Read Kahua ESEKIELE 5 Bible Online

ESEKIELE 5 - Kahua bible

ESEKIELE 5

¹Na Araha ki vi: “Igo, karena enoni ma, gu têa na tatapa borahu, i masi, ma ku gurigi re na taboturimu ma ku goro bê huri. Ma hemuri ko voasigi, ki voravora ki oru, ma ki tagenani na higahigani.

²Na ani gi tage ko sungia i gupuna na hinua, matena i hatohato na tahariana. Na ruata ko ninia renia na tatapa borahu rihia na apanena hura na para ni hinua. Na oruta ko tokorenia tanga na roga, ma inê be amuria na tatapa borahu iaku ma be tarigenigi renia.

³Tani na varehumu ko nakanaka ma ko rumigi igê na taretarena na tuguni iamu.

⁴Ma tani na hitangini ko kasigi igê na gi, ki ngaugi. Ma tenia na gi ngekana na apanena hagenani iata na Isiraelita ki page noro renia.”

⁵Na Araha God ki vi: “Na tarana ngekana ki page tarahua i Jerusaleme.

⁶Inê kê naka Jerusaleme i gupuna na maveta. Na agua hato getigi i maveta ka gâga rihia. Ngaira ka erataga ngavê teharira na enoni i na agua getigi i maveta. Ngaira ka guguruga ngavê teharigi na agua rihia. Ngaira ka usitenigi na ramata iaku, ma ka pe botage renigi na tamasinga iaku.

⁷Tahema, inê na Araha God, kê vi tangara, kê vi: Jerusaleme, mu karingê. Igamu kamu pe marupegi na ramata ma na tamasinga iaku. Igamu kamu togeaga teharigi na agua rihigamu. Igamu kamu râ surigi na tauhata na ai na agua getigi.

⁸Tahema, inê na Araha God, kê vi tangagamu, vi inê ka na merongami. Inê be hagaitangigamu i maata na enoni hato i maveta.

⁹Jerusaleme, inê be hagaitangigamu meni na bagaparongami. Na hagaitangiha iaku tangagamu ki page teharigi na ani i nago na hagaitangiha ma na ani i hemuri.

¹⁰Tahema na enani kare i Jerusaleme ka page ngaura so mareta na kareta, ma na kare ka page ngaura so mareta na enata. Inê be hagaitangigamu, ma be tokorenira surigi na agua hato getigi na hitangimi, ga tahitahi mêngara.

¹¹“Tahema, inê na Araha God, inê kê tohe, vigê retegamu renia na tatapa borahu, ma ki asa be takigamu, suria igamu kamu hagaerasia na Ruma ni Rotu iaku renigi na bagatauhami, gê kitenigi ngavê.

¹²Tani na hitangimi na ai ni Jerusaleme ka page meme renigi na ringa ma na magêha i rarona na hinua. Tani ka page ninira renigi na tatapa borahu i metara i hinua. Ma tani inê be tokorenira rârâ ma be amuria na tatapa borahu iaku, be tarigenira.

¹³“Mu page hatamia na mangariaganiha raha iaku, mataro me ki manava na obaku, suria gê mangariaga ngavê. Matena ga tarahugamu igê na tarani ngegana, igamu kamu page tahetara reniê, vi inê na Araha kani gê ramonigamu, suria gê mangariaga ngavê, suria mu pe toto suriê.

¹⁴Na ai ni agua rihigamu ka page tamasigamu, ka page manavatenigamu, ma ka page hinarugamu.

¹⁵“Matena gê hagaitangigamu igê na mangariaganiha ma na teganiha raha iaku, na agua hato rihigamu ka page mamakuku. Ngaira ka page makimaki tenigamu, ma ka page megamu marabe. Ngaia kani gê visia, inê na Araha.

¹⁶Inê be katoa, ke hato vige tarahugamu na ngauha, ma kamu mesi magêha. Igamu kamu page hatamia na magêha, i mangagi na mage, ga taketake hunigamu.

¹⁷Inê be kasira na magêha ma na marâ vasiga, ga garagara, ke hagamesira na karemi. Inê be hagatorangenigi na ringa, na henahuita ma na hearihatana, ke nahuigamu kamu me. Ngaia kani gê visia, inê na Araha.”