele. Na Ruma ni Rotu ki page oga igê na mako ngekana.

⁹“Tagua na mako igê kamu naka vê tangê inê na Araha. Na borahusigana ki 25,000 mita, ma ki abâbâ 20,000 mita.

¹⁰Tagua na mako apuna ngekana ki na anita na mane ni vogasiha. Na borahusigana, i haganega i kerekê tanga i kereso, ngaia ki 25,000 mita, ma ki abâbâ na vearina 500. Igê na gupuna nga na agua ngekana ki gâga nga igê na Ruma ni Rotu iaku.

¹¹Na mako apuna ngekana ki na anita na mane ni vogasiha na raraha iana o Satoke. Ngaira ka toto suriê maninga ma ka pe maratorata na raraha iana o Levi, ga hakunira na Isiraelita getera, matena ga kasi reniê.

¹²Tahema ngaira ka page nahunia mareta na mako, na mako i apuna ngavê, garu oga hesuri na anita na Levita ma ngaia.

¹³“Na Levita ki oto tangara, viga nahunia mareta na mako, i hetagenani ma henia na anita na mane ni vogasiha. Na borahusigana, i haganega i kerekê tanga i kereso, ki 25,000 mita, ma ki abâbâ 10,000 mita. Na borahusiterua haku na mako gi rua ngegana ki 25,000 mita, ma na abâbâhaterua ki 20,000 mita.

¹⁴Na mako na agua iaku ngaia ki na mako, i koro teha ngavê. Ngaia ki na agua iaku inê na Araha, ma ki apuna. Tahema ki apu, vige hagavuringenia, se vige hagârisingenia, se vige haganahunia ta na enoni renia.

¹⁵“Na agua na mako i hitahita râ, ki pe apuna. Na borahusigana ki 25,000 mita ma ki abâbâ 5,000 mita. Ngaia ki gâga tangara na enoni tokora. I ararira, hanana viga tagarahigi igê na hinua ma na mu iata, ma ka hagangêra igê na togoha iata. Na hinua ki gâga nga i gupu.

¹⁶Na apanini heri ki araria, vi hetagenani ma: 4,500 mita.

¹⁷Na abâbâhana na sinopane rihia na hinua ki 250 mita.

¹⁸Na mako i na apanena hura na sinopane ki tâtâ papa henia na mako apuna. Na borahusigana i na apanena bêkê na hinua ki 10,000 mita, ma i na apanena bêso ki tagenana ma henia. Ngaia ki na mako tangagi na mu iata na enoni i hinua ngekana.

¹⁹Na ani mavê na enoni, naka ma vi ngaia ka na ani mavê na raraha, ngaia ki otooto tanga, vi ngêngê igê na mako ngekana.

²⁰“Na mako iaku henia na mako igê na hinua ka hetagenani ma na akereni heri: ka 25,000 mita.

²¹“Na maneraha ki nahunia na mako, i hitahita hura na apanena bêkê ma i na apanena bêso na agua, i oga igê na Ruma ni Rotu, na mako iata na mane ni vogasiha, na mako iata na Levita ma na hinua. Na perepregana bêkê na mako iana na maneraha ki tariha râ i ve i Jotano. Na pereperegana bêso ki tariha râ igê na Asiraha. Na pereperegana ta akerena ki oga papa henia na mako iata na raraha iana o Juta, ma na pereperegana ta akerena ki oga papa henia na mako iata na raraha iana o Benamino.

²³Hemuri vê ka oga hesurisuri na mako iata na varo ninuni getera iana o Isiraele. Ngaia ki haganega igê na pereperegana bêkê ma ki so ki tariha râ igê na Asiraha. Haganega ngaia ki na mako iata na raraha iana o Benamino. Hemuri vê ngaia ki na agua iata na raraha iana o Simeone. Hemuri vê ngaia ki na agua iata na raraha iana o Isakare. Hemuri vê ngaia ki na agua iata na raraha iana o Sebuluni. Ma hemuri vê ngaia ki na agua iata na raraha iana o Gata.

²⁸“Ma hemuri vê ki gâga na pereperegana i Negeve, i haganega i Tamare, ma ki bêbêso tangagi na ve banga i Katesi, ma ki arâ suria na ve na pereperegana i Esipito, ki arârâ ma ki tariha râ igê na Asiraha.

²⁹“Ngaia nga hanana vigamu voasia nga na mako tonganira na varo ninuni iana o Isiraele. Ngaia kani gê visia, inê na Araha God.”

³⁰Na para na hinua i Jerusaleme ki tonga na maani para tangahuru matarerua igê. Na ara ni hitangini na maani para ka hêtana renia na hitangita na hagosi ni nuni iata na raraha iana o Isiraele. Na tarihana na para bêrâ tanga i Tamasiko ki 4,500 mita, ma ka oga harahara igê na maani para gi oru: Maanipara Rubeni, Maanipara Juta, ma Maanipara Levi.

³²Na tarihana na para bêkê ki 4,500 mita, ma ka oga harahara igê na maani para gi oru: Maanipara Josepo, Maanipara Benamino ma Maanipara Tane.

³³Na tarihana na para bêrâ tanga i Negeve ki 4,500 mita, ma ka oga harahara igê na maani para gi oru: Maanipara Simeone, Maanipara Isakare, ma Maanipara Sebuluni.

³⁴Na tarihana na para bêso ki 4,500 mita ma ka oga harahara igê na maani para gi oru: Maanipara Gata, Maanipara Asere, ma Maanipara Napatali.

³⁵Na para hagenani, i rihia na hinua, ki 18,000 mita. Hagenega i ngekê i Jerusaleme ka hêtana, vi “Pasina na Araha”.