Read Kahua ESEKIELE 6 Bible Online

ESEKIELE 6 - Kahua bible

ESEKIELE 6

¹Na Araha ki tamasi tangê, ki vi:

²“Igo, karena enoni ma, gu maatigi na hungani i Isiraele, ma ko haganunura na Isiraelita, ga goga i ngekana.

³Gu vi tangara, ke karingagi na tamasinga iaku, inê na Araha God. Gu vi tangara, ke rongogi na tamasinga iaku renigi na barani, na hungani, na tarihu ma na maruguni. Inê na Araha God kê tamasi vikê tangara, kê vi: Inê be hagatorangenira na merongami, ke hogegi na agua, mu vogasi ataro igê.

⁴Na bea ni vogasiha iami ke guguru, ma na apira, mu susu igê na marâ, i sigini koro, tangara na ataro, ke amenamena. Ka page ahurara rako na hitangimi i maata na nunuta na harasimi.

⁵Isiraelita, inê be tokorenigi na gahuami. Inê be tokorenigi na surimi rihigi na bea ni vogasiha iami.

⁶Na hinua hato iami ka page aruhuruhu. Na agua, mu vogasi igê, ka page hihiruga. Na bea ni vogasiha iami ka page guguru. Na nunuta na harasimi ka page amenamena. Na apira, mu susu igê, ka page akamakama. Na ara ni tagaraha iami ka page magahuru ngavê.

⁷Rako na hitangimi ka page ahurara ka meme. Ma na hitangimi, ga tahitahi, ka page tahetara reniê, vi inê ka na Araha.

⁸“Tani na hitangimi inê be nakara vê, ke tahi tenia na henahuita ngekana, ma be tokorenira surigi na agua iata na mahuara,

⁹ga page henahuraura. I ngegana ngaira ka page takusiê aporo igê, ma ka page aitangisia, vi inê kani gê hagaitangira ma kê hagamakira, suria ga pe toto suriê, ka kasi reniê, ma ka obanira ma na ataro, ma ki mareha vi inê hete. Ngaira ka page tangahurira ngavê renigi na bagatauhata ma na bagatarihata.

¹⁰Ngaira ka page tahetara reniê, vi inê ka na Araha ma kê hagamonarigi na haganunuha iaku.”

¹¹Na Araha God ki tamasi tangê, ki vi: “Gu hita baro! Puhara! Ngerengere, ko vivi: I hato noga na bagatauhata ma na bagatarihata na Isiraelita. I page era ngavê tangara! Ngaira ka page me renigi na henahuita, na magêha ma na ringa.

¹²Na ani, ga oga hagatê, ka page me renia na ringa. Na ani, ga oga hagarangi, ka page me renia na henahuita. Ma na ani, ga tahitahi mêngara, ka page mesi magêha. Ngaira ka page hatamia na mangariaganiha raha iaku, mataro me ki manava na obaku.

¹³Na gahuata ka page tâ totoko rihigi na bea ni vogasiha ma i berarogani na nunuta na harasita. Na gahuata ka page tâ totoko igê na ara ni agua, ga susu igê tangara na harasita igê na hungani, igê na barani, ma i ruguhani na apinige ga arubebe. Ma na enoni hato ka page tahetara reniê, vi inê ka na Araha.

¹⁴Ua, inê be hagaitangira. Inê be ruhuruhua ma be hagahirungia na apanena hagenani iata, haganega tenia i Negeve tanga na hinua i Ribila. Mareha ta na hinua, vige page tihia. Vikana ngaira hato ka page tahetara reniê, vi inê ka na Araha.”